கரூரில் விஷவாயு தாக்கி மேலும் ஒருவர் உயிரிழப்பு - கழிவுநீர் தொட்டியில் கிடந்த சடலம்

கோபால் வயது 36 என்ற இளைஞர் இரண்டு நாட்களாக வீட்டிற்கு வராத நிலையில் அவரது சகோதர சரவணன் என்பவர் நேரடியாக வந்து கட்டிடத்தில் பார்த்தபோது உள்ளே இறந்த நிலையில் கிடப்பது தெரிய வந்தது.

விஷவாயு தாக்கி இறந்த கோபால்

கரூர் சுக்காலியூர்  பகுதியில் இரண்டு நாட்களுக்கு முன்பு விஷவாயு தாக்கி 3 பேர் இறந்த நிலையில் மேலும் கழிவுநீர் தொட்டியில் உயிரிழந்த நிலையில் ஒரு உடல் கண்டெடுக்கப்பட்டது அதிர்ச்சியை ஏற்படுத்தியுள்ளது.

கரூர் அடுத்த சுக்காலியூர், காந்தி நகர் பகுதியில் குணசேகரன் என்பவரின் புதிய வீடு ஒன்று கட்டுமான பணி நடைபெற்று வருகின்றது. கடந்த இரண்டு மாதத்திற்கு முன்பு கழிவுநீர் தொட்டி கட்டி முடிக்கப்பட்டது. கட்டி முடிக்கப்பட்ட அந்த கழிவுநீர் தொட்டியில் இறங்கி கான்கிரீட்  சவுக்கு மரங்கள் மற்றும் பலகைகளை அகற்றுவதற்காக அந்த தொட்டியில் மோகன்ராஜ் மற்றும் ராஜேஷ் என்ற தொழிலாளர்கள் இறங்கி உள்ளனர்.

அப்போது இருவரது அலறல் சத்தத்தை கேட்டு அருகில் உள்ள கட்டிடத்தில் வேலை பார்த்துக் கொண்டிருந்த சிவகுமார் என்ற மற்றொரு கட்டிட தொழிலாளி உள்ளே இறங்கி உள்ளார். இதில் மூன்று பேரும் மயக்கம் அடைந்துள்ளனர். இந்த நிலையில் கரூர் தீயணைப்பு நிலையத்திற்கு அளித்த தகவலின் பேரில், சம்பவ இடத்திற்கு விரைந்து வந்த தீயணைப்பு துறையினர் மூன்று பேரையும் மீட்டு கரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர்.

மூவரையும் பரிசோதித்த மருத்துவர்கள் அவர்கள் இறந்து விட்டார்கள் என்றும் தெரிவித்தனர். சம்பவ இடத்திற்கு வந்த கரூர் காவல் கண்காணிப்பாளர் சுந்தரவதனம் கட்டிட உரிமையாளர் மற்றும் சம்பவ இடத்தை நேரில் ஆய்வு செய்து விசாரணை மேற்கொண்டார்.முதற்கட்ட விசாரணையில் எட்டடி உயரம் கொண்ட தொட்டியில் முழங்கால் அளவு தண்ணீர் இருந்ததாகவும் சவுக்கு குச்சிகள் உப்பி தேங்கிய நீரில் விஷ வாயு உருவாகி இருக்கலாம் என்று சொல்லப்படுகிறது. இதுதொடர்பாக கட்டிட உரிமையாளர் மற்றும் கட்டிட மேஸ்திரி ஆகிய இருவரையும் போலீசார் கைது செய்தனர்.

இந்த நிலையில், அதே கட்டிடத்தில் வேலை பார்த்த வனவாசியை அடுத்த சின்னமலைபட்டி கிராமத்தைச் சேர்ந்த கோபால் வயது 36 என்ற இளைஞர் இரண்டு நாட்களாக வீட்டிற்கு வராத நிலையில் அவரது சகோதர சரவணன் என்பவர் நேரடியாக வந்து கட்டிடத்தில் பார்த்தார். அப்போது  அவர் செருப்பு மட்டும் இருந்த நிலையில், இது குறித்து காவல்துறைக்கு தகவல் தெரிவித்தனர். இதைஅடுத்து  வந்த போலீசார் மற்றும் தீயணைப்பு துறையினர் உள்ளே பார்த்தபோது கோபால் உள்ளே இறந்த நிலையில் கிடப்பது தெரிய வந்தது. அவர் உடலை கைப்பற்றி பிரேத பரிசோதனைக்காக காந்திகிராமம் அரசு மருத்துவக் கல்லூரி மருத்துவமனைக்கு அனுப்பி வைத்தனர்.

குறிப்பாக நேற்று முன்தினம் 15.11.2022 அன்று விஷவாயுத்தாக்கி இருந்துள்ளதாக மூவரின் உடலை கைப்பற்றப்பட்ட நிலையில் இன்று மேலும் ஒருவரின் உடலை கைப்பற்றப்பட்டுள்ள சம்பவம் கரூர் மாவட்டத்தில் பெரும் பரபரப்பை ஏற்படுத்தி உள்ளது. மேலும் கழிவுநீர் தொட்டியில் உள்ள தண்ணீரை பைப் மூலம் வெளியேற்றும் பணியில் தீயணைப்புத் துறையினர் ஈடுபட்டு வருகின்றனர்.