kanda sashti 2024: காஞ்சிபுரமா திருப்பதியா?..... குமரக்கோட்டம் முருகர் கோயிலில் குவிந்த பக்தர்கள்.. சஷ்டி விரதம் கோலாகலம்

kanda sashti: சஷ்டி முதல் நாளையொட்டி ஆறுமுக பெருமானுக்கு முழுவதும் மஞ்சள் நிற மலர்களினால் அலங்காரம் சேவிக்கப்பட்டு காட்சி.

காஞ்சிபுரம் குமரக்கோட்டம் கோயில்

Source : ABP NADU

தமிழ் கடவுள் முருகப்பெருமானின் பெருமையை விளக்கும் கந்தபுராணம் அரங்கேறிய திருத்தலம் என கோயில் நகரமான காஞ்சிபுரத்தில் பிரசித்தி பெற்று விளங்கும் குமரக்கோட்டம் முருகன் கோயிலில் ஆண்டுதோறும் கந்த சஷ்டி விழா விமரிசையாக நடைபெறுவது வழக்கம். அந்த வகையில் இந்த ஆண்டு கும்பாபிஷேக விழா நடைபெறுவதை முன்னிட்டு, கந்த சஷ்டி விழாவை முன்னிட்டு லட்சார்ச்சனை மட்டுமே நடைபெறுகிறது.

கந்த சஷ்டி விழா

இந்தநிலையில் குமரக்கோட்டம் முருகப்பெருமான் திருக்கோவிலில் காலை நேரத்திலேயே ஏராளமான முருக பக்தர்கள் திரண்டு வந்து பச்சை ஆடை உடுத்தி பச்சை மணி மாலை அணிந்து சஷ்டி விரதம் இருக்க தொடங்கினார்கள். கந்த சஷ்டி விழாவை முன்னிட்டு ஆறுமுக பெருமானுக்கு ஆறு கால லட்சணங்கள் ஆனது நடைபெறும். இந்த லட்சண விழாவை ஒட்டி ஒவ்வொரு நாளும் ஆறுமுகப் பெருமானாக காட்சியளிக்கும் முருகப்பெருமானுக்கு சிறப்பு அபிஷேகம் செய்து ஒவ்வொரு நாள் ஒவ்வொரு நிறங்களினால் ஆன மலர் மாலைகள் அணிவித்து பக்தர்களுக்கு காட்சியளிப்பார். 

மஞ்சள் நிற மலர் மாலைகள்

அந்த வகையில் கந்த சஷ்டி விழாவின் முதல் நாளான இன்று ஆறுமுகப்பெருமானுக்கு முழுவதும் மஞ்சள் நிற மலர் மாலைகள் அணிவித்து சிறப்பு லட்சணங்கள் ஆனது நடைபெற்று வருகிறது.‌ காலை நேரத்திலேயே சஷ்டி விரதம் இருக்க வந்த பக்தர்கள் ஆறுமுகப்பெருமானுக்கு, சிவாச்சாரியார்கள் வேத மந்திரங்கள் ஒலிக்க லட்சார்ச்சனை செய்து சிறப்பு வழிபாடு மேற்கொண்டு சஷ்டி விரதத்தை தொடங்கி கோவில் வளாகத்தில் உள் மற்றும் வெளி பிரகாரங்களில் 108 சுற்றுகள் சுற்றிவர தொடங்கினார்கள்.

சஷ்டி விரதம் தொடங்கி இருப்பதால் காஞ்சிபுரம் மற்றும் அதன் சுற்றுவட்டார பகுதிகளைச் சேர்ந்த முருக பக்தர்கள் ஏராளமானோர் குமரக்கோட்டம் முருகன் கோவிலுக்கு வந்து சுவாமி தரிசனம் செய்து வருவதால் கோயில் வளாகம் முழுவதுமே பக்தர்கள் வெள்ளத்தில் மூழ்கி உள்ளது குறிப்பிடத்தக்கது.

காஞ்சிபுரம் குமரக்கோட்டம் முருகர் கோயில்

மூலவர் முருகப்பெருமான் ஜபமாலை, கமண்டலம் ஏந்தி படைப்புக் கோலமூர்த்தியாகக் காட்சி தருகிறார். பிரம்மனுக்குப் பிரணவத்தின் பொருள் தெரியாதபோது அவனைக் கூட்டிச் சிறையிலிட்டுப் பின்பு அவனுடைய தொழிலாகிய படைப்புத் தொழிலை தான் மேற்கொண்ட திருக்கோல காட்சி, முருகப்பெருமானை அலட்சியம் செய்த பிரம்மனிடம் தர்க்கம் (சண்டை) செய்ய அவரிடமிருந்து உரிய பதில் வராததால் பிரம்மனை சிறைப் பிடிக்கிறார் முருகன். விடுவிக்க கோரி ஈசனின் கட்டளையை எடுத்துரைத்த நந்தி தேவனையும் திருப்பி அனுப்பி விடுகிறார். இறைவன் நேரில் சென்று எடுத்துரைத்து பிரம்மனை விடுவிக்க செய்கிறார். தந்தையின் கட்டளையை மீறியதற்கு பிராயச்சித்தம் வேண்டி சிவலிங்கம் அமைத்து வழிபட்டார். அச்சிவலிங்கமே தேவசேனாதீச்வரர் என்பது மூலத்தில் அறியப்பட்டது.

பிரளய பெருவெள்ளத்தில் அடித்து செல்லப்பட்ட மார்க்கண்டேய முனிவர், திருமாலைக் கண்டு உலகத்து பொருட்களெல்லாம் எங்கே போயின என வினவ, எனது வயிற்றுக்குள் அடக்கம் என்று கூறிய திருமாலை இகழ்ந்தார் முனிவர். இதனால் மனம் வருந்திய திருமால் பிலாகாசத்து அன்னையை வழிபட்டு, பின்னர் இங்கு வந்து ஈசனருகில் சந்நிதி கொண்டார். என்றும் அன்புடயன் ஆனதால் உருகும் உள்ளத்தான் எனும் திருநாமம் கொண்டாரென்பது இத்தல வரலாறாக உள்ளது. காஞ்சிபுரத்தில் பல பிரசித்தி பெற்ற கோவில்கள் இருந்தாலும் முருகருக்கு முக்கிய கோவிலாக இந்த கோவில் உள்ளது. குறிப்பாக முருகருக்கு இருக்கக்கூடிய அறுபடை கோவில்களுக்கு அடுத்த முக்கியத்துவம் வாய்ந்த கோவிலாக காஞ்சிபுரம் குமரக்கோட்டம் கோவிலில் விளங்குகிறது.