சென்னையில் பரபரப்பு... ரவுடியை சுட்டு பிடித்த போலீஸ் - நடந்தது என்ன?
பல்வேறு வழக்குகளில் தொடர்புடைய ரவுடி அறிவழகனை ஓட்டேரியில் வைத்து சுட்டு பிடித்த போலீசார்.
10க்கும் மேற்பட்ட வழக்குகள்
சென்னை வியாசர்பாடி பி.வி காலனி ஐந்தாவது தெருவை சேர்ந்தவர் அறிவழகன் (24). இவர் மீது திமுக பிரமுகர் இடிமுரசு இளங்கோ கொலை வழக்கு உட்பட சுமார் 10க்கும் மேற்பட்ட வழக்குகள் உள்ளன.
தனிப்படை போலீசார் தீவிரம்
பல்வேறு குற்ற வழக்குகளில் இவர் கடந்த ஐந்து ஆண்டுகளாக நீதிமன்றத்தில் ஆஜராகாமல் இருந்து வந்துள்ளார். எனவே இவரை பிடிக்க புளியந்தோப்பு துணை கமிஷனர் முத்துக்குமாரின் தனிப்படை போலீசார் தீவிரம் காட்டி வந்தனர்.
சென்னைக்கு திரும்பிய ரவுடி
இவர் ஆந்திராவில் பதுங்கி இருப்பதாக தகவல் அறிந்து நேற்று அங்கு சென்ற போலீசார் இவர் மீண்டும் சென்னைக்கு திரும்பி விட்டதை அறிந்து சென்னைக்கு வந்தனர். அதன்படி இன்று காலை 5.45 மணியளவில் துணை கமிஷனரின் தனிப்பிரிவு உதவி ஆய்வாளர் பிரேம்குமார் தலைமையிலான போலீசார் ஓட்டேரி பனந்தோப்பு ரயில்வே காலனி பகுதியில் இவர் இருப்பதை அறிந்து அங்கு சென்றனர்.
முட்டிக்கு கீழ் சுட்ட போலீசார்
அப்பொழுது அறிவழகன் போலீஸ் வருவதை பார்த்து தன்னிடம் இருந்த துப்பாக்கியை எடுத்து போலீசாரை ஒருமுறை சுட்டுள்ளார். இதில் போலீசாருக்கு எந்த காயமும் ஏற்படவில்லை தற்பாதுகாப்பிற்காக எஸ்.ஐ பிரேம்குமார் அறிவழகனை முட்டிக்கு கீழ் சுட்டுள்ளார்.
இதில் அறிவழகனுக்கு வலது முழங்காலில் குண்டு பாய்ந்து சம்பவ இடத்திலேயே கீழே விழுந்தார். இதனையடுத்து போலீசார் அங்கு சென்று அறிவழகனை மீட்டு ஸ்டான்லி அரசு மருத்துவமனைக்கு கொண்டு சேர்த்துள்ளனர்.
அங்கு அவர் சிகிச்சை பெற்று வருகிறார் சம்பவம் தொடர்பாக ஓட்டேரி போலீசார் வழக்கு பதிவு செய்து விசாரணை மேற்கொண்டு வருகின்றனர். அறிவழகன் பயன்படுத்திய துப்பாக்கி மற்றும் ஒரு பட்டாகத்தி ஆறு கிலோ கஞ்சா உள்ளிட்டவை பறிமுதல் செய்யப்பட்டுள்ளது
தலைப்பு செய்திகள்
ட்ரெண்டிங் செய்திகள்
