NEET Exam: "இந்தியா கூட்டணி வெற்றி பெற்றால் தமிழ்நாட்டில் நீட் தேர்வு விலக்கு நிச்சயம்".. அமைச்சர் அன்பில் உறுதி!

தமிழ்நாட்டில் நீட் தேர்விற்கு விலக்கு நிச்சியம் கிடைக்கும், அதற்காக திமுக அரசு தொடர்ந்து சட்ட ரீதியான போராட்டத்தை முன்னெடுத்துக்கொண்டே இருக்கும் என அமைச்சர் அன்பில் மகேஷ் தெரிவித்தார்.

தமிழ்நாடு பள்ளிகல்விதுறை அமைச்சர் அன்பில் மகேஷ்

சென்னை கலைவானர் அரங்கில் நீட் தேர்வை ரத்து செய்ய வலியுறுத்தி திமுக இளைஞர் அணி ,மருத்துவ மற்றும் மாணவர் அணி சார்பில் மாபெரும் கையெழுத்து இயக்கத்தை திமுக இளைஞரணி செயலாளர் உதயநிதி ஸ்டாலின் துவக்கி வைத்தார்.  இந்நிலையில் திருச்சி சத்திரம் பேருந்து நிலையம் அருகே உள்ள தனியார் மஹாலில்  தமிழ்நாடு பள்ளிகல்விதுறை அமைச்சர் அன்பில் மகேஷ் பொய்யாமொழி கலந்து கொண்டு கையெழுத்து இயக்கத்தை துவக்கி வைத்தார். மேலும் இளைஞரணி செயலாளர் உதயநிதி ஸ்டாலின் வலியுறுத்தியது போல கண்டிப்பாக கட்சி பாகுபாடு இன்றி அனைவரையும் அழைத்து ஒன்றுபட்டு நீட் தேர்வுக்கு எதிராக குரல் கொடுக்க வேண்டும் என்று கேட்டுக் கொண்டார்.

இந்த கையெழுத்து இயக்கத்தில் செய்தியாளர்களை சந்தித்து பேசிய அமைச்சர் அன்பில் மகேஷ் பொய்யாமொழி  கூறியது.. "இட ஒதுக்கீடாக இருந்தாலும், இந்தி எதிர்ப்பாக இருந்தாலும், ஜல்லிக்கட்டு போராட்டமாக இருந்தாலும் நமது தமிழ்நாடு மாநில உரிமைகளை மீட்டெடுப்பதில் எப்பொழுதும் முதல் குரல் கொடுக்கும்.  கடந்த மாதம் நடைபெற்ற உண்ணாவிரதப் போராட்டமாக இருந்தாலும் ,சரி கையெழுத்து இயக்கமாக இருந்தாலும் சரி, அது சார்ந்த சட்ட போராட்டத்திலும் முழுமையாக ஈடுபடுத்திக் கொண்டு இருக்கும் போது கண்டிப்பாக வெற்றி கிடைக்கும்.

இந்தியா கூட்டணி வெற்றிபெறும் போது 15 மாதத்தில் எய்ம்ஸ் மருத்துவமனையை கொண்டு வர முடியும். குறிப்பாக நீட் தேர்வுக்கான விலக்கையும் பெற்று தருவோம். ஏற்கனவே ஆளுநர் மாளிகைக்கு தனி தீர்மானத்தை நிறைவேற்றிக் கொடுத்த போது அது அங்கேயே தூங்கிக் கொண்டிருந்தது. இந்த பிரச்சனை ஆளுநருக்கு மாநில அரசுக்கு உள்ள ஈகோ பிரச்சனை கிடையாது. இது மருத்துவ கனவில் உள்ள மாணவ, மாணவிகளின் பிரச்சினை ஆகும்.  ஒன்றிய அரசு நம் பக்கம் இல்லை என்கிற வேதனையும் பாரமும் உள்ளது.

ஒன்றிய அரசு நமக்கான ஒன்றிய அரசாக அமையும் பொழுது நாம் என்ன சொல்கிறோமோ அதை காது கொடுத்து அவர்கள் கேட்பார்கள். சமீபத்தில் வெளியான சிஏஜி அறிக்ககை என்ன சொல்கிறது, என்றால் தனியார் பயிற்சி வகுப்புகளுக்கு மறை முகமாக அதிமுக அரசு உதவி செய்துள்ளது போல் காட்டுகிறது. நீட் தேர்வு எழுதச் சென்ற குழந்தைகளின் உடைகள் எப்படி எல்லாம் கிழித்தெறியப்பட்டு, எப்படியெல்லாம் சோதனைக்கு உள்ளாக்கப்பட்டார்கள் என்பதை நாம் கண்கூடாக பார்த்தோம். ஆனால் புதிய ஆடைகளை கொடுத்து நீங்கள் அனைவரும் சமம் என்று பள்ளிக் கூடத்திற்கு செல்ல சொல்வதுதான் திராவிட மாடல் அரசு,  அவர்களின் மாடல் என்பது, உடைகளை கிழித்தெறியும் மாடலாக இருக்கிறது. திமுக தொடர்ந்து சட்ட ரீதியான போராட்டங்களை முன்னெடுத்து நிச்சயம் நீட் தேர்விற்கு விலக்கு கொண்டு வரும் என்பதில் சந்தேகம் இல்லை" என தெரிவித்தார்.