Trump Govt. Atrocity: ட்ரம்ப் நிர்வாகம் அட்ராசிட்டி.. ஒரே நாள்ல ஒரே துறைல 10,000 பேர் வேலை காலி.. எதுக்கு தெரியுமா.?

அமெரிக்காவில், சுகாதாரத்துறை ஊழியர்கள் 10 ஆயிரம் பேரை ஒரே நாளில் வேலையை விட்டு தூக்கியுள்ளது ட்ரம்ப் நிர்வாகம். அது எதற்காக என்று பார்க்கலாம்.

அமெரிக்க சுகாதாரத்துறையில் ஒரே நாளில் 10000 பேர் பணி நீக்கம்

Source : @RobertKennedyJr

அமெரிக்க அதிபராக ட்ரம்ப் பதவியேற்றதிலிருந்து அதிரடிகளுக்கு பஞ்சம் இல்லாமல் இருக்கிறது. தினந்தோறும் ஏதாவது செய்து, செய்திகளில் இடம்பெற்று வருகிறது ட்ரம்ப் நிர்வாகம். அந்த வகையில், நேற்று ஒரே நாளில், சுகாதாரத்துறை ஊழியர்கள் 10,000 பேர் வேலையை விட்டு தூக்கி எறியப்பட்டுள்ளனர். இது தற்போது பெரும் பேசுபொருளாகியுள்ளது.

அதிரடிகளை அரங்கேற்றிவரும் ட்ரம்ப் நிர்வாகம்

இரண்டாவது முறையாக அமெரிக்க அதிபராக ட்ரம்ப் பதவியேற்றது முதல், நிர்வாகத்தில் பல்வேறு அதிரடி மாற்றங்களை செய்துவருகிறார் அதிபர் ட்ரம்ப். அமெரிக்காவில் இதுவரை இல்லாத வகையில், செயல்திறன் துறை என்ற புதிய துறையையே உருவாக்கிய அவர், அதற்கு தலைவராக எலான் மஸ்க்கை நியமித்தார். அப்போது முதல், பல்வேறு துறைகளில் நடைபெற்றுவரும் குளறுபடிகளை சரி செய்வதுடன், செலவை குறைக்கும் நடவடிக்கைகளிலும் அந்த துறை தீவிரம் காட்டி வருகிறது.

ஒவ்வொரு துறையிலும் சரியாக வேலை செய்யாதவர்கள், கூடுதலாக இருப்பவர்கள் என, தேடித் தேடி தட்டித் தூக்கி வருகிறது எலான் மஸ்க்கின் துறை. செலவை குறைக்கிறேன் என்ற பெயரில், ஏற்கனவே பல துறைகளைச் சேர்ந்த ஏராளமானோரை ட்ரம்ப் நிர்வாகம் வேலையை விட்டு தூக்கியுள்ளது. இந்த செயலுக்கு பல்வேறு தரப்பிலும் எதிர்ப்புகள் எழுந்துவரும் நிலையில், தற்போது சுகாதாரத்துறையிலேயே கை வைத்துள்ளது ட்ரம்ப் நிர்வாகம்.

சுகாதாரத்துறையில் ஒரே நாளில் 10,000 பேருக்கு வேலை காலி

அமெரிக்காவில், சுகாதார மற்றும் மனித சேவைகள் துறையில், விரிவான மறுசீரமைப்பை மேற்கொள்ளும் வகையில், நேற்று ஒரே நாளில் 10,000 பேர் வேலையை விட்டு நீக்கப்பட்டுள்ளனர். இதில், மருத்துவ ஆராய்ச்சி, புதிய மருந்துகளுக்கு ஒப்புதல் வழங்குவது, பொது சுகாதார கண்காணிப்பு ஆகியவற்றில் ஈடுபட்டுவந்த ஆராய்ச்சியாளர்கள், விஞ்ஞானிகள், மருத்துவர்கள் மற்றும் உயர் அதிகாரிகள் அடங்குவர்.

தேசிய சுகாதார நிறுவனங்களின் இயக்குநராக டாக்டர். ஜெய் பட்டாச்சார்யா பொறுப்பேற்ற அதே நாளில், நிறுவனத்தின் பல மூத்த தலைவர்களுக்கு நிர்வாக விடுப்பு அளிக்கப்பட்டுள்ளது. இத்துறையில் உள்ள மொத்தம் 27 நிறுவனங்கள் மற்றும் மையங்களில் உள்ள 4 இயக்குநர்கள் மற்றும் தகவல் தொடர்பு குழுக்கள் அனைத்தும் நீக்கப்பட்டுள்ளதாக தெரிவிக்கப்பட்டுள்ளது.

இதேபோல், உணவு மற்றும் மருந்து நிர்வாகத்துறையில், மின்னணு சிகரெட்டுகள், பிற புகையிலைப் பொருட்களுக்கான புதிய விதிமுறைகளை வகுக்கும் பிரிவு உள்ளிட்ட அனைத்து பிரிவுகளும் கலைக்கப்பட்டுவிட்டதாக கூறப்பட்டுள்ளது.

இதனிடையே, சுகாதார மற்றும் மனித சேவைகள் துறையை நெறிப்படுத்தவும், நாள்பட்ட நோய்களை எதிர்த்து போராட முன்னுரிமை அளிக்கும் விதமாகவும் இந்த பணி நீக்கங்கள் நடந்துள்ளதாக, அத்துறையின் செயலாளர் ராபர்ட் எஃப் கென்னடி ஜூனியர் தெரிவித்துள்ளார். மேலும், புரட்சி தொடங்குவதாகவும், ஆரோக்கியமான அமெரிக்காவிற்காக புதிதாக உருவாக்கப்பட்ட நிர்வாகத்தின் கீழ் பல நிறுவனங்களை ஒருங்கிணைப்பதற்கான திட்டம் குறித்தும் அவர் தனது பதிவில் குறிப்பிட்டுள்ளார்.

எனினும், இந்த திடீர் பணி நீக்கத்திற்கு, பொது சுகாதார நிபுணர்கள் மற்றும் சட்டத்துறையினர் எதிர்ப்பு தெரிவித்துள்ளனர். மாநில அட்டர்னி ஜெனரல்களின் கூட்டணி, ட்ரம்ப் நிர்வாகத்தின் மீது வழக்கு தொடர்ந்துள்ளது. இந்த பணி நீக்கம் சட்டவிரோதமானது என கூறியுள்ள அவர்கள், இதனால், வலி நிவாரணிகளுக்கான நெருக்கடி அதிகரிக்கும் என்றும், மனநல மருத்துவ சேவைகள் பாதிக்கப்படும் என்றும் தங்கள் வாதத்தை முன்வைத்துள்ளனர்.