துக்க நிகழ்வுக்கு சென்று வந்த ஆசிரியர் வீட்டில் 48 சவரன் நகை கொள்ளை; சிக்கிய திருடர்கள்! நடந்தது என்ன?

சீர்காழி அருகே அரசு பள்ளி ஆசிரியை வீட்டில் நகைகளை திருடிய இருவரை கைது செய்த போலீசார் அவர்களிடம் இருந்து 18 சவரன் நகைகளை பறிமுதல் செய்துள்ளனர்.

கொள்ளை நகை பறிமுதல்

Source : Other

சீர்காழி அருகே அரசு பள்ளி ஆசிரியை வீட்டில் நகைகளை திருடிய இருவரை கைது செய்த போலீசார் அவர்களிடம் இருந்து 18 சவரன் நகைகளை பறிமுதல் செய்து, மீதம் உள்ள கொள்ளையர்களை தேடிவருகின்றனர்.

ஆசிரியை வீட்டில் கொள்ளை

மயிலாடுதுறை மாவட்டம் சீர்காழி அருகே சட்டநாதபுரம் கிராமத்தில் உள்ள கம்பன் நகரில் வசித்து வருபவர் 53 வயதான லட்சுமி. இவர் சேந்தங்குடியில் அரசு நடுநிலைப் பள்ளியில் ஆசிரியராக பணியாற்றி வருகிறார். இந்நிலையில் தனது உறவினர் வீட்டின் துக்க காரியத்திற்காக கடந்த 2023 -ஆம் ஆண்டு நவம்பர் 5 -ம் தேதி சென்றுள்ளார். அப்படியே துக்க நிகழ்வுகள் முடித்து நாதல்படுகையில் உள்ள தனது தம்பி வீட்டிற்கு சென்றுள்ளார். அங்கிருந்து மறுநாள் 6-ம் தேதி பள்ளிக்கு பணிக்கு சென்று வேலை முடிந்து மாலை வீட்டிற்கு திரும்பி வந்துள்ளார். அப்போது வீட்டிற்கு வந்த அவர்  வீட்டின் முன்பக்க கிரில் கதவு பூட்டு உடைக்கப்பட்டு, உள்ளே அறையில் இருந்த இரண்டு பீரோவை உடைத்து அதில் இருந்த 48 சவரன்  நகை மற்றும் ஒரு லட்சம் மதிப்பிலான வெள்ளி பொருட்கள் திருட்டு போனதை கண்டு லெட்சுமி அதிர்ச்சி அடைந்தார்.

காவல் நிலையத்தில் ஆசிரியர் புகார்

இது குறித்து சீர்காழி காவல் நிலையத்தில் ஆசிரியர் லட்சுமி புகார் அளித்தார். அந்த புகாரின் பெயரில் சீர்காழி காவல்துறையினர் விசாரணை மேற்கொண்டுள்ளனர். மேலும் கைரேகை நிபுணர்கள் வரவழைக்கப்பட்டு கைரேகை பதிவு செய்யப்பட்டு குற்றவாளிகளை காவல்துறையினர் தீவிரமாக தேடி வந்தனர். மேலும் இதுகுறித்து சீர்காழி போலீசார் வழக்கு பதிந்து விசாரணை நடத்தி வந்த நிலையில், உதவி காவல் ஆய்வாளர் மணிகண்ட கணேஷ் தலைமையிலான தனிப்படை போலீசார் அப்பகுதியில் உள்ள சிசிடிவி கேமரா பதிவுகளை கைப்பற்றி தீவிர விசாரணை நடத்தினர். 

இருவர் கைது

இதன் அடிப்படையில் கரூரை சேர்ந்த 26 வயதான மனோஜ் குமார் என்பவரை கைது செய்த தனிப்படை போலீசார் அவரிடம் இருந்த 13 சவரன் தங்க நகைகளை கைப்பற்றினர். தொடர்ந்து போலீசார் மனோஜ் குமாரை நீதிமன்றத்தில் ஆஜர் படுத்திய பின்னர் சிறையில் அடைத்தனர். முன்னதாக கடந்த மே மாதம் 14 -ஆம் தேதி இவ்வழக்கில் தொடர்புடைய சென்னை திருவேற்காட்டைச் சேர்ந்த 24 வயதான சதீஷ் என்பவரை கைது செய்து அவரிடம் இருந்த 5 பவுன் நகையை கைப்பற்றியது குறிப்பிடத்தக்கது. இதன் மூலம் லட்சுமி வீட்டில் திருடப்பட்ட நகைகளில்18 சவரன் நகைகளை பறிமுதல் செய்துள்ள போலீசார், மேலும் இவ்வழக்கில் தொடர்புடைய ரமேஷ் என்பவரை தேடி வருகின்றனர். அவரை விரைவில் பிடித்து மீதமுள்ள நகைகள் அனைத்தும் பறிமுதல் செய்யப்படும் என காவல்துறையினர் தரப்பில் தகவல் தெரிவித்துள்ளனர்.

தொடர் திருட்டு சம்பவங்கள்

மயிலாடுதுறை மாவட்டம் சீர்காழி கடந்த சில மாதங்களாக நாளுக்கு நாள் திருட்டு சம்பவங்கள் அதிகரித்து வருகிறது. இதனை தடுக்க சீர்காழி காவல்துறையினர் பல்வேறு நடவடிக்கை மேற்கொண்டாலும் தொடர் திருட்டு சம்பவங்களை அவர்களால் தடுத்து நிறுத்துவது என்பது முடியாத காரியமாகவே இருந்து வருகிறது. குறிப்பாக இந்த கம்பன் நகரில் மட்டும் பல முறை வீட்டுகளில் பூட்டை உடைத்து திருட்டு சம்பவங்கள் நடைபெறுவது தொடர்ந்து கதையாக இருந்து வருகிறது.