இங்கிலாந்துக்கு எதிராக தொடரும் கோலியின் டாஸ் சோகம்..

இங்கிலாந்துக்கு எதிரான மூன்றாவது ஒருநாள் போட்டியிலும், டாஸில் இந்திய அணி கேப்டன் விராட் கோலி தோல்வி அடைந்துள்ளார்.

விராட் கோலி

இந்திய கிரிக்கெட் அணியின் கேப்டன் விராட் கோலி தொடர்ந்து மூன்றாவது முறையாக டாசில் தோற்றார். இந்தியா சுற்றுப்பயணம் செய்துள்ள இங்கிலாந்து கிரிக்கெட் அணி டெஸ்ட், T20 தொடர்களை தொடர்ந்து ஒருநாள் தொடரில் விளையாடி வருகிறது. டெஸ்ட், T20 தொடர்களை பறிகொடுத்த இங்கிலாந்து, ஒருநாள் தொடரை கைப்பற்றத் தீவிரம் காட்டி வருகிறது. முதல் இரண்டு போட்டிகளில் இரு அணிகளும் தலா ஒரு போட்டியை வென்ற நிலையில், கோப்பை யாருக்கு என்பதை முடிவுசெய்யும் மூன்றாவது போட்டி புனேவில் தற்போது நடைபெற்று வருகிறது.

டாஸ் வென்ற இங்கிலாந்து அணி இந்திய அணியை பீல்டிங்கை தேர்வு செய்தது. துரதிர்ஷ்டவசமாக இந்திய கேப்டன் கோலி இந்த முறையும் டாஸில் கோட்டை விட்டார். டெஸ்ட், T20 மற்றும் ஒருநாள் தொடரையும் சேர்த்து ஒட்டு மொத்தமாக 12 போட்டிகளில் 3ல் மட்டுமே கோலி டாஸ் ஜெயித்திருக்கிறார். ஒட்டு மொத்தமாக அனைத்து விதமான போட்டிகளிலும் சேர்த்து இங்கிலாந்துக்கு எதிராக 35 போட்டிகளில் 8ல் மட்டுமே அவர் தலைமையிலான இந்திய அணி டாஸ் வென்றுள்ளது. டாஸில் தோற்றாலும் டெஸ்ட் மற்றும் T20 தொடரை கோலி தலைமையிலான அணி வென்றுள்ளது என்பது குறிப்பிடத்தக்கது.