TNPSC Group 2 Exam: குரூப் 2, 2ஏ தேர்வு: தவற விடக்கூடாத 15 முக்கியத் தகவல்கள் என்னென்ன?

TNPSC Press Meet Highlights: குரூப் 2, 2ஏ தேர்வு முறை, தேர்வு மையங்கள், கட்டுப்பாடுகள் குறித்து தவற விடக்கூடாத முக்கியத் தகவல்கள் என்னென்ன என்று பார்க்கலாம்.

குரூப் 2, 2ஏ தேர்வு

குரூப் 2, 2ஏ தேர்வு முறை, தேர்வு மையங்கள், கட்டுப்பாடுகள் குறித்து தவற விடக்கூடாத முக்கியத் தகவல்கள் என்னென்ன என்று பார்க்கலாம்.

இதுகுறித்து டிஎன்பிஎஸ்சி தலைவர் பாலச்சந்திரன் செய்தியாளர்களிடம் இன்று கூறியதாவது:

* குரூப் 2, 2ஏ முதல்நிலைத் தேர்வு திட்டமிட்டபடி மே 21ஆம் தேதி நடைபெற உள்ளது. காலை 9.30 மணி முதல் மதியம் 12.30 மணி வரை தேர்வு நடைபெற உள்ளது. 

* இதற்காகத் தேர்வர்கள் 8.30 மணிக்கு வர வேண்டும் என்று ஏற்கெனவே தெரிவிக்கப்பட்டுள்ளது. 8.59 மணி வரை மட்டுமே தேர்வர்கள் தேர்வு மையத்துக்குள் அனுமதிக்கப்படுவார்கள். தேர்வர்கள் 12.45 மணி வரை தேர்வறைக்குள் இருக்க வேண்டும். 

* தமிழகத்தில் 38 மாவட்டங்களிலும் 117 தேர்வு மையங்கள் அமைக்கப்பட்டுள்ளன. தேர்வுக்கு மொத்தம் 11.78 லட்சம் பேர் விண்ணப்பித்துள்ளனர். 

* ஆண் தேர்வர்கள் 4 லட்சத்து 96 ஆயிரத்து 247 பேரும், பெண் தேர்வர்கள் 6 லட்சத்து 81 ஆயிரத்து 89 பேரும்  விண்ணப்பித்துள்ளனர். மூன்றாம் பாலினத்தவர் 48 பேர் விண்ணப்பித்துள்ளனர். 14 ஆயிரத்து 531 மாற்றுத் திறனாளிகளும் விண்ணப்பித்துள்ளனர். 79 ஆயிரத்து 942 பேர் தமிழ் வழியில் பயின்றதாக விண்ணப்பம் செய்துள்ளனர். 

* தேர்வுக்காக 323 பறக்கும் படைகள் அமைக்கப்பட்டுள்ளன. 4,012 தலைமை கண்காணிப்பாளர்கள் நியமிக்கப்பட்டுள்ளனர். 58 ஆயிரத்து 900 கண்காணிப்பாளர்கள் நியமிக்கப்பட்டுள்ளனர். 

* கருவூலத்தில் இருந்து தேர்வு மையங்களுக்கு ஆயுதம் ஏந்தியவாறு பாதுகாப்பு அளிக்கும் குழுக்கள் பாதுகாப்புப் பணியில் ஈடுபட உள்ளன. இவ்வாறு 993 குழுக்கள் செயல்பட உள்ளன. 6,400 ஆய்வுக் குழுக்கள் அமைக்கப்பட்டுள்ளன. 

* பொது ஆங்கிலம் பகுதியில் தேர்வெழுத 2 லட்சத்துக்கு 31 ஆயிரத்து 586 பேர் விண்ணப்பம் செய்துள்ளனர். பொதுத் தமிழ் பகுதியில் தேர்வெழுத 9 லட்சத்துக்கு 46 ஆயிரத்து 589 பேர் விண்ணப்பம் செய்துள்ளனர். 

* முதல்நிலைத் தேர்வை 3 முறை இலவசமாக எழுதலாம். இந்தப் பிரிவின் கீழ், 6 லட்சத்து 93 ஆயிரத்து 361 பேர் இலவசமாகத் தேர்வெழுத விண்ணப்பித்துள்ளனர்.  

* தேர்வு முழுவதும் கொள்குறித் தேர்வு வகையில் நடைபெற உள்ளது. 200 கேள்விகள் கேட்கப்படும். இதில் பொதுத்தமிழ் அல்லது பொது ஆங்கிலத்தில் தலா 100 கேள்விகள் இருக்கும். அவற்றுக்கு 300 மதிப்பெண்கள். 

தேர்வு முடிவுகள்

* ஜூன் மாத இறுதியில் தேர்வு முடிவுகள் வெளியாக உள்ளன. முதன்மைத் தேர்வை 2022 செப்டம்பர் மாதத்தில் நடத்தத் திட்டமிடப்பட்டுள்ளது. 

காலி இடங்கள் 

* அறிவிப்பாணை வெளியிட்டபோது குரூப் 2, 2ஏ தேர்வுகளுக்கான காலிப் பணியிடங்களாக மொத்தம் 116 நேர்காணல் கொண்ட பதவிகளுக்கும், நேர்காணல் இல்லாத 5,413 பதவிகளுக்கும் தேர்வு நடைபெறும் என்று அறிவிக்கப்பட்டது. இதில் சிறிய அளவில் மாற்றங்கள் இருக்கலாம். 

* 1 பணியிடத்துக்கு 10 பேர் என்ற வீதத்தில் முதன்மைத் தேர்வுக்குத் தேர்வர்கள் தேர்ந்தெடுக்கப்படுவர். அதாவது சுமார் 550 காலிப் பணியிடங்களுக்கு, 5,500 பேர் முதன்மைத் தேர்வுக்கு அனுப்பப்படுவர். 

* ஒரே மதிப்பெண்ணை நிறையப் பேர் பெற்றுள்ள சூழல் உள்ளிட்ட சில நேரங்களில் மட்டும் 1:12 என்ற வீதத்தில் தேர்வர்களை அனுமதிப்போம்.

தேர்வர்கள் எங்கு அதிகம்; எங்கு குறைவு?

* சென்னையில் அதிகபட்சமாக 7 மையங்களில் 1,15,843 பேர் தேர்வு எழுத உள்ளனர். குறைந்தபட்சமாக நீலகிரி மாவட்டத்தில் 3 மையங்களில் 5 ஆயிரத்து 624 பேர் தேர்வு எழுத உள்ளனர். 

* அதேபோல மதுரையில் 64 ஆயிரத்து 82 பேரும், சேலத்தில் 63 ஆயிரத்து 437 பேரும் திருச்சியில் 50 ஆயிரத்து 19 பேரும் கோவையில் 48 ஆயிரத்து 39 பேரும் தேர்வு எழுதுகின்றனர். நாகப்பட்டினத்தில் 8 ஆயிரத்து 598 பேரும் மயிலாடுதுறையில் 11 ஆயிரத்து 561 பேரும் தேர்வு எழுத உள்ளனர்.

இவ்வாறு டிஎன்பிஎஸ்சி தலைவர் பாலச்சந்திரன் தெரிவித்துள்ளார்.