JBL Season 2 : ஜூனியர் பேட்மிட்டன் சீசன் -2 போட்டி தொடர்.. சாம்பியன் பட்டத்தை வென்ற மதுரை இந்தியன்ஸ் அணி
திருச்சியில் நடைபெற்ற ஜீனியர் பேட்மிட்டன் சீசன் -2 போட்டியில் மதுரை இந்தியன்ஸ் அணி, திருச்சி தமிழ் வீராஸ் அணியை வீழ்த்தி சாம்பியன் பட்டத்தை தட்டிச்சென்றது.
திருச்சி மாநகர், ஜமால்முகமது கல்லூரி உள்விளையாட்டு அரங்கத்தில் ஜூனியர் பேட்மிண்டன் லீக் (ஜே.பி.எல். சீசன்-2) போட்டிகள் கடந்த 12-ந்தேதி தொடங்கியது. இந்த போட்டியில் 'ஏ' பிரிவில் சென்னை சிட்டி கேங்ஸ்டர்ஸ், விருதை வேங்கைஸ், தஞ்சை தலைவாஸ், திருவாரூர் டெல்டாகிங்ஸ் அணிகளும். 'பி' பிரிவில் திருச்சி தமிழ் வீராஸ், ரெயின்போ ராக்கர்ஸ், கோவை சூப்பர்கிங்ஸ், மதுரை இந்தியன்ஸ் ஆகிய அணிகளும் இடம் பெற்று விளையாடியது.
பல்வேறு கட்டங்களாக நடைபெற்ற இந்த போட்டியின் அரை இறுதி மற்றும் இறுதி போட்டி நேற்று நடைபெற்றது. முதல் அரை இறுதி போட்டியில் விருதை வேங்கைஸ் அணி, மதுரை இந்தியன்ஸ் அணியை எதிர்கொண்டது. இதில் மதுரை இந்தியன்ஸ் அணி 3-2 என்ற செட் கணக்கில் விருதை வேங்கைஸ் அணியை தோற்கடித்து இறுதி போட்டிக்குள் நுழைந்தது. 2-வது அரை இறுதி போட்டியில் பலம் வாய்ந்த திருச்சி தமிழ் வீராஸ் அணி, தஞ்சை தலைவாஸ் அணியுடன் மோதியது. இதில் திருச்சி தமிழ் வீராஸ் அணி 3-2 என்ற செட் கணக்கில் தஞ்சை தலைவாஸ் அணியை வென்று இறுதி போட்டிக்கு தகுதி பெற்றது.
இதனை தொடர்ந்து நேற்று மாலை திருச்சி தமிழ் வீராஸ் - மதுரை இந்தியன்ஸ் அணிகள் இறுதி போட்டியில் மோதின. இதில் 3-2 என்ற செட் கணக்கில் மதுரை இந்தியன்ஸ் வெற்றி பெற்று ஜூனியர் பேட்மிண்டன் லீக்-2 போட்டியில் சாம்பியன் பட்டம் பெற்றது. பின்னர் பரிசு அளிப்பு விழா நடைபெற்றது. இதில் தமிழ்நாடு பேட்மிண்டன் சங்க செயலாளர் அருணாச்சலம் கலந்து கொண்டு, சாம்பியன் பட்டம் பெற்ற மதுரை இந்தியன்ஸ் அணிக்கு பரிசு கோப்பையை வழங்கினார்.
மேலும் ரூ.30 லட்சம் பரிசு தொகையும், பதக்கமும் வழங்கி பாராட்டு தெரிவித்தார். 2-வது இடம் பிடித்த திருச்சி தமிழ் வீராஸ் அணி வீரர்களுக்கு ரூ.20 லட்சம் பரிசு மற்றும் பதக்கமும் வழங்கப்பட்டன. இதில் 3-வது இடம் பிடித்த தஞ்சை தலைவாஸ் அணிக்கு ரூ.10 லட்சம் பரிசும், 4-வது இடம் பிடித்த விருதை வேங்கைஸ் அணிக்கு ரூ.10 லட்சம் பரிசும் வழங்கப்பட்டது.
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
