CUET 2023 NTA: மே, ஜூனில் க்யூட் நுழைவுத் தேர்வு; 2023 முக்கியத் தேர்வுகளின் அட்டவணையை வெளியிட்ட என்டிஏ

2023- 24ஆம் ஆண்டுக்கான தேர்வுக்கால அட்டவணையை என்டிஏ வெளியிட்டுள்ள நிலையில், கலை அறிவியல் படிப்புகளுக்கான பொது நுழைவுத் தேர்வு மே மற்றும் ஜூன் மாதங்களில் நடைபெற உள்ளது. 

மாதிரிப்படம்

2023- 24ஆம் ஆண்டுக்கான தேர்வுக்கால அட்டவணையை என்டிஏ வெளியிட்டுள்ள நிலையில், கலை அறிவியல் படிப்புகளுக்கான பொது நுழைவுத் தேர்வு மே மற்றும் ஜூன் மாதங்களில் நடைபெற உள்ளது. 

மத்தியப் பல்கலைக்கழகங்கள் மற்றும் அதன்கீழ் இயங்கி வரும் கல்வி நிலையங்களில் இளங்கலை கல்லூரி படிப்புகளுக்கான பொது நுழைவுத் தேர்வு 2022-23ஆம் கல்வி ஆண்டு முதல் கட்டாயம் ஆக்கப்பட்டுள்ளது. என்சிஇஆர்டி 12ஆம் வகுப்புப் பாடத்திட்டத்தின் அடிப்படையில் நடத்தப்படும். இதற்கான அறிவிப்பு அண்மையில் யுஜிசி சார்பில் வெளியானது.  ஜூலை முதல் வாரத்தில் தேர்வு நடைபெறும். 

இந்தத் தேர்வை எழுதவோ, மாணவர் சேர்க்கைக்கோ 12ஆம் வகுப்பு மதிப்பெண்கள் கருத்தில் கொள்ளப்படாது. கணினி வழியில் 3 மணி நேரம் 50 நிமிடங்களுக்கு தேர்வு நடைபெறும். தமிழ், ஆங்கிலம் உள்ளிட்ட13 மொழிகளில் இந்தத் தேர்வை தேசியத் தேர்வுகள் முகமை நடத்த உள்ளது. 

தேர்வுக்கால அட்டவணை

இந்நிலையில் 2023- 24ஆம் ஆண்டுக்கான தேர்வுக்கால அட்டவணையை என்டிஏ வெளியிட்டுள்ளது. இதில், மருத்துவ நுழைவுத் தேர்வான நீட், பொறியியல் நுழைவுத் தேர்வான ஜேஇஇ உள்ளிட்ட தேர்வுகளோடு கலை அறிவியல் படிப்புகளுக்கான பொது நுழைவுத் தேர்வான க்யூட் தேர்வு நடைபெறும் தேதிகள் அறிவிக்கப்பட்டுள்ளன. 

இதன்படி க்யூட் தேர்வு மே மற்றும் ஜூன் மாதங்களில் நடைபெற உள்ளது. குறிப்பாக மே 21 முதல் 31ஆம் தேதி வரையிலும் ஜூன் 1ஆம் தேதி முதல் ஜூன் 7 வரையிலும் இந்தத் தேர்வுகள் நடைபெற உள்ளன. 

எனினும் விண்ணப்பப் பதிவு எப்போது என்ற தகவல் இதுவரை வெளியாகவில்லை. விண்ணப்பப் படிவம் வெளியான உடன், தகுதியான தேர்வர்கள் nta.ac.in என்ற இணையதளத்தில் விண்ணப்பிக்க வேண்டும். 

அதேபோல 2023ஆம் ஆண்டுக்கான இளநிலை நீட் தேர்வு மே 7ஆம் தேதி நடைபெற உள்ளதாக தேசியத் தேர்வுகள் முகமை அறிவித்துள்ளது. ஜேஇஇ மெயின் தேர்வு ஜனவரி 24, 25, 27, 28, 29,30,31 ஆகிய தேதிகளில் நடைபெற உள்ளது. இதற்கு ஜனவரி 12 வரை விண்ணப்பிக்கலாம் என தேசிய தேர்வு முகமை தெரிவித்துள்ளது.

கூடுதல் விவரங்களுக்கு: nta.ac.in

க்யூட் தேர்வு: 3 பிரிவுகளாகக் கேள்விகள்

பொது நுழைவுத் தேர்வு கேள்விகள் 3 பிரிவுகளாகக் கேட்கப்படும் என்று தெரிவிக்கப்பட்டுள்ளது. முதல் பிரிவில் இரண்டு பகுதிகள் இருக்கும். முதல் பகுதி கட்டாய மொழித் தேர்வாக இருக்கும். தமிழ், இந்தி, மராத்தி, குஜராத்தி, தெலுங்கு, கன்னடம், மலையாளம், உருது, அசாமி, பெங்காலி, பஞ்சாபி, ஒடியா மற்றும் ஆங்கிலம் ஆகிய 13 மொழிகளில் ஏதேனும் ஒன்றில் இருந்து கேள்விகள் கேட்கப்படும். மொழி சார்ந்து வாசிப்புத் திறன், சொல்லகராதி சார்ந்த கேள்விகள், அருஞ்சொல், எதிர்ச்சொல்கள் உள்ளிட்டவை சோதிக்கப்படும். 

இரண்டாவது பகுதியில் கூடுதலாக விருப்ப மொழித் தேர்வையும் தேர்வர்கள் எழுதலாம். ஃப்ரெஞ்ச், ஸ்பானிஷ், ஜெர்மனி, நேபாளி, பெர்ஷியன், இத்தாலியன், அரபி, சிந்தி, காஷ்மீரி, கொங்கணி, போடோ, டோக்ரி, மைதிலி, மணிப்புரி, சந்தலி, திபெத்தியன், ஜப்பான், ரஷ்யன், சீனம் ஆகிய 19 மொழிகளில் இந்தத் தேர்வை எழுதலாம். 

2ஆவது பிரிவில் தேர்வர்களின் துறை சார் அறிவு சோதிக்கப்படும். மொத்தமுள்ள 27 துறைகளில் இருந்து தேர்வர்கள் தங்களுக்குப் பிடித்தமான, தேவையான துறையைத் தேர்ந்தெடுத்துக் கொள்ளலாம். அதிகபட்சமாக ஒரு தேர்வர் 6 துறைகள் வரை தேர்வு செய்ய முடியும். பல்கலைக்கழகங்களும் துறைசார் தேர்வுகளை நடத்த முடிவு செய்யலாம்.

3ஆவது பிரிவில், பொதுவான கேள்விகள் கேட்கப்படும். பொது அறிவு, நடப்பு நிகழ்வுகள், மனத் திறன், கணக்குத் திறன், தர்க்க மற்றும் பகுத்தறியும் திறன் சார்ந்த கேள்விகள் இந்தப் பிரிவில் கேட்கப்படும்.