TNPSC Group 2 Result: அடி தூள்.. 57 நாட்களில் வெளியான டிஎன்பிஎஸ்சி குரூப் 2 தேர்வு முடிவுகள்- காண்பது எப்படி?

TNPSC Group 2 2A Result 2024: செப்டம்பர் மாதம் நடைபெற்ற குரூப் 2, 2 ஏ முதல்நிலைத் தேர்வு முடிவுகளை டிஎன்பிஎஸ்சி இன்று (டிச.12) வெளியிட்டுள்ளது.

டிஎன்பிஎஸ்சி

Source : சிறப்பு ஏற்பாடு

டிஎன்பிஎஸ்சி குரூப் 2, 2 ஏ முதல்நிலைத் தேர்வு முடிவுகள் இன்று (டிச.12) வெளியிடப்பட்டுள்ளன. தேர்வுகள் நடத்தப்பட்டு, 57 நாட்களிலேயே தேர்வு முடிவுகள் வெளியிடப்பட்டுள்ளன. 

தேர்வர்கள், https://tnpscresults.tn.gov.in/ அல்லது https://www.tnpsc.gov.in/ என்ற இணைப்பை க்ளிக் செய்து தேர்வு முடிவுகளைக் காணலாம். 

செப்டம்பர் 14ஆம் தேதி நடந்த தேர்வு

குரூப் 2 தேர்வு மூலம் சுமார் 61 வகையான பணியிடங்கள் நிரப்பப்படுகின்றன. குறிப்பாக, தமிழ்நாடு தொழிலாளர் சேவை துறையில் உள்ள உதவி ஆய்வாளர் தொடங்கி, கீழ் நிலை கிளர்க் வரை மொத்தம் 48 பிரிவுகளில் உள்ள பணியிடங்கள் குரூப் 2, 2ஏ தேர்வு மூலம் நிரப்பப்பட உள்ளன. இந்த நிலையில் ஆகஸ்ட் மாதம் வெளியான அறிவிப்பில், 2,327 காலி பணி இடங்கள் நிரப்பப்படும் என்று அறிவிக்கப்பட்டது.

இந்த நிலையில் குரூப் 2, 2ஏ முதல்நிலைத் தேர்வு கடந்த செப்டம்பர் 14ஆம் தேதி நடந்தது.  இந்த தேர்வுகளுக்கு 7 லட்சத்து 93 ஆயிரத்து 966 பேர் விண்ணப்பித்த நிலையில், சுமார் 2.50 லட்சம் பேர் தேர்வை எழுதவில்லை என்று கூறப்படுகிறது.

காலியிடங்களின் எண்ணிக்கை 2,540 ஆக அதிகரிப்பு

தொடர்ந்து காலி இடங்களின் எண்ணிக்கை நவம்பர் மாதம் அதிகரிக்கப்பட்டது. திருத்தப்பட்ட பணிகளின் அடிப்படையில் வனத்துறையில் வனவர் பணி இடங்கள் 121 ஆகவும், குற்ற விசாரணைத் துறையில் 22 பணி இடங்கள் ஆகவும், லஞ்ச ஒழிப்புத்துறையில் 3 ஆகவும், தொழிலாளர் துறையில் 16 ஆகவும், சட்டத் துறையில் 6 ஆகவும் உயர்த்தி அறிவிக்கப்பட்டது.

மொத்தமாக குரூப் 2 தேர்வுக்கு 213 பணியிடங்கள் அதிகரிக்கப்பட்டதால், மொத்த காலியிடங்கள் 2,327-ல் இருந்து 2 ஆயிரத்து 540 ஆக உயர்ந்தது. இந்த நிலையில், தேர்வு முடிவுகள் தற்போது அறிவிக்கப்பட்டுள்ளன. 

தேர்வு முடிவுகளைக் காண்பது எப்படி?

1. தேர்வர்கள், https://tnpscresults.tn.gov.in/ அல்லது https://www.tnpsc.gov.in/ என்ற இணைப்பை க்ளிக் செய்ய வேண்டும்.
2. அதில், குரூப் 2 முதல்நிலைத் தேர்வு முடிவுகள் மற்றும் குரூப் 2ஏ முதல்நிலைத் தேர்வு முடிவுகள் ஆகிய இரண்டு இணைப்புகள் தோன்றும்.
3. அதை க்ளிக் செய்து, தனித்தனியாகத் தேர்வு முடிவுகளைக் காணலாம். 

முதல்நிலைத் தேர்வில் தேர்ச்சி பெற்றோர், டிசம்பர் 18ஆம் தேதிக்குள் முதன்மைத் தேர்வுக் கட்டணமான ரூ.150 தொகையை இணையம் மூலம் செலுத்த வேண்டும் என்றும் டிஎன்பிஎஸ்சி தெரிவித்துள்ளது.

கூடுதல் தகவல்களுக்கு: https://www.tnpsc.gov.in/