Tancet 2025: தொடங்கிய விண்ணப்பப் பதிவு; டான்செட் தேர்வு கட்டணம், தகுதி, விண்ணப்ப வழிமுறைகள் இதோ!

2025ஆம் ஆண்டுக்கான டான்செட் தேர்வுகளுக்கு விண்ணப்பிக்கலாம் என்று அண்ணா பல்கலைக்கழகம் அழைப்பு விடுத்து இருந்த நிலையில், விண்ணப்பப் பதிவு இன்று (ஜனவரி 24) தொடங்கியுள்ளது.

மாணவர்கள் | கோப்புப்படம்

Source : சிறப்பு ஏற்பாடு

தமிழ்நாட்டில் எம்பிஏ, எம்சிஏ ஆகிய முதுகலைப் படிப்புகளில் சேர நடத்தப்படும் டான்செட் நுழைவுத் தேர்வுக்கு விண்ணப்பப் பதிவு இன்று தொடங்கியுள்ளது. அதேபோல முதுகலை பொறியியல் படிப்புகளில் சேர நடத்தப்படும் சீட்டா தேர்வுக்கும் விண்ணப்பிக்கலாம் எனவும் அண்ணா பல்கலைக்கழகம் அழைப்பு விடுத்துள்ளது. 

இந்தத் தேர்வின் மூலம்தான், தமிழ்நாட்டில் உள்ள பிற பல்கலைக்கழகங்கள், அண்ணா பல்கலைக்கழக உறுப்புக் கல்லூரிகள், அரசு மற்றும் அரசு உதவி பெறும் பொறியியல், கலை மற்றும் அறிவியல் கல்லூரிகள் மற்றும் தனியார் கல்லூரிகளில் எம்பிஏ, எம்சிஏ படிப்புகளுக்கான மாணவர் சேர்க்கை நடைபெற்று வருகிறது.

2025ஆம் ஆண்டுக்கான டான்செட் தேர்வுகளுக்கு விண்ணப்பிக்கலாம் என்று அண்ணா பல்கலைக்கழகம் அழைப்பு விடுத்து இருந்த நிலையில், விண்ணப்பப் பதிவு இன்று (ஜனவரி 24) தொடங்கியுள்ளது. தேர்வர்கள் பிப்ரவரி 21 வரை விண்ணப்பிக்கலாம்.

விண்ணப்பிப்பது எப்படி?

தேர்வர்கள் www.tancet.annauniv.edu என்ற இணையதள முகவரியில் விண்ணப்பிக்க வேண்டும்.

அல்லது நேரடியாக https://tancet.annauniv.edu/tancet/Procedure%20for%20Online%20Registration%202025.pdf என்ற இணைப்பை க்ளிக் செய்யலாம்.

தேர்வர்கள், இணைப்பில் கேட்கப்பட்டு இருக்கும் விவரங்களை முறையாகப் பூர்த்தி செய்ய வேண்டும்.

குறிப்பாகப் புகைப்படம், கையெழுத்து ஆகியவற்றை சரியாகப் பதிவேற்ற வேண்டும்.

விண்ணப்பக் கட்டணம் எவ்வளவு?

டான்செட் தேர்வுக்கு ரூ.1000 கட்டணமாக நிர்ணயிக்கப்பட்டு உள்ளது. சீட்டா தேர்வுக்கும் அதே கட்டணம்தான். எனினும் எஸ்சி/ எஸ்டி பிரிவினருக்கு ரூ.500 கட்டணம் செலுத்தினால் போதும் என்று தெரிவிக்கப்பட்டுள்ளது.

தேர்வில் தேர்ச்சி பெற்ற பிறகு அதில் வரும் மதிப்பெண்களின் அடிப்படையில் கலந்தாய்வு நடைபெறும். அந்த கலந்தாய்வு மூலமாக மாணவர்கள் தங்களுக்கு விருப்பமான கல்லூரிகளை தேர்வு செய்யலாம்.

தேர்வு தேதிகள்

எம்சிஏ படிப்புக்கான டான்செட் தேர்வு மார்ச் 22ஆம் தேதி காலை நடைபெற உள்ள நிலையில், எம்பிஏ படிப்புக்கு மார்ச் 22ஆம் தேதி மதியம் தேர்வு நடைபெற உள்ளது. சீட்டா தேர்வு மார்ச் 23ஆம் தேதி காலை 10 மணி முதல் 12 மணி வரை நடைபெற உள்ளது. மாநிலம் முழுவதும் 15 மாவட்டங்களில் தேர்வு மையங்கள் அமைக்கப்பட உள்ளன.

தொலைபேசி எண்கள்: 044 – 22358314 / 22358289 

இ- மெயில் முகவரி: tanceeta@gmail.com