கோட் சூட் அரசியல் TRENDSET செய்த விஜய் ஈர்க்கப்படும் இளைஞர்கள்!

தமிழக அரசியலில் இதுவரை கொள்கைகள், பேச்சுகள், சின்னங்கள் டிரெண்டாகியிருந்த நிலையில், தற்போது ஒரு அரசியல் தலைவரின் உடை அலங்காரமே சமூக வலைதளங்களில் பேசுபொருளாக மாறியுள்ளது. நடிகரிலிருந்து முதலமைச்சராக உயர்ந்துள்ள தமிழக வெற்றி கழக தலைவர் சி. ஜோசப் விஜயின் “ஸ்டைல் பாலிட்டிக்ஸ்” தற்போது இளைஞர்கள் மத்தியில் புதிய டிரெண்டை உருவாக்கி வருகிறது.

தமிழ்நாட்டில் பல தசாப்தங்களாக அரசியல் என்றாலே வெள்ளை சட்டை - வெள்ளை வேஷ்டி தான் தலைவர்களின் அடையாள இருக்கிறது.

ஆனால் அந்த வழக்கமான அரசியல் தோற்றத்திலிருந்து விலகி, கோட் சூட்டுடன் வலம் வரும் முதல்வர் விஜய், அரசியலில் புதிய ட்ரெண்டை உருவாக்குவதாக பார்க்கப்படுகிறது.

சென்னையில் நடைபெற்ற முதலமைச்சர் பதவியேற்பு விழாவில், பிளாக் சூட், வெள்ளை சட்டை, டார்க் டை என முழுமையான ‘பவர் டிரஸ்ஸிங்’ தோற்றத்தில் விஜய் மேடையேறியது சமூக வலைதளங்களில் வேகமாக வைரலானது.

தமிழ்நாடு அரசியல் வரலாற்றில் ஒரு முதலமைச்சர் சூட் அணிந்து பதவியேற்ற முதல் சம்பவமாக இது பார்க்கப்படுகிறது.

அதேநேரத்தில், விஜயின் உடை அரசியல் இந்த பதவியேற்பு விழாவில் மட்டும் தொடங்கியதல்ல. தேர்தல் பிரச்சார காலத்திலேயே வெள்ளை சட்டை மற்றும் காக்கி நிற பேன்ட் அணிந்த அவரது எளிய தோற்றம் இளைஞர்கள் மத்தியில் பெரும் வரவேற்பைப் பெற்றது.

வாக்குப்பதிவு நாளன்று பல பகுதிகளில் இளைஞர்கள், முதல் முறை வாக்காளர்கள், பெண்கள் என பலரும் வெள்ளை சட்டை - காக்கி பேன்ட் அணிந்து வாக்குச்சாவடிகளுக்கு வந்த காட்சிகள் சமூக வலைதளங்களில் டிரெண்டானது. அரசியல் கட்சி சின்னங்களை பயன்படுத்தாமல், உடை மூலமாகவே தங்களது ஆதரவை வெளிப்படுத்திய விதம் கவனத்தை ஈர்த்தது.

சினிமா ரசிகர் கலாச்சாரத்தையும், அரசியல் அடையாளத்தையும் இணைக்கும் இந்த புதிய தோற்றம், குறிப்பாக Gen Z தலைமுறையினரை அதிகமாக கவர்ந்துள்ளதாக அரசியல் விமர்சகர்கள் கருத்து தெரிவிக்கின்றனர். “விஜய் ஸ்டைல்” என்ற பெயரில் கல்லூரி பிரிவுவிழா முதல் திருமண உடை வரை பலரும் அவரது தோற்றத்தை பின்பற்ற தொடங்கியுள்ளதாக கூறப்படுகிறது.

சமூக வலைதளங்களில் அவரது ‘CM Look’ புகைப்படங்கள் பரவி வரும் நிலையில், அந்த தோற்றத்தை பிரதிபலிக்கும் வகையில் ஆடைகள் மீதான தேடலும் அதிகரித்துள்ளதாக தகவல்கள் வெளியாகியுள்ளன.

அரசியலில் உடை என்பது வெறும் ஃபேஷன் அல்ல; அது ஒரு அடையாளமாகப் பார்க்கப்படுகிறது. 

அதேவேளையில் ஆடை அதிகாரத்தின் அடையாளமாகவும் பார்க்கப்படுகிறது.

இந்த இரண்டு புள்ளியையும் இணைத்து, பாரம்பரிய அரசியல் தோற்றத்திலிருந்து மாறி, காலத்திற்கேற்றவாறு இளைஞர்களை கவரும் அரசியல் பிம்பத்தை உருவாக்க விஜய் முயற்சிக்கிறாரா என்ற பேச்சு தற்போது எழுகிறது.

ஒரு காலத்தில் திரைப்படங்களில் விஜயின் ஹேர் ஸ்டைல், வசனம், உடை போன்றவை டிரெண்டான நிலையில், தற்போது அவரது அரசியல் தோற்றமும் தமிழ்நாட்டில் புதிய கலாச்சார உரையாடலாக மாறியுள்ளது.