Rohit Sharma To Virat Kohli: இந்த ஆண்டில் நாட்டுக்காக ஒரு டி20 போட்டி கூட ஆடல.. ஆனால் ஐபிஎல் மட்டும் ஆடும் முக்கிய வீரர்கள்..

Rohit Sharma To Virat Kohli: ஐசிசி டி20 தரவரிசைப் பட்டியலில் இந்திய அணி 14,267 புள்ளிகளுடன் முதல் இடத்தில் உள்ளது.

விராட் கோலி - ரோகித் சர்மா

ஐசிசி டி20 போட்டி தரவரிசையைப் பார்த்தால் இந்திய அணிதான் தற்போது முதல் இடத்தில் உள்ளது. 

கடந்த ஆண்டு டி20 உலகக் கோப்பையில் இந்தியா வெளியேறியதைத் தொடர்ந்து பெரிய மாற்றங்களைச் செய்ய பிசிசிஐ முடிவு செய்ததால், பல மூத்த வீரர்கள் இந்தியாவின் டி 20 போட்டிகளில் பங்கு பெற முடியாமல் போனது.  ஐபிஎல் மற்றும் உள்நாட்டு போட்டிகளில் சிறப்பாக செயல்பட்ட இளைஞர்களுக்கு இந்திய அணி நிர்வாகம் தொடர்ந்து வாய்ப்புகளை வழங்கி வருகிறது. ஹர்திக் பாண்டியா கடந்த ஆண்டு டி20 உலகக் கோப்பைக்குப் பின்னர் இருந்து இந்திய டி20 அணியை தொடர்ந்து வழிநடத்தி வருகிறார்.

2023ல் இதுவரை இந்தியாவுக்காக ஒரு டி20 போட்டியில் கூட விளையாடாத ஐந்து வீரர்களை பார்க்கலாம்.

அடுத்த ஆண்டு டி20 உலகக் கோப்பை 2024ல் விளையாட விருப்பம் தெரிவித்த இந்திய அணியின் அனைத்து வடிவிலான கேப்டன் ரோஹித் ஷர்மா , 2022 டி20 உலகக் கோப்பை அரையிறுதிக்குப் பிறகு இந்தியாவுக்காக எந்த டி20 போட்டியிலும் விளையாடவில்லை. ரோஹித்தைப் போலவே, முன்னாள் இந்திய கேப்டன் விராட் கோலியும் 2023 இல் இதுவரை T20I போட்டியில் விளையாடவில்லை. 

கடந்த இரண்டு டி20 உலகக் கோப்பைகளில் இந்திய அணியில் இடம்பிடித்த இந்தியாவின் மூத்த ஆஃப் ஸ்பின்னர் ரவிச்சந்திரன் அஸ்வின் , 2022 டி20 உலகக் கோப்பைக்குப் பிறகு இந்திய அணிக்காக ஒரு டி20 போட்டியில் விளையாடவில்லை என்பதும் குறிப்பிடத்தக்கது. 

மூத்த வேகப்பந்து வீச்சாளர் முகமது ஷமி கடந்த ஆண்டு டி20 உலகக் கோப்பைக்கான இந்திய அணியில் கடைசி நேரத்தில் சேர்க்கப்பட்டார். கடைசி நிமிடத்தில் காயமடைந்த ஜஸ்பிரித் பும்ராவுக்கு பதிலாக அவர் சேர்க்கப்பட்டார். இந்தப் போட்டியில் இந்தியாவின் வேகப்பந்து வீச்சுக்கு ஷமி தலைமை தாங்கினார். இதுவரை 2023 இல், முகமது ஷமி இந்திய அணிக்காக இன்னும் ஒரு டி20 போட்டியில் விளையாடவில்லை.

அதேபோல் இந்திய அணியின் விக்கெட் கீப்பர்களில் ஒருவரான கே.எல். ராகுல் இந்த ஆண்டு இதுவரை ஒரு டி20 போட்டியில் கூட விளையாடவில்லை என்பது குறிப்பிடத்தக்கது. இவர் ஐபிஎல் தொடரின் போது ஏற்பட்ட காயத்தில் இருந்து மீண்டு வருவதால், இந்த ஆண்டு இறுதிக்குள் இந்திய அணிக்காக விளையாடுவாரா என்பதை பொறுத்து இருந்துதான் பார்க்க வேண்டும். 

இந்திய அணியின் முக்கிய மற்றும் சீனியர் வீரர்கள் இந்த ஆண்டில் இந்திய அணிக்காக ஒரு டி20 போட்டியில் கூட விளையாடவில்லை என்றாலும், ஐசிசி தரவரிசைப் பட்டியலில் இந்திய அணி கடைசி 54 போட்டிகளில் 14 ஆயிரத்து 267 புள்ளிகளுடன் முதல் இடத்தில் உள்ளது என்பதும் குறிப்பிடத்தக்கது. 

அதேபோல் மேலே குறிப்பிட்ட ஐந்து வீரர்களும் இந்தியாவில் நடைபெறும் பிரமாண்டமான கிளப் கிரிக்கெட் தொடரான ஐபிஎல் தொடரில் விளையாடி வருகின்றனர் என்பதும் குறிப்பிடத்தக்கது.