திருவாரூரில் டிராக்டர் மோதி கல்லூரி மாணவி உயிரிழப்பு
ஊட்டியாணி என்கிற இடத்தில் செங்கல் ஏற்றி வந்த டிராக்டர் இவர்கள் வந்த இரு சக்கர வாகனத்தின் மீது மோதி விபத்துக்குள்ளானதில் சுபா என்கிற கல்லூரி மாணவி சம்பவ இடத்திலேயே உடல் நசுங்கி உயிரிழந்தார்
திருவாரூர் மாவட்டம் இளமங்கலம் கிராமத்தை சேர்ந்த முருகேசன் என்பவரின் மகள் சுபா. இவர் திருவாரூரில் உள்ள திருவிக அரசு கலைக் கல்லூரியில் மூன்றாம் ஆண்டு இதழியல் பட்டப்படிப்பு படித்து வருகிறார். இதேபோன்று வடவேற்குடி கிராமத்தைச் சேர்ந்த தெட்சிணமூர்த்தி என்பவரின் மகள் ஜெனித்தா, இவர் திருவிக அரசு கலைக் கல்லூரியில் விலங்கியல் துறை பட்டப்படிப்பு படித்து வருகிறார். தோழிகளான சுதாவும் ஜெனிதாவும் இருசக்கர வாகனத்தில் தனது வீட்டில் இருந்து கல்லூரிக்கு சென்று கொண்டிருந்தனர். அப்போது ஊட்டியாணி என்கிற இடத்தில் செங்கல் ஏற்றி வந்த டிராக்டர் இவர்கள் வந்த இரு சக்கர வாகனத்தின் மீது மோதி விபத்துக்குள்ளானது இதில் இருசக்கர வாகனத்தை ஓட்டி வந்த சுபா என்கிற கல்லூரி மாணவி சம்பவ இடத்திலேயே உடல் நசுங்கி உயிரிழந்தார்.
மேலும் மற்றொரு மாணவியான ஜெனிதாவை மீட்டு அருகில் இருந்த பொதுமக்கள் திருவாரூர் அரசு மருத்துவக்கல்லூரி மருத்துவமனையில் அனுமதித்தனர். அங்கு மருத்துவர்கள் அவருக்கு தீவிர சிகிச்சை அளித்து வருகின்றனர். இந்த விபத்து சம்பவம் தெரிந்தவுடன் கல்லூரி மாணவர்கள் ஏராளமானோர் மருத்துவமனைக்குள் குவிய தொடங்கினர் அதனையடுத்து திருவாரூர் திருவிக அரசு கலைக் கல்லூரி நிர்வாகம் கல்லூரிக்கு இன்று விடுமுறை அறிவித்து உத்தரவிட்டது. இந்த நிலையில் இந்த விபத்தை ஏற்படுத்திய டிராக்டர் ஓட்டுநர் பாலாக்குறிச்சி கிராமத்தைச் சேர்ந்த செல்வராஜ் என்பவர் தப்பி ஓடிய நிலையில் வடபாதிமங்கலம் காவல்துறையினர் இந்த விபத்து சம்பவம் தொடர்பாக வழக்குப்பதிவு செய்து தீவிர விசாரணை மேற்கொண்டு வருகின்றனர்.
மேலும் டிராக்டரின் உரிமையாளர் பிரபாகர் என்பவரை கைது செய்து காவல் துறையினர் தீவிர விசாரணை மேற்கொண்டு வருகின்றனர். டிராக்டரில் அளவுக்கு அதிகமான செங்கல் ஏற்றி வந்ததன் காரணமாகவே இந்த விபத்து ஏற்பட்டிருக்கலாம் என்ற கோணத்திலும் காவல்துறையினர் தங்களது விசாரணையை தீவிரப்படுத்தி உள்ளனர். கல்லூரி மாணவி விபத்தில் உயிரிழந்த சம்பவம் சக மாணவ மாணவிகளிடையே மிகுந்த சோகத்தை ஏற்படுத்தி உள்ளது.
தலைப்பு செய்திகள்
ட்ரெண்டிங் செய்திகள்
