Anna University Graduation: அண்ணா பல்கலைக்கழக பட்டமளிப்பு விழா: இன்று முதல் விண்ணப்பிக்கலாம்!

இதற்கான முன்பதிவு ஜூலை 20ஆம் தேதி மாலை 5 மணிக்குத் தொடங்குகிறது. விண்ணப்பிக்க 23ஆம் தேதி மதியம் 12 மணி வரை அவகாசம் வழங்கப்பட்டுள்ளது.

அண்ணா பல்கலைக்கழகம்

அண்ணா பல்கலைக்கழகத்தின் 42ஆவது பட்டமளிப்பு விழா ஜூலை 29ஆம் தேதி நடைபெற உள்ளது. பிரதமர் நரேந்திர மோடி பங்கேற்று பட்டங்களை வழங்க உள்ள நிலையில், இதற்கு ஆன்லைனில் விண்ணப்பப் பதிவு செய்ய அண்ணா பல்கலைக்கழக ஆராய்ச்சி மையம் அழைப்பு விடுத்துள்ளது.

ஆசியாவிலேயே பழமையான கல்வி நிறுவனம் அண்ணா பல்கலைக்கழகம். சென்னை கிண்டியில் செயல்பட்டுவரும் அண்ணா பல்கலைக்கழகப் பொறியியல் கல்லூரி (சிஇஜி) கடந்த 1794-ஆம் ஆண்டு நிறுவப்பட்டது. இங்கு பொறியியல், தொழில்நுட்பம் மற்றும் அவை தொடர்புடைய அறிவியல் துறைகளில் உயர் கல்வி பட்டப்படிப்புகள் வழங்கப்பட்டு வருகின்றன. அத்துடன் அண்ணா பல்கலைக்கழகம் ஆராய்ச்சிப் பணிகளையும் மேற்கொண்டு வருகிறது.

பொறியியல் படிப்பிற்கு முக்கியமான பல்கலைக்கழகமான இதன் கீழ் வரும் அரசு மற்றும் தனியார் பொறியியல் கல்லூரிகளில் சுமார் 7.5 லட்சம் மாணவர்கள் பொறியியல் படிப்புகளைப் படித்து வருகின்றனர்.

கொரோனா பெருந்தொற்று காரணமாகக் கடந்த 2 ஆண்டுகளாக பள்ளி, கல்லூரி உள்ளிட்ட கல்வி நிறுவனங்களில் கற்பித்தல் பாதிக்கப்பட்டது. ஆன்லைன் மூலம் கற்பித்தல் பணிகள் நடத்தப்பட்ட நிலையில், தற்போது நிலை சீராகி வருகிறது. 

எனினும் நீண்ட காலமாக 2021ஆம் ஆண்டுக்கான பட்டமளிப்பு விழா நடைபெறாமல் இருந்தது. பிற பல்கலைக்கழக பட்டமளிப்பு விழாக்களில், ஆளுநர் - உயர் கல்வித்துறை அமைச்சர் மோதலும் பேசுபொருளாக மாறியது. ஆளுநர் ஆர்.என்.ரவி தேதி கொடுத்த பின்னர், அண்ணா பல்கலைக்கழகத்தின் பட்டமளிப்பு விழா நடைபெறும் என்று உயர் கல்வித்துறை அமைச்சர் பொன்முடி தெரிவித்திருந்தார். 

பிரதமர் தமிழகம் வருகை

இதற்கிடையே தமிழகத்தில் நடைபெற உள்ள செஸ் ஒலிம்பியாட் போட்டியைப் பிரதமர் மோடி வரும் ஜூலை 28ஆம் தேதி தொடங்கி வைக்க உள்ளார். அதனைத் தொடர்ந்து, ஜூலை 29ஆம் தேதி அண்ணா பல்கலைக்கழகத்தின் 42ஆவது பட்டமளிப்பு விழா, சென்னையில் நடைபெற உள்ளது. இதில், பிரதமர் நரேந்திர மோடி பங்கேற்று பட்டங்களை வழங்க உள்ளார். 

இந்த பட்டமளிப்பு விழாவில் தமிழ்நாடு ஆளுநரும் அண்ணா பல்கலைக்கழகத்தின் வேந்தருமான ஆர்.என்.ரவி, முதலமைச்சர் மு.க.ஸ்டாலின், உயர் கல்வித்துறை அமைச்சரும் அண்ணா பல்கலைக்கழக இணை வேந்தருமான பொன்முடி, துணை வேந்தர் வேல்ராஜ் உள்ளிட்டோர் கலந்துகொள்ள உள்ளனர்.

இந்நிலையில் இதற்கு விண்ணப்பிக்க, அண்ணா பல்கலைக்கழக ஆராய்ச்சி மையம் அழைப்பு விடுத்துள்ளது. இதுகுறித்து வெளியிட்டுள்ள தகவல் குறிப்பில், வைவா தேர்வை முடித்த ஆராய்ச்சி மாணவர்கள் பட்டம் பெறத் தகுதியானவர்கள். அத்தகைய மாணவர்கள் தங்களுக்கு வழங்கப்பட்டுள்ள லாகினில் சென்று, ஆன்லைனில் முன்பதிவு செய்து கொள்ளலாம்.

இதற்கான முன்பதிவு ஜூலை 20ஆம் தேதி மாலை 5 மணிக்குத் தொடங்குகிறது. விண்ணப்பிக்க 23ஆம் தேதி மதியம் 12 மணி வரை அவகாசம் வழங்கப்பட்டுள்ளது. மாணவர்கள் தங்களுக்கான அனுமதிச் சீட்டை ஜூலை 26ஆம் தேதி முதல் பதிவிறக்கம் செய்துகொள்ளலாம் என்று தெரிவிக்கப்பட்டுள்ளது. 

இதையும் வாசிக்கலாம்: ITI Admission: ஐடிஐ படிப்புகளுக்கு விண்ணப்பிக்க இன்றே கடைசி: எப்படி?- முழு விவரம்

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடியூபில் வீடியோக்களை காண