Smart Investing Tips: உங்க பணத்த முதலீடு செய்ய போறிங்களா..! உங்களுக்கான 5 ஸ்மார்ட் டிப்ஸ் இதோ..!

Smart Investing Tips: முதலீடு செய்ய விரும்புபவர்களுக்கான மிக முக்கியமான 5 ஆலோசனைகள் கீழே பட்டியலிடப்பட்டுள்ளன.

நிதி ஆலோசனைகள்

Smart Investing Tips: எதிர்கால தேவைகளை கருத்தில் கொண்டு முதலீடு செய்வது என்பது, எப்போதுமே மிகச்சிறந்த ஆலோசனையாகும். 

பங்குச்சந்தை முதலீடுகள்:

முதலீடுகளையும்,  புத்திசாலித்தனமான முதலீடுகளையும் வேறுபடுத்துவது நீங்கள் எடுக்கும் முடிவுகள் மட்டுமே. வியர்வை சிந்தி உழைத்த  பணத்தை சேமிப்பது மட்டும் போதாது. அதன் மூலம் நீங்கள் செல்வத்தை உருவாக்குவதையும் நோக்கமாகக் கொள்ள வேண்டும். ஒரு புத்திசாலி முதலீட்டாளராக, உங்கள் பணத்தை உங்களுக்கான வேலையைச் செய்ய அனுமதிக்க வேண்டும்.

நிச்சயமாக, பங்குச்சந்தை ஏற்ற இறக்கங்களை கொண்டிருக்கும். ஆனால் ஒரு சில அடிப்படை ஆலோசனகள் எல்லா காலத்திற்கும் பொருத்தமானதாக இருக்கும். உலகெங்கிலும் உள்ள வெற்றிகரமான முதலீட்டாளர்களால் பின்பற்றப்படும் முக்கியமான மற்றும் எளிய விதிகளை ப்ன்பற்றுவதன்  மூலம், உங்களது  முதலீட்டு இலக்குகளை நீங்கள் அடையலாம். அவை கீழே பட்டியலிடப்பட்டுள்ளன. 

1. முடிந்த வரையில் விரைந்து முதலீட்டை தொடங்குங்கள்:

பந்திக்கு முந்த வேண்டும் என்பது போல, முடிந்த வரையில் விரைந்து முதலீட்டை தொடங்குவது நல்ல பலனை அளிக்கும். புள்ளிவிவரங்கள் இதை உறுதிப்படுத்துகின்றன. நீங்கள் சீக்கிரம் தொடங்கும் போது, ​​கூட்டு சக்தியின் காரணமாக ('மேஜிக் எஃபெக்ட்' என குறிப்பிடப்படுகிறது) உங்கள் முதலீடு அதிவேகமாக வளர போதுமான நேரம் கிடைக்கும். உங்களிடம் முதலீடு செய்ய அதிகம் இல்லாவிட்டாலும், விரைவான தொடக்கமானது உங்களுக்காக அதிக லாபத்தை உருவாக்க உதவும்.  இது நிதி பாதுகாப்பிற்கு வழிவகுக்கும். உங்கள் வயது என்னவாக இருந்தாலும் சரி, முடிந்த வரையில் விரைந்து முதலீட்டை தொடங்குங்கள். 

2. தொடர்ந்து முதலீடு செய்யுங்கள்:

அவ்வப்போது அல்லது வருடத்திற்கு ஒருமுறை முதலீடு செய்வது போதாது. செல்வத்தை உருவாக்குவதற்கு குறுக்குவழிகள் இல்லை. உங்கள் பணம் வளர விரும்பினால், நீங்கள் ஒவ்வொரு மாதமும் அல்லது காலாண்டிலும் ஒரு குறிப்பிட்ட தொகையை முதலீடு செய்து நிதி ஒழுக்கத்தை பராமரிக்க வேண்டும். நீங்கள் சந்தையில் எவ்வளவு காலம் முதலீடு செய்கிறீர்களோ, அவ்வளவு அதிக வருமானம் கிடைக்கும். ஆய்வுகளின்படி, , மியூச்சுவல் ஃபண்டுகளில் 5-7 ஆண்டுகள் முதலீடு செய்வது வீழ்ச்சிக்கான வாய்ப்புகளை குறைக்கும்.

3. ஒரே இடத்தில் முதலீடு செய்யாதீர்கள்:

முதலீட்டின் முதன்மையான விதிகளில் ஒன்று ‘உங்கள் பணத்தை ஒரே இடத்தில் குவிக்காதீர்கள். நிச்சயமாக, உங்களது அனைத்து முதலீட்டையும் தாராளமாக ஒரே சொத்து அல்லது பாதுகாப்பில் முதலீடு செய்யலாம். அது நன்றாகச் செயல்பட்டால், உங்கள் முடிவு லாபகரமானதாக இருக்கும். ஒருவேளை அது தவறாக அமைந்தால் நீங்கள் கடினமாக உழைத்து சம்பாதித்த பணத்தை மொத்தமாக இழக்க நேரிடும்.

ஆபத்தைத் தணிக்கவும், வலுவான போர்ட்ஃபோலியோவை உருவாக்கவும், உங்கள் முதலீட்டில் சாதகமான வருவாயைப் பெறவும் விரும்பினால், முதலீட்டை பல்வகைப்படுத்துவது அவசியம். பரஸ்பர நிதிகள், தங்கம், பங்குகள், பத்திரங்கள், ரியல் எஸ்டேட் போன்ற சொத்து வகைகளில் பல்வேறு முதலீடுகளை மேற்கொள்ளலாம். பல்வகைப்படுத்தலின் பின்னணியில் உள்ள நோக்கம் என்னவென்றால், ஒரு முதலீடு எதிர்பார்த்த வெளியீட்டை வழங்கவில்லை என்றாலும், மற்றொரு முதலீடு உங்களுக்கு நன்மை பயக்கலாம். 

4. அதிக லாபத்தின் பின் ஓடாதீர்கள்:

வெற்றிகரமான முதலீடு அல்லது நிதி இலக்குகளை அடைவது என்பது, குறுகிய காலத்தில் அதிக வருமானத்தைத் துரத்துவதைக் குறிக்காது. அது தவறான அணுகுமுறையாகும்.  உங்கள் இலக்குகளையோ அல்லது சிறந்த போர்ட்ஃபோலியோ வருமானத்தின் நோக்கத்தையோ அடைய அது உங்களுக்கு உதவாது. நீங்கள் அதிகபட்ச வருமானத்தைப் பெற முயற்சிக்க வேண்டும் என்றாலும், நீங்கள் ஒரு நிதியைத் தேர்ந்தெடுக்கும்போது அதை மட்டுமே காரணியாகப் பயன்படுத்த வேண்டாம். முதலீட்டின் நோக்கம் அதிக வருமானம் ஈட்டுவதைத் தாண்டியது. புத்திசாலியான முதலீட்டாளராக, நீங்கள் ஒரு குறிப்பிட்ட காலத்திற்கு குறைந்த ஆபத்து மற்றும் நிலையான முதலீடுகளில் கவனம் செலுத்த வேண்டும்.

5. முதலீட்டை கண்காணியுங்கள்:

உங்களது முதலீட்டை கண்காணிப்பது என்பது மிகவும் முக்கியமானது.  ஏனெனில் முதலீடுகள் அவ்வப்போது வளர்ந்திருக்க வேண்டும். உங்களது முதலீடுகளின் செயல்திறனை பகுப்பாய்வு செய்வது அவசியமாகும். உங்கள் முதலீடுகள் அனைத்தையும் பட்டியலிட்டு அவற்றை அவ்வப்போது மதிப்பாய்வு செய்யுங்கள். காலப்போக்கில், உங்கள் தேவைகள் மாறும்போது, ​​​​முதலீடுகளில் தேவையான திருத்தங்களை செய்யலாம்.