KV Admission 2026: தேர்வோ, நேர்காணலோ இல்லை- தொடங்கிய கேந்திரிய வித்யாலயா அட்மிஷன்; விண்ணப்பிப்பது எப்படி?

KV Admission 2026-27: 2026- 27ஆம் ஆண்டுக்கான கேந்திரிய வித்யாலயா பால்வாடி மாணவர் சேர்க்கை இன்று (மார்ச் 20) காலை தொடங்கியுள்ளது. 

கேந்திரிய வித்யாலயா சேர்க்கை

இதற்கான மாணவர் சேர்க்கை குலுக்கல் முறையில் நடக்கும் நிலையில்,  ஆன்லைன் பதிவு தொடங்கியுள்ளது. இதற்கு முழுமையான தகுதி விவரங்கள் குறித்துக் காணலாம்.

2026- 27ஆம் கல்வியாண்டிற்கான கேந்திரிய வித்யாலயா பால்வாடி மற்றும் 1-ஆம் வகுப்பு மாணவர் சேர்க்கை குறித்த முக்கிய அறிவிப்பை கேந்திரிய வித்யாலயா அமைப்பு (KVS) வெளியிட்டுள்ளது. இதற்கான ஆன்லைன் பதிவு இன்று (மார்ச் 20ஆம் தேதி) தொடங்கி உள்ளது.

மாணவர் சேர்க்கைக்கு எவ்வித நுழைவுத் தேர்வோ, எழுத்துத் தேர்வோ, நேர்காணலோ கிடையாது. முற்றிலும் குலுக்கல் முறையில் தகுதியானவர்கள் தேர்ந்தெடுக்கப்படுவார்கள் என்று கேந்திரிய வித்யாலயா சங்கதன் தெரிவித்துள்ளது.

ஆர்வமுள்ள பெற்றோர்கள் https://kvsangathan.nic.in/ என்ற அதிகாரப்பூர்வ இணையதளம் மூலம் விண்ணப்பிக்கலாம்.

குலுக்கல் முறைத் தேர்வு

பால்வாடி மற்றும் 1-ஆம் வகுப்பு மாணவர் சேர்க்கைக்குக் குழந்தைகளுக்கு எவ்விதத் தேர்வும் நடத்தப்படாது. சேர்க்கை முழுவதும் வெளிப்படையாக, குலுக்கல் முறையில் மட்டுமே நடைபெறும். தேர்ந்தெடுக்கப்பட்ட மாணவர்களின் பட்டியல் வெளியானதும், பெற்றோர் உரிய ஆவணங்களைச் சமர்ப்பித்து, சேர்க்கைக்கான கட்டணத்தைச் செலுத்தி தங்கள் குழந்தைகளின் இடங்களை உறுதி செய்து கொள்ள வேண்டும்.

வயது வரம்பு

புதிய தேசிய கல்விக் கொள்கை விதிகளின்படி, மார்ச் 31, 2026 அன்றுள்ளபடி மாணவர்களுக்கான வயது வரம்பு பின்வருமாறு நிர்ணயிக்கப்பட்டுள்ளது.

• பால்வாடி -1 (Balvatika 1): 3 வயதுபூர்த்தியடைந்திருக்கவேண்டும் (4 வயதுக்குள்இருக்கவேண்டும்) 
• பால்வாடி-2 (Balvatika 2): 4 வயது பூர்த்தியடைந்திருக்க வேண்டும் (5 வயதுக்குள் இருக்க வேண்டும்)
• பால்வாடி-3 (Balvatika 3): 5 வயது பூர்த்தியடைந்திருக்க வேண்டும் (6 வயதுக்குள் இருக்க வேண்டும்)
• 1-ஆம் வகுப்பு: 6 முதல் 8 வயதுக்குள் இருக்க வேண்டும்

என்னென்ன ஆவணங்கள் தேவை?

விண்ணப்பிக்கும் பெற்றோர்கள் கீழ்க்காணும் ஆவணங்களை தயாராக வைத்திருக்க வேண்டியது முக்கியம்.

• குழந்தையின்பிறப்புச்சான்றிதழ்
• பாஸ்போர்ட் அளவிலான புகைப்படம்
• இருப்பிடச் சான்று
• சாதிச் சான்றிதழ்
• பொருளாதாரத்தில் பின்தங்கியவர்களுக்கான EWS அல்லது BPL சான்றிதழ்
• அரசு ஊழியராக இருப்பின் பெற்றோரின் பணிச் சான்றிதழ் அல்லது பணியிட மாறுதல் சான்றிதழ்

ஆன்லைனில் விண்ணப்பிப்பது எப்படி?

1. முதலில் kvs.gov.in அல்லது kvsangathan.nic.in என்ற அதிகாரப்பூர்வ இணையதளத்திற்குச் செல்லவும்.
2. முகப்புப் பக்கத்தில் உள்ள "Balvatika & Class 1 Admission 2026-27" என்ற இணைப்பைக் கிளிக் செய்யவும்.
3. உங்களுடைய மொபைல் எண் மற்றும் மின்னஞ்சல் முகவரியைக் கொண்டு பதிவு செய்து உள்நுழையவும்.
4. விண்ணப்பப் படிவத்தில் குழந்தையின் தகவல்களைப் பிழையின்றி நிரப்பி, தேவையான ஆவணங்களை ஸ்கேன் செய்து பதிவேற்றவும்.
5. இறுதியாக விண்ணப்பத்தைச் சமர்ப்பித்து, எதிர்காலத் தேவைக்காக அதனை ஒரு பிரிண்ட் அவுட் எடுத்து வைத்துக் கொள்ளவும்.

குலுக்கல் முறை நிறைவடைந்த பிறகு, தற்காலிகத் தேர்வுப் பட்டியல் அதிகாரப்பூர்வ இணையதளத்தில் வெளியிடப்படும் என்பது குறிப்பிடத்தக்கது.

பிற விவரங்களுக்கு: kvsangathan.nic.in