"மாற்றுக் கட்சிக்காரங்களுக்கு பதவி எங்களுக்கு ஒன்னுமில்லையா" தவெக தொண்டர்கள் ஆவேசம்

மாற்றுக் கட்சியிலிருந்து வந்தவங்களுக்கு உடனே பதவி கொடுக்றீங்க, ஆனா தேர்தல்ல உங்களுக்காக வேலை பார்த்த எங்களுக்கு பதவி இல்லையா என்று கேட்ட தவெக தொண்டர்களிடம் தவெக MLA தங்கபாண்டியன் மிரட்டும் தொனியில் கோபமாகப் பேசிய வீடியோ சமூக வலைத்தளங்களில் வைரலாகி வருகிறது.

மதுரை மேற்கு சட்டமன்ற தொகுதி தவெக MLA தங்கபாண்டியன், தொகுதிக்கு உட்பட்ட விளாங்குடி பகுதியில் மக்கள் தொகை கணக்கெடுப்பு முகாகை தொடங்கி வைப்பதற்காக காரில் வருகை வந்தார்.

அப்போது MLA-விற்கு உற்சாகமான வரவேற்பு அளிக்கப்பட்ட நிலையில் அங்கு கூடிய தவெக தொண்டர்கள் அவரின் காரை தடுத்து நிறுத்தி "கீழே இறங்கி வாங்க அண்ணே" என்று கூறினர்.

ஆனால் MLA, "இறங்கலாம் முடியாது என்னனு சொல்லு இங்க பேசக்கூடாது எதுனாலும் மனுவா கொடுங்க" என காரில் இருந்துகொண்டே அலட்சியமாகக் கூறினார். இதனை கேட்டு கோபமடைந்த தவெக தொண்டர்கள், "மாற்று கட்சியிலிருந்து வந்தவங்களுக்கு உடனே பதவி போட்டு கொடுத்திருக்கீங்க, நாங்க உங்களுக்காக தேர்தல்ல வேலை பார்த்தோம் உங்களை ஜெயிக்க வைத்தோம் நீங்க எப்படி விஜய் அண்ணனுக்கு இருந்திங்களோ அதே மாதிரி நாங்களும் இருந்தோம் ஆனா இப்ப எங்களுக்கு எந்த பதவியும் இல்லை. பதவி கொடுங்கள்" என்று கேட்டனர்.

அப்போது, "வீடியோலாம் எடுக்கக்கூடாது" என மிரட்டிய MLA, "இங்க வச்சு தான் பேசுவியா எதுனாலும் மனுவாக கொடு" எனக் கூறினார் 

அதற்கு, "மாவட்ட செயலாளர் என்பதால் தான் நேரில் பேசுகிறோம் மனுவாக எப்படி கொடுக்க முடியும் கொஞ்சம் இறங்கி வாங்க" என தவெக தொண்டர்கள் கேட்ட போதும், அவர் அதைக் கண்டுகொள்ளமல் அங்கிருந்து புறப்பட்டு சென்றார் 

மாற்றுக் கட்சியிலிருந்து வந்தவர்களுக்கு பதவி கொடுக்கறீங்க, எங்களுக்கு பதவி கொடுங்க என உரிமையோடு கேட்ட தவெக தொண்டர்களிடம் MLA தங்கபாண்டியன் கோபமாகப் பேசிய வீடியோ சமூக வலைத்தளங்களில் வைரலாகி வருகிறது.