OPPO பேட் மினி! 144Hz OLED டிஸ்ப்ளே, 8,000mAh பேட்டரி.. இவ்வளவு சிறப்பம்சங்களா?
"ரூ.94,999 விலையில் ஒப்போ பேட் மினி! 144Hz OLED டிஸ்ப்ளே, Snapdragon 8 Gen 5 சிப்செட்.. முழு சிறப்பம்சங்கள் இதோ."
ஸ்மார்ட்போன்களைத் தொடர்ந்து டேப்லெட் சந்தையிலும் முன்னணி நிறுவனங்கள் போட்டியை அதிகரித்து வருகின்றன. அந்த வகையில், கச்சிதமான வடிவமைப்பு, பிரீமியம் டிஸ்ப்ளே மற்றும் சக்திவாய்ந்த செயல்திறன் ஆகியவற்றுடன் ஒப்போ பேட் மினி (Oppo Pad Mini) கவனம் ஈர்த்துள்ளது. சிறிய அளவிலான டேப்லெட்டை விரும்பும் பயனர்களை இலக்காகக் கொண்டு உருவாக்கப்பட்டுள்ள இந்த சாதனத்தில், 144Hz OLED டிஸ்ப்ளே, Snapdragon 8 Gen 5 சிப்செட், 8,000mAh பேட்டரி உள்ளிட்ட பல்வேறு சிறப்பம்சங்கள் இடம்பெற்றுள்ளன. இதன் வடிவமைப்பு முதல் விலை வரை முழு விவரங்களைப் பார்க்கலாம்.
கச்சிதமான வடிவமைப்பு.. வெறும் 282 கிராம் எடை
ஒப்போ பேட் மினியின் முக்கியமான சிறப்பம்சங்களில் ஒன்று அதன் வடிவமைப்புதான். மிகவும் மெல்லிய மற்றும் எடை குறைந்த வடிவமைப்பில் உருவாக்கப்பட்டுள்ள இந்த டேப்லெட், வெறும் 282 கிராம் எடையையும் 5.46 மிமீ தடிமனையும் கொண்டுள்ளது. இதன் பின்புறத்தில் வழங்கப்பட்டுள்ள சாஃப்ட் மேட் ஃபினிஷ், கைகளில் பிடிக்கும்போது பிரீமியம் அனுபவத்தை வழங்குகிறது. மேலும், மேல் பகுதியில் சிறிய பில் வடிவ கேமரா அமைப்பும் இடம்பெற்றுள்ளது.
குறைந்த எடை மற்றும் கச்சிதமான அளவு காரணமாக பயணங்களின்போது இதனை எளிதாக எடுத்துச் செல்ல முடியும். ஒரே கையில் பிடித்துக்கொண்டு புத்தகங்கள் படிப்பது, இணையத்தில் தகவல்களைத் தேடுவது மற்றும் சமூக வலைதளங்களைப் பயன்படுத்துவது போன்ற அன்றாடப் பணிகளுக்கும் இது வசதியாக இருக்கும். இருப்பினும், இந்த சாதனத்திற்கு அதிகாரப்பூர்வமான வாட்டர் மற்றும் டஸ்ட் ரெசிஸ்டன்ஸ் சான்றிதழ் வழங்கப்படவில்லை என்பது குறிப்பிடத்தக்கது.
144Hz OLED டிஸ்ப்ளே.. வீடியோ பார்ப்பதற்கு சூப்பர்
டிஸ்ப்ளே அம்சங்களைப் பொறுத்தவரை, ஒப்போ பேட் மினியில் 8.8 இன்ச் அளவிலான 2.5K OLED திரை வழங்கப்பட்டுள்ளது. இதில் 144Hz ரெஃப்ரெஷ் ரேட் இடம்பெற்றுள்ளதால் திரையில் ஸ்க்ரோலிங் செய்வது, கேமிங் விளையாடுவது உள்ளிட்ட செயல்பாடுகள் மிகவும் மென்மையாக இருக்கும்.
மேலும், Dolby Vision மற்றும் HDR10+ தொழில்நுட்ப ஆதரவும் இதில் இடம்பெற்றுள்ளது. இதன் மூலம் ஆழமான கருப்பு நிறங்கள், துல்லியமான வண்ணங்கள் மற்றும் சிறந்த காட்சித் தரத்தைப் பெற முடியும். திரைப்படங்கள், வெப் சீரிஸ்கள் மற்றும் யூடியூப் வீடியோக்களைப் பார்ப்பவர்களுக்கு இந்த டிஸ்ப்ளே கூடுதல் அனுபவத்தை வழங்கும்.
ஆடியோ அனுபவத்திற்காக Dolby Atmos ஆதரவு கொண்ட ஸ்டீரியோ ஸ்பீக்கர்களும் வழங்கப்பட்டுள்ளன. இதனால் வீடியோக்கள் மற்றும் திரைப்படங்களைப் பார்க்கும்போது தெளிவான ஒலியைப் பெற முடியும்.
Snapdragon 8 Gen 5 சிப்செட்.. அசத்தலான செயல்திறன்
செயல்திறனைப் பொறுத்தவரை, ஒப்போ பேட் மினியில் Qualcomm நிறுவனத்தின் Snapdragon 8 Gen 5 சிப்செட் பயன்படுத்தப்பட்டுள்ளது. இது உயர்தர செயல்திறனை எதிர்பார்க்கும் பயனர்களுக்கு முக்கியமான அம்சமாக இருக்கும். ஒரே நேரத்தில் பல்வேறு செயலிகளைப் பயன்படுத்துவது, கேமிங் விளையாடுவது மற்றும் அதிக திறன் தேவைப்படும் பணிகளை மேற்கொள்வது போன்றவற்றைச் சிறப்பாகக் கையாளும் வகையில் இந்த சிப்செட் அமைந்துள்ளது.
பெஞ்ச்மார்க் சோதனைகளிலும் இந்த டேப்லெட் குறிப்பிடத்தக்க முடிவுகளைப் பெற்றுள்ளதாகத் தெரிவிக்கப்பட்டுள்ளது. AnTuTu சோதனையில் 28,81,279 புள்ளிகளைப் பெற்றுள்ளது. Geekbench சோதனையில் சிங்கிள் கோர் பிரிவில் 1,527 புள்ளிகளும், மல்டி கோர் பிரிவில் 7,069 புள்ளிகளும் பதிவாகியுள்ளன.
அதேபோல், 3DMark ஸ்ட்ரெஸ் டெஸ்டில் 4,889 பெஸ்ட் லூப் ஸ்கோரையும், 71.5 சதவீத நிலைத்தன்மையையும் பெற்றுள்ளது. இதன் மூலம் கேமிங் மற்றும் அதிக செயல்திறன் தேவைப்படும் பயன்பாடுகளுக்கு ஏற்ற சாதனமாக இது அமைய வாய்ப்புள்ளது.
கேமரா மற்றும் ஸ்டைலஸ் வசதி.. வேலைகளுக்கும் பயன்படும்
கேமராவைப் பொறுத்தவரை, முன்பக்கத்தில் 8 மெகாபிக்சல் கேமரா வழங்கப்பட்டுள்ளது. அலுவலகக் கூட்டங்கள், ஆன்லைன் வகுப்புகள் மற்றும் வீடியோ கால்கள் போன்ற தேவைகளுக்கு இந்த கேமரா பயன்படும் வகையில் அமைந்துள்ளது.
மேலும், ஸ்டைலஸ் பென் ஆதரவு மூலம் டேப்லெட்டில் குறிப்புகள் எழுதுவது, முக்கியமான டாக்குமெண்ட்களில் தேவையான மாற்றங்களைச் செய்வது மற்றும் பல்வேறு அலுவலகப் பணிகளை மேற்கொள்வது போன்றவற்றையும் செய்ய முடியும். குறிப்பாக மாணவர்கள், அலுவலகப் பணியாளர்கள் மற்றும் டிஜிட்டல் முறையில் குறிப்புகள் எடுப்பவர்களுக்கு இந்த வசதி பயனுள்ளதாக இருக்கும்.
8,000mAh பேட்டரி.. 67W ஃபாஸ்ட் சார்ஜிங்
பேட்டரி அம்சங்களைப் பொறுத்தவரை, ஒப்போ பேட் மினியில் 8,000mAh திறன் கொண்ட பேட்டரி வழங்கப்பட்டுள்ளது. இதன் மூலம் இணையத்தில் பிரவுசிங் செய்வது, புத்தகங்கள் படிப்பது, வீடியோக்கள் பார்ப்பது உள்ளிட்ட அன்றாடப் பயன்பாடுகளுக்கு நீண்ட நேரம் பேட்டரி பேக்கப் கிடைக்கும் என எதிர்பார்க்கப்படுகிறது.
சார்ஜிங் வசதிக்காக 67W ஃபாஸ்ட் சார்ஜிங் ஆதரவு வழங்கப்பட்டுள்ளது. இதன் பெட்டியில் 80W SuperVOOC சார்ஜிங் அடாப்டர் வழங்கப்பட்டாலும், டேப்லெட் அதிகபட்சமாக 67W வேகத்திலேயே சார்ஜ் ஏற்கும் திறன் கொண்டுள்ளது. இதனால் குறுகிய நேரத்தில் பேட்டரியை சார்ஜ் செய்து மீண்டும் பயன்படுத்த முடியும்.
ஒப்போ பேட் மினி விலை எவ்வளவு?
விலை விவரங்களைப் பொறுத்தவரை, ஒப்போ பேட் மினியின் இந்திய விலை சுமார் ரூ.94,999 எனக் குறிப்பிடப்பட்டுள்ளது. 8.8 இன்ச் அளவிலான டேப்லெட்டிற்கு இந்த விலை அதிகமாகவே பார்க்கப்படுகிறது. குறிப்பாக, அடிப்படை ஐபேட் மினியுடன் ஒப்பிடும்போது இதன் விலை கூடுதலாக உள்ளது.
இருப்பினும், சிறிய அளவில் ஃபிளாக்ஷிப் தரத்திலான டேப்லெட் அனுபவத்தை விரும்புபவர்களுக்கு இது ஒரு மாற்றுத் தேர்வாக அமையலாம். OLED டிஸ்ப்ளே, அதிக ரெஃப்ரெஷ் ரேட், சக்திவாய்ந்த சிப்செட், ஸ்டைலஸ் ஆதரவு மற்றும் பெரிய பேட்டரி எனப் பல அம்சங்கள் இதில் இடம்பெற்றுள்ளன.
ஒப்போ பேட் மினி வாங்கலாமா?
மொத்தத்தில், பெரிய அளவிலான டேப்லெட்டுகளை எடுத்துச் செல்வதில் சிரமம் இருப்பதாகக் கருதுபவர்களுக்கும், சிறிய திரையில் பிரீமியம் அனுபவத்தை விரும்புபவர்களுக்கும் ஒப்போ பேட் மினி கவனிக்கத்தக்க சாதனமாக இருக்கிறது. குறிப்பாக கேமிங், வீடியோ பார்ப்பது, இணையப் பயன்பாடு மற்றும் அன்றாட அலுவலகப் பணிகளுக்கு ஏற்ற பல அம்சங்களைக் கொண்டுள்ளது. ஆனால், சுமார் ரூ.94,999 விலை என்பதால் வாங்குவதற்கு முன்பு இதன் விலையையும் சந்தையில் கிடைக்கும் மாற்று டேப்லெட்களையும் ஒப்பிட்டுப் பார்ப்பது நல்லது.
தலைப்பு செய்திகள்
ட்ரெண்டிங் செய்திகள்
