Brezza Turbo Petrol Review: புது டர்போ இன்ஜின், அசத்தல் பவர்- டிரைவிங் பிரியர்களுக்கு செம விருந்து! மாருதி பிரெஸ்ஸா முழு ரிவ்யூ
Brezza Turbo Petrol Review in Tamil: மாருதி சுஸுகி பிரெஸ்ஸா டர்போ பெட்ரோல்: எப்படி இருக்கிறது புதிய கார்? - முழு டிரைவிங் ரிவ்யூ
மாருதி சுஸுகி பிரெஸ்ஸா காரின் புதிய அப்டேட்டில் மிகப்பெரிய சிறப்பம்சமாக டர்போ பெட்ரோல் இன்ஜின் சேர்க்கப்பட்டுள்ளது. ஃபிராங்க்ஸ் மாடலுக்குப் பிறகு டர்போ இன்ஜின் பெறும் இரண்டாவது மாருதி கார் இதுவாகும்.
ஏற்கனவே விற்பனையில் உள்ள 1.5 லிட்டர் நார்மல் இன்ஜினுடன், இப்போது இந்த 1.0 லிட்டர் டர்போ இன்ஜின் ஆப்ஷனும் வாடிக்கையாளர்களுக்குக் கிடைக்கிறது.
அதிகபட்ச பவர், டார்க் திறன்
இந்த 1.0 லிட்டர் டர்போ இன்ஜின் அதிகபட்சமாக 110 bhp பவரையும், 170 Nm டார்க் திறனையும் வெளிப்படுத்துகிறது. இது 1.5 லிட்டர் இன்ஜினை விட அதிக சக்தி வாய்ந்தது. மேலும், மாருதி நிறுவனத்திலேயே முதன்முறையாக இந்த காரில் புதிய 6-ஸ்பீடு மேனுவல் கியர்பாக்ஸ் கொடுக்கப்பட்டுள்ளது. கியர் மாற்றும் இடைவெளி சற்றே நீளமாக இருந்தாலும் மிகத் துல்லியமாக விழுகிறது.
காரை ஸ்டார்ட் செய்தால் இன்ஜின் சத்தம் மிகக் குறைவாகவும், மென்மையாகவும் உள்ளது. பவர் டெலிவரி சீராகவும் வலிமையாகவும் இருக்கிறது. கிளட்ச் மிகவும் லேசாக உள்ளது.
கியர் மாற்ற வேண்டிய அவசியமில்லை
குறைந்த வேகத்தில் செல்லும்போது அதிக டார்க் கிடைப்பதால், நெரிசலான டிராஃபிக்கில் அடிக்கடி கியரை மாற்றத் தேவையில்லை. பெரும்பாலும் 3ஆவது கியரிலேயே நகரப் பயணங்களை மேற்கொள்ளலாம். இது நகரப் போக்குவரத்தில் ஓட்டுவதை மிகவும் எளிதாகவும் வசதியாகவும் மாற்றுகிறது.
சிட்டிக்குள்ளும் நெடுஞ்சாலைகளிலும்..
ஸ்டீயரிங் மென்மையாக இருப்பதாலும், காம்பேக்ட் அளவு மற்றும் சிறப்பான கிரவுண்ட் கிளியரன்ஸ் இருப்பதாலும் சிட்டிக்குள் ஓட்டுவதற்கு மிகவும் சுலபமாக இருக்கிறது. நெடுஞ்சாலைகளில் 6-வது கியர் பயன்பாடு சிறப்பான பயணத்திற்கு உதவுகிறது. குறைந்த வேகத்திலும் குலுங்கல்கள் இல்லாத பயணத்தை உறுதி செய்கிறது.
மைலேஜ் எப்படி?
மைலேஜைப் பொறுத்தவரை, அதிகாரப்பூர்வமாக ஒரு லிட்டருக்கு 20.47 கி.மீ என சான்றளிக்கப்பட்டுள்ளது. எனினும், நிஜப் பயன்பாட்டில் 12 முதல் 14 கி.மீ மைலேஜ் கிடைக்கும். காரின் வெளிப்புற வடிவமைப்பில் பெரிய மாற்றம் ஏதுமில்லை; மக்கள் வரவேற்ற பழைய டிசைன் அப்படியே தொடர்கிறது.
நிறை என்ன?
பார்க்கிங் செய்ய உதவும் தரமான புதிய 360 டிகிரி கேமரா மற்றும் சில அடாஸ் அம்சங்கள் சிறப்பாகச் செயல்படுகின்றன. வெயிலுக்கு இதமளிக்கும் வென்டிலேட்டட் இருக்கைகள் உள்ளன. இதில் ஸ்டெப்னி கிடையாது; அதற்குப் பதிலாக பஞ்சர் ரிப்பேர் கிட் வழங்கப்பட்டுள்ளது. இதனால் மைலேஜ் சற்றே அதிகமாக கிடைக்கக்கூடும்.
என்ன குறை?
டிரைவிங் பிரியராக இருந்து, அதிக பவர் எதிர்பார்ப்பவர்களுக்கு பிரெஸ்ஸா டர்போ பெட்ரோல் மாடல் சிறந்த தேர்வாகும். ஆனால், இதில் ஆட்டோமேட்டிக் ஆப்ஷன் இல்லை. ஆட்டோமேட்டிக் விரும்புபவர்கள் பழைய 1.5L மாடலைத்தான் தேர்ந்தெடுக்க வேண்டும்.
பவர் மற்றும் பெர்ஃபார்மன்ஸை விரும்புபவர்களுக்கு, இந்த புதிய டர்போ மாடல் நிச்சயம் ஒரு தகுதியான தேர்வாக இருக்கும் என்பதே ABP வழங்கும் பரிந்துரை.
தலைப்பு செய்திகள்
ட்ரெண்டிங் செய்திகள்
