நிர்வாண வீடியோக்கள், மீண்டும் மீண்டும் பாலியல் வன்கொடுமை - காங்கிரஸ் எம்எல்ஏ மீது பெண் பரபரப்பு புகார் - நடந்தது என்ன?

பெண்ணை பாலியல் வன்கொடுமை செய்ததாக ஜாமீனில் வெளிவர முடியாதபடி காங்கிரஸ் எம்எல்ஏ மீது வழக்கப்பதிவு செய்யப்பட்டுள்ளது.

சட்டமன்ற உறுப்பிர் ராகுல் மம்கூத்ததில்

Source : twitter

கேரளாவில் ஒரு பெண்ணை பாலியல் வன்கொடுமை செய்ததாக காங்கிரஸ் சட்டமன்ற உறுப்பிர் ராகுல் மம்கூத்ததில் மீது வழக்குப் பதிவு செய்யப்பட்டுள்ளது.கடந்த வியாழக்கிழமை பாதிக்கப்பட்ட பெண் முதலமைச்சர் பினராயி விஜயனை அவரது அலுவலகத்தில் சந்தித்து பாலக்காடு எம்.எல்.ஏ. மீது புகார் அளித்ததைத் தொடர்ந்து இந்த நடவடிக்கை எடுக்கப்பட்டுள்ளது. 

காங்கிரஸ் எம்எல்ஏ மீது பாலியல் வழக்கு

பாலக்காடு எம்.எல்.ஏ ராகுல் மம்கூத்ததில் மீது பாலியல் வன்கொடுமை, மிரட்டல் மற்றும் கட்டாய கருக்கலைப்பு ஆகிய குற்றச்சாட்டுகளின் கீழ் வழக்குப் பதிவு செய்யப்பட்டுள்ளது. மேலும், முதல் தகவல் அறிக்கையில் ஜாமீனில் வெளிவர முடியாத பல பிரிவுகள் பட்டியலிடப்பட்டுள்ளன. இந்த வழக்கில் அவரது நண்பர் ஜோபி ஜோசப்பையும் கேரள போலீசார் இரண்டாவது குற்றவாளியாக கைது செய்துள்ளனர்.

கடந்த மார்ச் 4ஆம் தேதி  திருவனந்தபுரம், திருக்கண்ணபுரத்தில் உள்ள அவரது பிளாட்டில் ராகுல், அந்தப் பெண்ணை தாக்கி பாலியல் வன்கொடுமை செய்ததாக கூறப்படுகிறது. பின்னர் மார்ச் 17 ஆம் தேதி அதே பிளாட்டில், ராகுல் பாதிக்கப்பட்ட பெண்ணின் நிர்வாண வீடியோக்களை அவரது அனுமதியின்றி தனது மொபைல் போனில் பதிவு செய்து, அவரை மிரட்டியதாகக் கூறப்படுகிறது. இதனை யாரிடமாவது கூறினால், ‘அவருடைய வாழ்க்கையை அழித்துவிடுவேன்" என்று எம்எல்ஏ எச்சரித்ததாக எப்ஐஆர்இல் குறிப்பிடப்பட்டுள்ளது.

தான் கர்ப்பமாக இருப்பதை அறிந்திருந்தும், ராகுல் ஏப்ரல் 22 ஆம் தேதி திருக்கண்ணபுரம் பிளாட்டில் மீண்டும் தன்னை பாலியல் வன்கொடுமை செய்ததாகவும், பின்னர் மே மாதம் பாலக்காட்டில் உள்ள எம்எல்ஏவின் பில்ட் டெக் சம்மிட் பிளாட்டில் இரண்டு நாட்கள் பாலியல் வன்கொடுமை செய்ததாகவும் பாதிக்கப்பட்ட பெண் போலீசாரிடம் தெரிவித்தார்.

மே 30 அன்று திருவனந்தபுரத்தில் உள்ள கைமனத்தில் இருந்து தப்பிப்பிழைத்த பெண்ணை, ராகுலின் நெருங்கிய நண்பரான ஜோபி ஜோசப் காரில் அழைத்துச் செல்லும்போது கருக்கலைப்பு மாத்திரைகளைக் கொடுத்ததாக கூறப்படுகிறது. மேலும், ராகுல், பாதிக்கப்பட்ட பெண்ணை மாத்திரைகளை சாப்பிட கட்டாயப்படுத்தியதாகவும், இதன் விளைவாக கருக்கலைப்பு செய்யப்பட்டதாகவும், மேலும் இந்த சம்பவத்தை வெளியே சொல்லக்கூடாது என்று மீண்டும் மிரட்டியதாகவும் கூறப்படுகிறது.

ஜாமீனில் வெளிவரமுடியாதபடி வழக்குப்பதிவு

பாரதிய நியாய சன்ஹிதா (BNS) 2023 இன், ஜாமீனில் வெளிவர முடியாத பிரிவுகளின் கீழ் 8 வழக்குகள் பதிவு செய்யப்பட்டுள்ளது. இதில் பாலியல் வன்கொடுமைக்கான பிரிவு 64, ஒரே பெண்ணை மீண்டும் மீண்டும் பாலியல் வன்கொடுமை செய்ததற்கான பிரிவு 64(2), அறக்கட்டளைப் பதவியில் உள்ள ஒருவரால் பாலியல் வன்கொடுமை செய்யப்பட்டதற்கான பிரிவு 64(f), கர்ப்பமாக இருப்பதை அறிந்தும் ஒரு பெண்ணை பலாத்காரம் செய்ததற்கான பிரிவு 64(h), மற்றும் அதே பெண்ணை மீண்டும் மீண்டும் பாலியல் வன்கொடுமை செய்ததற்கான பிரிவு 64(m) ஆகியவை அடங்கும். ஒரு பெண்ணின் அனுமதியின்றி கருச்சிதைவை ஏற்படுத்துவதற்கான பிரிவு 89, நம்பிக்கையை குற்றமாக மீறுவதற்கான பிரிவு BNS 316 மற்றும் தகவல் தொழில்நுட்பச் சட்டத்தின் பிரிவு 64 e (ஒப்புதல் இல்லாமல் ஒரு நபரின் நிர்வாணத்தைப் படம்பிடித்தல்) ஆகியவற்றின் கீழ் வழக்குப் பதிவு செய்யப்பட்டுள்ளதாக காவல்துறை வட்டாரங்கள் தெரிவித்தன.

இந்தக் குற்றங்களுக்கு ஒட்டுமொத்தமாக பத்து ஆண்டுகள் முதல் ஆயுள் தண்டனை வரை தண்டனைகள் விதிக்கப்படுகின்றன.