April Car Sales: மீண்டும் திரும்பிய ஆல்டோ மவுசு.. எகிறிய மாருதி சுஸுகி விற்பனை! ஏப்ரல் மாதத்தில் மட்டும் இத்தனை லட்சமா?
April Car Sales: 2026 ஏப்ரல் மாதத்தில் மட்டும் 2.39 லட்சம் கார்கள் யூனிட்களை விற்பனை செய்து, தனது நிறுவன வரலாற்றிலேயே இல்லாத அளவிற்கு உச்சபட்ச மாதாந்திர விற்பனையைப் பதிவு செய்துள்ளது.
இந்திய ஆட்டோமொபைல் துறையின் ஜாம்பவானான மாருதி சுஸுகி இந்தியா லிமிடெட், புதிய நிதியாண்டை அதிரடியான விற்பனை வளர்ச்சியுடன் தொடங்கியுள்ளது. 2026 ஏப்ரல் மாதத்தில் மட்டும் அதிக யூனிட்களை விற்பனை செய்து, தனது நிறுவன வரலாற்றிலேயே இல்லாத அளவிற்கு உச்சபட்ச மாதாந்திர விற்பனையைப் பதிவு செய்துள்ளது.
கடந்த ஆண்டு இதே ஏப்ரல் மாதத்தில் 1,79,791 யூனிட்கள் மட்டுமே விற்பனையாகியிருந்த நிலையில், தற்போது நிறுவனம் அசுர வளர்ச்சியை எட்டியுள்ளது. உள்நாட்டு சந்தையில் மட்டும் 1,91,122 யூனிட்களை விற்பனை செய்து மாருதி சுஸுகி புதிய சாதனை படைத்துள்ளது.
சிறிய ரக கார்கள் விற்பனை
பயணிகள் வாகனப் பிரிவில் மாருதி சுஸுகி அபாரமான முன்னேற்றத்தைக் கண்டுள்ளது. குறிப்பாக ஆல்டோ மற்றும் எஸ்-பிரெஸ்ஸோ போன்ற மாடல்களை உள்ளடக்கிய 'மினி செக்மென்ட்' பிரிவில் விற்பனை பல மடங்கு உயர்ந்துள்ளது. கடந்த ஆண்டு 6,332 யூனிட்கள் மட்டுமே விற்பனையாகியிருந்த நிலையில், தற்போது 16,066 யூனிட்கள் விற்பனையாகியுள்ளன. இதன் மூலம் நடுத்தர வர்க்க மக்களிடையே சிறிய ரக கார்களுக்கான மவுசு மீண்டும் திரும்புவது உறுதியாகியுள்ளது. அதேபோல் பலேனோ, ஸ்விஃப்ட், டிசையர் மற்றும் வேகன்-ஆர் போன்ற நிறுவனத்தின் முதுகெலும்பாக விளங்கும் காம்பாக்ட் மற்றும் மிட்-சைஸ் பிரிவில் 80,659 யூனிட்கள் விற்பனையாகி அசத்தியுள்ளன.
எஸ்யுவி மற்றும் எம்பிவி பிரிவில் மாருதியின் ஆதிக்கம்
தற்போதைய சந்தை மாற்றத்திற்கு ஏற்ப, பயன்பாட்டு வாகனங்கள் (Utility Vehicles) பிரிவிலும் மாருதி சுஸுகி தனது முத்திரையைப் பதித்து வருகிறது. பிரெஸ்ஸா, எர்டிகா, கிராண்ட் விட்டாரா மற்றும் ஃபிரான்க்ஸ் போன்ற பிரபலமான மாடல்களின் உதவியுடன் இப்பிரிவில் 77,892 யூனிட்கள் விற்பனை செய்யப்பட்டுள்ளன. கடந்த ஆண்டு இதே மாதத்தில் இந்த எண்ணிக்கை 59,022 ஆக மட்டுமே இருந்தது குறிப்பிடத்தக்கது. குடும்பங்கள் மற்றும் வணிகத் தேவைகளுக்குப் பயன்படுத்தப்படும் ஈக்கோ (Eeco) வேன் விற்பனையும் 13,087 யூனிட்களாக அதிகரித்துள்ளது.
ஏற்றுமதியிலும் மாருதி சுஸுகி மாஸ்
வணிக வாகனப் பிரிவில் மாருதி சுஸுகி சூப்பர் கேரி 3,418 யூனிட்கள் விற்பனையைப் பதிவு செய்துள்ளது. உள்நாட்டு விற்பனை ஒருபுறம் இருக்க, சர்வதேச சந்தைகளுக்கான ஏற்றுமதியிலும் மாருதி சுஸுகி தனது பலத்தை நிரூபித்துள்ளது. கடந்த ஆண்டு 27,911 யூனிட்கள் மட்டுமே ஏற்றுமதி செய்யப்பட்ட நிலையில், இந்த ஆண்டு 40,054 யூனிட்கள் வெளிநாடுகளுக்கு அனுப்பி வைக்கப்பட்டுள்ளன.
முதலிடத்தில் மாருதி.. மிரட்டும் மற்ற நிறுவனங்கள்
ஏப்ரல் மாத விற்பனையில் டாடா மோட்டார்ஸ் (59,701 யூனிட்கள்) மற்றும் ஹூண்டாய் (51,902 யூனிட்கள்) ஆகிய நிறுவனங்களும் நல்ல வளர்ச்சியைப் பெற்றுள்ளன. இருப்பினும், பல லட்சம் யூனிட்களை விற்பனை செய்து மாருதி சுஸுகி தனது முதலிடத்தைத் தக்கவைத்துக் கொண்டுள்ளது. அதிகரித்து வரும் தேவையைப் பூர்த்தி செய்யும் வகையில் உற்பத்தியை அதிகரித்துள்ளதாலும், புதிய மாடல்களை அறிமுகம் செய்ததாலும் இந்த வெற்றி சாத்தியமாகியுள்ளதாக நிறுவனம் தெரிவித்துள்ளது. இதே போன்ற வளர்ச்சியை நடப்பு நிதியாண்டு முழுவதும் தொடரப் போவதாக மாருதி சுஸுகி நம்பிக்கையுடன் தெரிவித்துள்ளது.
தலைப்பு செய்திகள்
ட்ரெண்டிங் செய்திகள்
