UN Award: மக்களைத்தேடி மருத்துவம் திட்டத்துக்கு ஐ.நா.விருது- முதல்வர் ஸ்டாலின் பெருமிதம்!

நமது திட்டம், சமூகத்தில் ஏற்படுத்தி இருக்கும் தாக்கத்தின் அடையாளம்தான் ஐக்கிய நாடுகள் அமைப்பின் 2024-ஆம் ஆண்டிற்கான United Nation Interagency Task Force Award விருது!- முதல்வர் ஸ்டாலின்.

மக்களைத் தேடி மருத்துவம் திட்டம்

Source : சிறப்பு ஏற்பாடு

’மக்களைத் தேடி மருத்துவம்’ திட்டத்துக்கு ஐ.நா.விருது கிடைத்திருப்பதாகவும் 1.8 கோடி தமிழக மக்களுக்கு இந்தத் திட்டம் சென்று சேர்ந்திருப்பதாகவும் முதல்வர் ஸ்டாலின் பெருமிதம் தெரிவித்துள்ளார்.

இதுகுறித்து இன்று அவர் கூறி உள்ளதாவது:

’’இந்தியத் துணைக் கண்டத்துக்கே முன்னோடித் திட்டமாக நமது திராவிட மாடல் அரசில் செயல்படுத்தப்பட்டுள்ள மக்களைத் தேடி மருத்துவம் திட்டத்திற்கு உலக அங்கீகாரம் தேடி வந்திருக்கிறது!

ஐ.நா. விருது

ஒரு கோடியே 80 லட்சத்துக்கும் அதிகமான மக்கள் இதுவரையில், இந்தத் திட்டத்தால் பயன் பெற்றுள்ளனர். ஒவ்வொருவரது இல்லத்துக்கும் சென்று மருத்துவச் சேவைகளை வழங்கும் நமது திட்டம், சமூகத்தில் ஏற்படுத்தி இருக்கும் தாக்கத்தின் அடையாளம்தான் ஐக்கிய நாடுகள் அமைப்பின் 2024-ஆம் ஆண்டிற்கான United Nation Interagency Task Force Award விருது!

சிறப்பான முறையில் இந்தத் திட்டத்தைச் செயல்படுத்தி - கண்காணித்து - மேம்படுத்தி வரும் அமைச்சர் மா.சுப்பிரமணியனுக்கும், அவருக்குத் துணை நிற்கும் துறைச் செயலாளர் மற்றும் மருத்துவர்கள், செவிலியர்கள், மருத்துவம் மற்றும் மக்கள் நல்வாழ்வுத் துறைப் பணியாளர்கள் அனைவருக்கும் என்னுடைய வாழ்த்துகள்!

இந்தத் திட்டம் இன்னும் சிறப்பாகச் செயல்படுத்தப்பட்டு மக்களுக்குப் பயனளிப்பதைத் தொடர்ந்து உறுதி செய்வோம்!.’’

இவ்வாறு முதல்வர் ஸ்டாலின் தெரிவித்துள்ளார். 

Delighted to announce that #MakkalaiThediMaruthuvam, our #DravidianModel Government's pioneering healthcare scheme for the Indian subcontinent, has earned the prestigious @UN-AITF Award. With over 1.80 crore beneficiaries, this game-changing initiative is transforming lives by… pic.twitter.com/i8Zxr6cVdB

— M.K.Stalin (@mkstalin) October 7, 2024

சுய உதவிக் குழு உறுப்பினர்கள் மூலம் மருத்துவம்

மக்களைத் தேடி மருத்துவத் திட்டம் தேசிய சுகாதார இயக்கத்தின் கீழ், மருத்துவம் - மக்கள் நல்வாழ்வுத் துறையின் மூலமாக தொற்றா நோய்களை கண்டறிவதற்காக அதிக ஈடுபாட்டுடன் கூடிய சுய உதவிக் குழு உறுப்பினர்களை மகளிர் சுகாதார தன்னார்வலராக (WHV) நியமித்துச் செயல்படுத்தப்படுகிறது. கிராமப்புற மற்றும் நகர்ப்புரங்களில் முறையே 8,713 மற்றும் 2,256 மகளிர் சுகாதார தன்னார்வலர்கள் துணை சுகாதார மையங்களுடன் (HSC) இணைக்கப்பட்டு செயல்படுகின்றனர்.

மகளிர் சுகாதார தன்னார்வலர்கள் (WHV) தொற்றா நோய்களைக் கண்டறிந்து, அவர்களுக்கு ஆலோசனைகளை வழங்குவதோடு மட்டுமல்லாமல் நாள்பட்ட நோயாளிகளுக்கு மருந்துகளை வீடுகளுக்கே சென்று வழங்குகிறார்கள். இந்தத் திட்டத்தை ஐ.நா. அங்கீகரித்துள்ளது குறிப்பிடத்தக்கது.