திருக்கோவிலூர் இடைத்தேர்தல்; விழுப்புரத்தில் இருந்து அனுப்பப்பட்ட மின்னணு வாக்குப்பதிவு இயந்திரம்

திருக்கோவிலூர் சட்டமன்றத் தொகுதி இடைத்தேர்தலுக்கு மின்னணு வாக்குப்பதிவு இயந்திரம் விழுப்புரத்தில் இருந்து அனுப்பி வைக்கப்பட்டன.

திருக்கோவிலூர் இடைத்தேர்தலுக்கு மின்னணு வாக்குப்பதிவு இயந்திரம் அனுப்பப்பட்டது

விழுப்புரம்: நாடாளுமன்ற தேர்தலுடன் திருக்கோவிலூருக்கும் இடைத்தேர்தல் நடைபெற உள்ளதால் அந்தத் தேர்தலுக்கு பயன்படுத்த உள்ள 575 மின்னணு வாக்குப்பதிவு இயந்திரம் விழுப்புரத்தில் இருந்து இன்று ஆட்சியர் பழனி பார்வையிட்டு அனுப்பி வைத்தார். விழுப்புரம் மாவட்ட தொகுதிக்கு உட்பட்ட திருக்கோவிலூர் சட்டமன்ற உறுபினராக இருந்த திமுக முன்னாள் அமைச்சர் பொன்முடியின் பதவி வருமானத்திற்கு அதிகமாக சொத்து சேர்த்த வழக்கில் நீதிமன்ற தீர்ப்பு படி பறிக்கப்பட்டன. திருக்கோவிலூர் சட்டமன்ற தொகுதி காலியாக உள்ளதாகவும் அறிவிக்கப்பட்டுள்ளது.

திருக்கோவிலூர் சட்டமன்ற தொகுதி  காலியாக உள்ளதாக அறிவிக்கப்பட்டுள்ளதால்  நாடாளுமன்ற தேர்தலுடன்  இடைத்தேர்தலும் நடைபெற தேர்தல் ஆணையம் நடவடிக்கை எடுத்து வருகிறது. இடைத்தேர்தலுக்கு பயன்படுத்தவுள்ள மின்னணு வாக்குப்பதிவு இயந்திரங்கள் தேர்தல் ஆணையத்தின் கட்டுப்பாட்டில் உள்ள விழுப்புரம் சேமிப்பு கிடங்கிலிருந்து மின்னணு வாக்குப்பதிவு இயந்திரம் அனைத்து கட்சியினர் முன்னிலையில் ஆட்சியர் பழனி பார்வையிட்டு திருக்கோவிலூருக்கு இன்று அனுப்பி வைத்தார். 

மாவட்ட தேர்தல் அலுவலர்/மாவட்ட ஆட்சியர் தெரிவிக்கையில், சென்னை பொது தேர்தல் துறை தலைமை தேர்தல் அலுவலர் மற்றும் தேர்தல் ஆணைய உத்தரவின்படி, தற்போது விழுப்புரம் மாவட்டத்தில் உள்ள தமிழ்நாடு அரசு சேமிப்புக் கிடங்கில் இருப்பு வைக்கப்பட்டுள்ள 575 (EVM (BUs+ CUs) & VVPAT) மின்னணு வாக்குப்பதிவு இயந்திரங்களை வெளியில் எடுத்து திருக்கோயிலூர் சட்டமன்றத் தொகுதி இடைத்தேர்தலுக்கு பயன்படுத்தும் வகையில், கள்ளக்குறிச்சி மாவட்டம், திருக்கோயிலூர் வட்டாட்சியர் அலுவலகத்தில் முதல் கட்ட பரிசோதனை (First Level Checking) செய்வதற்காக அனுப்பி வைத்திட அறிவுறுத்தப்பட்டது.

அதனடிப்படையில், இன்றைய தினம், விழுப்புரம் மாவட்டத்தில் உள்ள தமிழ்நாடு அரசு சேமிப்பு கிடங்கு அங்கீகரிக்கப்பட்ட அரசியல் கட்சி பிரதிநிதிகள் முன்னிலையில் திறக்கப்பட்டு, தமிழ்நாடு அரசு சேமிப்புக் கிடங்கில் இருப்பு வைக்கப்பட்டுள்ள தலா 575 (EVM (BUS+ CUs) & VVPAT) மின்னணு வாக்குப்பதிவு இயந்திரங்கள் கள்ளக்குறிச்சி மாவட்டம், 76.திருக்கோயிலூர் சட்டமன்ற தொகுதி இடைத்தேர்தல் பயன்பாட்டிற்கு அனுப்பும் பணி மேற்கொள்ளப்பட்டது என மாவட்ட தேர்தல் அலுவலர்/மாவட்ட ஆட்சியர் டாக்டர் சி.பழனி தெரிவித்தார்.

இந்நிகழ்வின்போது, விழுப்புரம் வருவாய் கோட்டாட்சியர் காஜா சாகுல் ஹமீது, மாவட்ட ஆட்சியரின் நேர்முக உதவியாளர் (தேர்தல்) தமிழரசன், விழுப்புரம் வருவாய் வட்டாட்சியர் வசந்த கிருஷ்ணன், தனி வட்டாட்சியர் (தேர்தல்) கணேஷ், அனைத்து அங்கீகரிக்கப்பட்ட அரசியல் கட்சி பிரதிநிதிகள் உட்பட பலர் உடனிருந்தனர்.