எப்பதான் ரிலீஸ்? எதிர்பார்ப்புகளை எகிற வைக்கும் ஹீரோயின் செண்ட்ரிக் படங்கள்..!

சிறிய பெரிய திரைப்படங்களும் ஓடிடியை நோக்கி நகரத்தொடங்கிவிட்டன. ஆனாலும் அண்ணாத்த, வலிமை, மாநாடு போன்ற சில படங்கள் எப்போது தியேட்டர்கள் திறக்கும் என்ற எதிர்பார்ப்புடன் காத்திருக்கின்றன.

ஹீரோயின் சென்ட்ரிக் படங்கள்

கொரோனாவுக்கு பிறகு பல்வேறு துறைகளும் கடுமையாக பாதிக்கப்பட்டுள்ளன. அதில் ஒன்று சினிமா. வழக்கமாக கொண்டாட்டத்துடன் சென்றுகொண்டிருந்த படம் வெளியீடுகள் எல்லாம் இன்று ஓடிடிக்குள் சுருங்கிவிட்டன. வேறு வழியின்றி சிறிய பெரிய திரைப்படங்களும் ஓடிடியை நோக்கி நகரத்தொடங்கிவிட்டன. ஆனாலும் அண்ணாத்த, வலிமை, மாநாடு போன்ற சில படங்கள் எப்போது தியேட்டர்கள் திறக்கும் என்ற எதிர்பார்ப்புடன் காத்திருக்கின்றன.

இந்தப்படங்கள் தான் மீண்டும் தியேட்டர் வரவேற்பை தட்டி எழுப்பும் எனவும் தியேட்டர் உரிமையாளர்களும் காத்திருக்கின்றனர். அதேவேளையில் தியேட்டரில் ரிலீஸ் ஆகுமென எதிர்பார்க்கப்பட்ட டாக்டர் போன்ற சில திரைப்படங்களும் ஓடிடிக்கும் நகர்கின்றன. பல எதிர்பார்ப்புகளை ஏற்படுத்திய திரைப்படங்கள் வரிசையில் நாயகிகளை மையமாக வைத்து முழுப் படத்தையே நாயகிகள் தாங்கிச் செல்லும்  சில திரைப்படங்களும் எதிர்பார்ப்பை எகிற வைத்துள்ளன.

1.தலைவி

தமிழ் திரையுலக ரசிகர்கள் எதிர்பார்த்து  காத்துகொண்டு இருக்கும் திரைப்படம் தலைவி. தமிழ், ஹிந்தி மற்றும் தெலுங்கு போன்ற மொழிகளில் வெளியாக தயாராகவுள்ளது.  A.L விஜய் இந்த படத்தை இயக்கியுள்ளார். மறைந்த முன்னாள் முதல்வர் ஜெயலலிதாவின் வாழ்க்கை வரலாறு படமாக உருவாகியுள்ள இப்படத்தில் ஜெயலலிதாவாக நடிகை கங்கனா ரனாவத் நடிக்கிறார், எம்.ஜி.ஆர் கதாபாத்திரத்தில் நடிகர் அரவிந்த்சுவாமி நடிக்கிறார். படத்தின் ட்ரெய்லர் வெளியீடு வெளியாகி நல்ல விமர்சனங்களை பெற்றுள்ள நிலையில் விரைவில் இப்படம் வெளியாகும் என எதிர்பார்க்கப்படுகிறது.

2.நெற்றிக்கண்

 புதுமையான கதாபாத்திரத்தில், விக்னேஷ் சிவன் தயாரிப்பில் நயன்தாரா நடித்து வந்த திரைப்படம் தான் நெற்றிக்கண். ப்ளைண்ட் என்ற கொரியன் படத்தின் அதிகாரப்பூர்வ ரீமேக்காக வெளிவரவிருக்கும் இப்படத்தினை அவள் படத்தின் இயக்குநர் மிலிந்த் ராவ் இயக்கியுள்ளார். மேலும் நயன்தாராவுடன் அஜ்மல் முக்கிய கதாபாத்திரத்தில் நடித்துள்ளார். கிரிஷ் இப்படத்திற்கு இசையமைத்துள்ளதுடன்,  ஆர்.டி ராஜசேகர் ஒளிப்பதிவு செய்துள்ளார். கொரியன் படத்தின் ரீமேக்காக  தமிழில் நெற்றிக்கண்ணாக வரவிருக்கும் இப்படத்தில் போலீஸ் கதாபாத்திரத்தில் நடித்துள்ளார் நயன்தாரா. இது ஓடிடியில் வெளியாகும் என எதிர்பார்க்கப்படுகிறது

3.ராங்கி

த்ரிஷாவின் நடிப்பில் த்ரில்லர் மூவியாக உருவாகியுள்ள ராங்கி ரிலீசுக்கு தயாராக உள்ளது.  சமீபத்தில் வெளியான ஒரு தகவலின்படி இப்படமும் நேரடியாக ஓடிடியில் வெளியாகும் என எதிர்பார்க்கப்படுகிறது. இந்தப்படத்தின் டீசர் ஒரு வருடத்திற்கு முன்னரே வெளியான நிலையில் படம் இதுவரை வெளியாகவில்லை. இப்படத்தில் த்ரிஷா ஆக்‌ஷன் காட்சிகளில் நடித்துள்ளார். இப்படத்தை எங்கேயும் எப்போதும் பட இயக்குநர் சரவணன் இயக்கியுள்ளார்.

4.பூமிகா

ஐஸ்வர்யா ராஜேஷின் 25வது படமாக உருவாகியுள்ளது பூமிகா. கார்த்திக் சுப்பாராஜின் தயாரிப்பு நிறுவனம் இந்தப்படத்தை தயாரிக்கிறது. த்ரில்லர் படமாக உருவாகி வரும் இப்படத்தின் பெரும்பான்மையான காட்சிகள் நீலகிரியில் எடுக்கப்பட்டன. இப்படத்தின் மோஷன் போஸ்டரை கடந்த ஆண்டு சிவகார்த்திகேயன் வெளியிட்டார். 

5.சூர்ப்பனகை

இயக்குநர் கார்த்திக் ராஜு இயக்கத்தில் சூர்ப்பனகை உருவாகியுள்ளது. நடிகை ரெஜினா முக்கிய கதாபாத்திரத்தில் நடித்துள்ளார். நீனே நா என்ற பெயரில் தெலுங்கிலும் இப்படம் வெளியாகவுள்ளது. ராமாயணத்தின் முக்கிய கதாபாத்திரம் சூர்ப்பனகையின் பெயரையே படத்துக்கு படக்குழு வைத்துள்ளது. இப்படமும்வெளியீட்டுக்கு தயாராகி வருவதாக கூறப்படுகிறது. சாம் இப்படத்துக்கு இசை அமைத்துள்ளார்