Crime: தனியாக உள்ள வீடுகளே குறி; பகலில் மட்டுமே கொள்ளை - பிரபல கொள்ளையன் கைது
முபாரக் அலி மீது 30க்கும் மேற்பட்ட திருட்டு வழக்குகள் பதிவாகியுள்ளதும், தனியாக உள்ள வீடுகளை குறிவைத்து பகல் நேரங்களில் மட்டுமே கொள்ளை சம்பவத்தில் ஈடுபட்டதும் விசாரணையில் தெரியவந்தது.
கோவை அருகே தனியாக உள்ள வீடுகளை குறிவைத்து பகல் நேரங்களில் மட்டும் கொள்ளையடிக்கும் பிரபல கொள்ளையனை காவல் துறையினர் கைது செய்தனர்.
கோவை மாவட்டம் அன்னூர் அடுத்த செங்காளிபாளையம் பகுதியைச் சேர்ந்தவர் சுப்பிரமணியன். இவர் அப்பகுதியில் புதிதாக வீடு கட்டி குடியேறி உள்ளார். இந்நிலையில் கடந்த 13ஆம் தேதி அவர் குடும்பத்துடன் தனது தோட்டத்திற்கு சென்ற நிலையில், இவரது மகன்கள் கல்லூரி சென்று விட்டு மாலை வீடு திரும்பியுள்ளனர் அப்போது வீட்டில் முன்பு சந்தேகத்துக்கிடமான வகையில் இளைஞர் ஒருவர் இரு சக்கர வாகனத்தில் நின்று கொண்டு இருப்பதை பார்த்துள்ளார். இதனால் சந்தேகம் அடைந்த அவர்கள் அந்த நபரிடம் விசாரிக்க சென்றுள்ளனர். அப்போது அவர்களது வீட்டினுள் இருந்து வெளியே வந்த மற்றொரு நபர், தயாராக இருந்த இருசக்கர வாகனத்தில் ஏறி இருவரும் தப்பி ஓடினர்.
இதனால் அதிர்ச்சி அடைந்த அவர்கள் வீட்டிற்குள் சென்று பார்த்த போது வீட்டில் வைக்கப்பட்டிருந்த 2.50 லட்சம் ரூபாய் பணம், 3 பவுன் தங்க நகைகள், மடிக்கணினி ஆகியவை திருடப்பட்டிருந்தது தெரியவந்தது. இதனை தொடர்ந்து வீடு புகுந்து கொள்ளையடிக்கப்பட்டது குறித்து சுப்பிரமணியன் அன்னூர் காவல் நிலையத்தில் புகார் அளித்ததார். இந்த புகாரின் பேரில் வழக்கு பதிவு செய்த அன்னூர் காவல் துறையினர் தனிப்படை அமைத்து விசாரணை மேற்கொண்டு வந்தனர். இந்நிலையில் இன்று காலை அன்னூர் சத்தியமங்கலம் சாலையில் பசூர் என்ற இடத்தில் சந்தேகத்திற்கு இடமான வகையில் இளைஞர் ஒருவர் இருப்பதை பார்த்த தனிப்படை காவல் துறையினர் அவரிடம் விசாரணை மேற்கொண்டனர்.
அப்போது அந்த நபர் முன்னுக்கு பின் முரணாக பதில் அளித்துள்ளார் இதனால் சந்தேகம் அடைந்த காவல் துறையினர் அந்த நபரை காவல் நிலையத்திற்கு அழைத்து சென்று விசாரணை நடத்தினர். அதில் அவரது பெயர் முபாரக் அலி என்பதும், இவர் தனது நண்பர் சுபாஷ் என்பவருடன் இணைந்து சுப்பிரமணியன் வீட்டில் கொள்ளை அடித்ததும் தெரியவந்தது. மேலும் இதே போன்று கோவை திருப்பூர், ஈரோடு மாவட்டங்களில் முபாரக் அலி மீது 30க்கும் மேற்பட்ட திருட்டு வழக்குகள் பதிவாகியுள்ளதும், தனியாக உள்ள வீடுகளை குறிவைத்து பகல் நேரங்களில் மட்டுமே கொள்ளை சம்பவத்தில் ஈடுபட்டதும் விசாரணையில் தெரியவந்தது. இதனை அடுத்து முபாரக் அலியை அன்னூர் நீதிமன்றத்தில் ஆஜர்படுத்திய காவல் துறையினர், கோவை மத்திய சிறையில் அடைத்தனர். இந்நிலையில் கடந்த வாரம் கோவையில் பதுங்கி இருந்த முபாரக் அலியின் கூட்டாளி சுபாஷ் வேறொரு கொள்ளை சம்பவ வழக்கில் கைது செய்யப்பட்டு கோவை மத்திய சிறையில் அடைக்கப்பட்டுள்ளது குறிப்பிடத்தக்கது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
