Pro Kabaddi 2023: 2வது வெற்றி பெறுமா தமிழ் தலைவாஸ்? தோல்வியை பரிசளிக்குமா பெங்கால் வாரியர்ஸ்? இன்று மோதல்!

ப்ரோ கபடி லீக் சீசன் 10 இன் 16வது ஆட்டத்தில் பெங்கால் வாரியர்ஸ் டிசம்பர் 10ஆம் தேதி தமிழ் தலைவாஸ் அணியை எதிர்கொள்கிறது.

தமிழ் தலைவாஸ் vs பெங்கால் வாரியர்ஸ் (image source: pkl)

ப்ரோ கபடி லீக் சீசன் 10இன் 16வது ஆட்டத்தில் பெங்கால் வாரியர்ஸ் இன்று தமிழ் தலைவாஸ் அணியை எதிர்கொள்கிறது. இந்த ஆட்டம் இந்திய நேரப்படி இரவு 08:00 மணிக்கு ஸ்ரீ கண்டீரவா உள்விளையாட்டு மைதானத்தில் நடைபெறும்.

கடந்த டிசம்பர் 3ம் தேதி நடந்த கடைசி ஆட்டத்தில் தமிழ் தலைவாஸ் 42-31 என்ற புள்ளிக்கணக்கில் தபாங் டெல்லி கேசிக்கு எதிராக வென்றது. மறுபுறம், பெங்கால் வாரியர்ஸ் கடந்த டிசம்பர் 7ம் தேதி ஜெய்ப்பூர் பிங்க் பாந்தர்ஸ் அணிக்கு எதிராக 28-28 என்ற கணக்கில் டையில் ஈடுபட்டது.

Rise and grind! Kicking off the day with a sunrise sweat session. 💪#IdhuNammaTeam | #GiveItAllMachi | #TamilThalaivas | #ProKabaddi | #Season10 pic.twitter.com/AJL6ZlORU8

— Tamil Thalaivas (@tamilthalaivas) December 8, 2023

பெங்கால் வாரியர்ஸ் vs தமிழ் தலைவாஸ் அணிகள் நேருக்கு நேர்: 

ப்ரோ கபடி லீக் வரலாற்றில், பெங்கால் வாரியர்ஸ் மற்றும் தமிழ் தலைவாஸ் அணிகள் 12 முறை மோதியுள்ளன. இதில், தமிழ் தலைவாஸுக்கு எதிரான 9 வெற்றிகளை பெற்று பெங்கால் வாரியர்ஸ் ஆதிக்கம் செலுத்தியுள்ளது. அதே நேரத்தில், தமிழ் தலைவாஸ் 2 முறை மட்டுமே வெற்றிபெற்றுள்ளது. ஒரு போட்டி டையில் முடிந்தது.

பெங்கால் வாரியர்ஸ் மற்றும் தமிழ் தலைவாஸ் அணிகளுக்கு இடையேயான கடைசி ஆட்டத்தில் 35-30 என்ற கணக்கில் பெங்கால் வாரியஸ் வெற்றி பெற்றது. பெங்கால் வாரியர்ஸ் 1 வெற்றி, 1 டை மற்றும் 0 தோல்வியுடன் 8 புள்ளிகளுடன் பிகேஎல் 10 புள்ளிகள் பட்டியலில் நான்காவது இடத்தில் உள்ளது. அதேசமயம், தமிழ் தலைவாஸ் 5 புள்ளிகளுடன் புள்ளிப்பட்டியலில் ஏழாவது இடத்தில் உள்ளது. இந்த சீசனில் ஒரே போட்டியில் விளையாடியுள்ள தமிழ் தலைவாஸ் ஒரே வெற்றியுடன், தோல்வியடையாத அணியாக வலம் வருகிறது. 

பெங்கால் வாரியர்ஸ் vs தமிழ் தலைவாஸ் சிறந்த வீரர்கள்:

பெங்கால் வாரியர்ஸ்:

2 போட்டிகளில் 14 ரெய்டு புள்ளிகளை குவித்து ரெய்டர் மணிந்தர் சிங் ஆதிக்கம் செலுத்தி வருகிறார். அவர் தனது கடைசி போட்டியில் 4 ரெய்டு புள்ளிகளைப் பெற்றார். இதற்கிடையில், பெங்கால் வாரியர்ஸின் டிபெண்டிங்கில் வைபவ் கார்ஜே சுமையை தாங்குகிறார். இவர் ப்ரோ கபடி லீக் 10ல் 2 போட்டிகளில் 5 டிபெண்ட்ஸ் புள்ளிகளைப் பெற்றுள்ளார்.

தமிழ் தலைவாஸ்:

ப்ரோ கபடி லீக் சீசன் 10ல் தமிழ் தலைவாஸ் அணியின் முன்னணி ரைடராக அஜிங்க்யா பவார் திகழ்ந்து வருகிறார். இவர் இதுவரை 1 போட்டியில் மட்டுமே களமிறங்கி 2 டூ ஆர் டை ரெய்டு புள்ளிகள் உட்பட 18 ரெய்டு புள்ளிகளை குவித்தார்.

சாஹில் குலியா தமிழ் தலைவாஸ் அணிக்கு டிபெண்ட்ஸில் தலைமை தாங்கி 1 போட்டியில் 2 டிபென்ட்ஸ் புள்ளிகளை பெற்றுள்ளார். இதற்கிடையில், ஹிமான்ஷு 1 போட்டியில் 2 புள்ளிகளுடன் அணியின் சிறந்த ஆல்ரவுண்டராக உள்ளார்.

படைக்கவிருக்கும் மைல்கற்கள்:

பெங்கால் வாரியர்ஸின் சுபம் ஷிண்டே 100 டிபெண்ட்ஸ் புள்ளிகளை எட்ட இன்னும் 7 டிபெண்ட்ஸ் புள்ளிகள் மட்டுமே தேவையாக உள்ளது. அதேபோல், பெங்கால் வாரியர்ஸ் அணியில் உள்ள நிதின் ராவல் 100 டிபெண்ட்ஸ் புள்ளிகளை எட்ட இன்னும் 6 டிபெண்ட்ஸ் புள்ளிகள் மட்டுமே தேவையாக உள்ளது.

புரோ கபடி சீசன் 10ஐ நேரலையில் எங்கே பார்ப்பது?

ப்ரோ கபடி சீசன் 10 ஐ ஸ்டார் ஸ்போர்ட்ஸ் நெட்வொர்க் டிவியிலும், Disney+Hotstar மொபைல் ஆப்-களிலும் இலவசமாகவும் கண்டு களிக்கலாம்.