Crime: தேர்வு எழுத மறுத்ததால் பெற்றோர் கண்டிப்பு.. மாடியில் இருந்து குதித்து மாணவர் தற்கொலை!

நேற்று காலை ஹரிஷ் பள்ளிக்குச் செல்லாமல் வீட்டில் இருந்துள்ளார். தொடர்ந்து அவரது பெற்றோர் கண்டித்த நிலையில், அவர்களுக்கிடையே வாக்கு வாதம் ஏற்பட்டுள்ளது.

தேர்வு எழுத மறுத்ததால் பெற்றோர் கண்டிப்பு...மாணவர் மாடியில் இருந்து குதித்து தற்கொலை!

தேர்வு எழுத மறுத்ததை தனது பெற்றோர் கண்டித்ததால் பதினோராம் வகுப்பு மாணவர் மாடியில் இருந்து குதித்து தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது.

சென்னை, தியாகராயநகர், தாமஸ் சாலை பகுதியைச் சேர்ந்தவர் ராஜா. இவர் வேளாண்மைத் துறையில் அரசுப் பணியாற்றி வருகிறார். இவரது மனைவி சிமி, மகன் ஹரிஷ் (வயது 15) ஆகிய மூவரும் அதே பகுதியில் உள்ள அடுக்கு மாடிக் குடியிருப்பில் வசித்து வந்தனர். ஹரிஷ், கோபாலபுரத்தில் உள்ள தனியார் பள்ளி யில் முன்னதாக பதினோராம் வகுப்பு படித்து வந்துள்ளார்.

இந்நிலையில், ஹரிஷ் படிப்பில் தொடர்ந்து நாட்டமில்லாமல் இருந்து வந்ததாகக் கூறப்படுகிறது. அவர் படித்து வந்த பள்ளியில் தேர்வு நடைபெற்று வந்த நிலையில்,  நேற்று காலை ஹரிஷ் பள்ளிக்குச் செல்லாமல் வீட்டில் இருந்துள்ளார். இதனையடுத்து ஹரிஷை அவரது பெற்றோர் கண்டித்த நிலையில், பள்ளிக்கு சென்று தேர்வு எழுதுமாறும் கூறியதால் அவர்களுக்கு இவர்களுக்கிடையே வாக்கு வாதம் ஏற்பட்டுள்ளது.

இதில் கடும் கோபமடைந்த ஹரிஷ், வீட்டின் மொட்டை மாடிக்கு விரைந்து சென்று, அங்கிருந்து கீழே குதித்துள்ளார். இதனைக் கண்டு அதிர்ச்சி அடைந்த அவரது குடும்பத்தினர், உடனடி யாக ஹரிஷை மீட்டு ராயப்பேட்டை அரசு மருத்துவமனைக்கு கொண்டு சென்றனர்.

அங்கு அவரை பரிசோதித்த மருத்துவர்கள், ஹரிஷ் ஏற்கனவே உயிரிழந்துவிட்டதாகத் தெரிவித்தனர்.இந்தச் சம்பவம் தொடர்பாக மாம்பலம் காவல் துறையினர் வழக்குப்பதிவு செய்து விசாரணை நடத்தி வருகின்றனர்.

இந்நிலையில் இச்சம்பவம் குறித்து காவல் துறையினர் வழக்குப்பதிவு செய்து விசாரணை மேற்கொண்டு வருகின்றனர்.

---

எந்த ஒரு பிரச்னைக்கு தற்கொலை தீர்வாகாது. மன அழுத்தம் ஏற்பட்டாலோ, தற்கொலை எண்ணம் உண்டானாலோ, அதில் இருந்து மீண்டு மாற்றம் ஏற்பட கீழ்காணும் சேவை எண்களுக்கு தொடர்பு கொண்டு பேசவும்.

மாநில உதவிமையம் : 104

சினேகா தற்கொலை தடுப்பு உதவி மையம் - 044 -24640050

இந்தியாவில் அதிக தற்கொலைகள் நடக்கும் மாநிலங்களின் பட்டியலில் மகாராஷ்டிரா முதலிடத்தில் உள்ளது. தமிழ்நாடு மற்றும் மத்தியப் பிரதேசத்திற்கு அதற்கு அடுத்த 2 இடங்களில் உள்ளது.

கடந்த 2021 ஆம் ஆண்டில் மட்டும் நாடு முழுவதும் 1,64,033 தற்கொலை வழக்குகள் பதிவாகியுள்ளதாக தேசிய குற்றப் பதிவுப் பணியகம் (NCRB) அறிக்கை வெளியிட்டுள்ளது. இது கடந்த ஆண்டுடன் ஒப்பிடுகையில் 7.2% அதிகம் என்பது குறிப்பிடத்தக்கது. நாடுமுழுவதும் கடந்த 2020 ஆம் ஆண்டில் மொத்தம் 1,53,052 தற்கொலை வழக்குகள் பதிவு செய்யப்பட்டுள்ளது. 

தொழில் சார்ந்த பிரச்சனைகள், வன்கொடுமை, மனநல பிரச்சனைகள், குடும்ப பிரச்சனைகள், தனிமை உணர்வு, வன்முறை, போதை மருந்து , தீராத வலி, நிதி நெருக்கடி போன்றவைகள் இந்தியாவில் தற்கொலைகள் எண்ணிக்கைக்கு முக்கிய காரணங்களாக இருப்பதாக இந்த அறிக்கை தெரிவித்துள்ளது. 

மகாராஷ்டிரா - 22,207 (13.5 சதவீதம்)
தமிழ்நாட்டு - 18,925 (11.5 சதவீதம்)
மத்தியப் பிரதேசம் - 14,965 (9.1 சதவீதம்)
மேற்கு வங்கம் - 13,500 (8.2 சதவீதம்)
கர்நாடகா - 13,056 (8 சதவீதம்)

அதிக தற்கொலைகள் நடக்கும் மாநிலங்களின் பட்டியலில் மேற்கண்ட 5 மாநிலங்கள் டாப் 5 இடங்களை பிடித்துள்ளது.