விஜய் நேர்காணல்: தவெக வேட்பாளர்கள் எதிர்பார்ப்பு! விஜய் எங்கு போட்டியிடுகிறார்? பரபரப்பு தகவல்!
வரும் 10 ஆம் தேதி முதல் தவெக வேட்பாளர்களுக்கான நேர்காணல் நடைபெற உள்ளதாக தகவல்.
நாளை மறுநாள் முதல் தவெக வேட்பாளர்களுக்கான நேர்காணல் நடைபெற உள்ளதாகவும் விஜய் நேர்காணல் செய்ய இருப்பதாகவும் தகவல் வெளியாகியுள்ளது.
தமிழக சட்டமன்றத் தேர்தல் இன்னும் இரண்டு மாதங்களில் நடைபெற உள்ளது. தேர்தல் தேதி சில நாட்களில் அறிவிக்கப்பட வாய்ப்புள்ளது. தேர்தலுக்காக தமிழகத்தின் முன்னணி கட்சிகள் பரபரப்பாக வேலை பார்த்து வருகிறது. கூட்டணி, வேட்புமனுத்தாக்கல், தேர்தல் அறிக்கை என கட்சிகள் வேகம் காட்டுகின்றன.
இந்த நிலையில், தமிழகத்தில் முதல்முறையாக போட்டியிட உள்ள விஜயின் தவெகவின் மீது மக்கள் மத்தியில் அதிக எதிர்பார்ப்பு இருந்து வருகிறது. அந்த கட்சி கடந்த மாதம் தேர்தலில் போட்டியிடுவதற்கான விருப்ப மனுவை விநியோகம் செய்தது. விநியோகம் செய்யத்தொடங்கியபோதே மனுக்கள் தீர்ந்துவிட்டதாகவும் சொல்லப்பட்டது. வேட்புமனுத்தாக்கல் செய்யப்பட்ட பிறகு நேர்காணல் எப்போது தொடங்கும் என கட்சித் தொண்டர்கள் எதிர்பார்த்துக்கொண்டிருந்தனர்.
இந்த நிலையில், வரும் 10 ஆம் தேதி முதல் தவெக வேட்பாளர்களுக்கான நேர்காணல் நடைபெற உள்ளதாக தகவல் வெளியாகியுள்ளது. சென்னை பனையூரில் உள்ள கட்சி அலுவலகத்தில் நேர்காணல் நடைபெற உள்ளது என்றும் உத்தேசமாக தேர்வு செய்யப்பட்டுள்ள வேட்பாளர்களை விஜய் நேர்காணல் செய்ய உள்ளதாகவும் கூறப்படுகிறது.
பெரம்பூரில் விஜய் போட்டி?
பெரம்பூர் தொகுதியில் தவெக தலைவர் விஜய் போட்டியிட வலியுறுத்தி ஏற்கனவே தீர்மானம் நிறைவேற்றப்பட்டிருந்தது. அதன்படி, அவர் அங்கு போட்டியிடுவார் என்று எதிர்பார்க்கலாம். பொதுச்செயலாளர் புஸ்ஸி ஆனந்த் தியாகராய நகரிலும், ஆதவ் அர்ஜுனா வில்லிவாக்கத்திலும், அருண் ராஜ் திருச்செங்கோட்டிலும், மதுரை திருப்பரங்குன்றம் தொகுதியில் கட்சியின் இணைப் பொதுச்செயலாளர் நிர்மல் குமார் போட்டியிட வாய்ப்புள்ளது.
முன்னதாக, நேற்று மாமல்லபுரத்தில் நடைபெற்ற தவெக மகளிர் தினவிழாவில் அக்கட்சியின் தலைவர் விஜய், மகளிருக்கான தேர்தல் வாக்குறுதிகளை அறிவித்தார். பெண்களுக்கு மாதம் ரூ.2500, வ்ருடத்திற்கு 6 கேஸ் சிலிண்டர், திருமணம் ஆக இருக்கும் பெண்களுக்கு ஒரு சவரன் தங்கம் , பட்டுப்புடவை என ஏகப்பட்ட அறிவிப்புகளை வெளியிட்டிருந்தார் என்பது குறிப்பிடத்தக்கது.
தலைப்பு செய்திகள்
ட்ரெண்டிங் செய்திகள்
