மாணவர்களே ரெடி! ரூ. லட்சக்கணக்கில் கல்விக் கடன்... 25-ம் தேதி மாபெரும் முகாம்!

கள்ளக்குறிச்சி மாவட்டத்தில் உயர்கல்வி பயில விரும்பும் மாணவர்கள் பயன்பெறும் வகையில், அனைத்து வங்கிகளும் இணைந்து நடத்தும் மாபெரும் கல்விக் கடன் வழங்கும் முகாம் வரும் 25-ம் தேதி நடைபெற உள்ளது.

கல்விக் கடன் வழங்கும் முகாம்

Source : ABPLIVE_AI

கள்ளக்குறிச்சி: கள்ளக்குறிச்சி மாவட்டத்தில் பள்ளிக் கல்வியை முடித்து உயர்கல்வி பயில விரும்பும் மாணவர்கள் பயன்பெறும் வகையில், அனைத்து வங்கிகளும் இணைந்து நடத்தும் மாபெரும் கல்விக் கடன் வழங்கும் முகாம் வரும் 25-ம் தேதி நடைபெற உள்ளது.

இதுகுறித்து மாவட்ட கலெக்டர் பத்மஜா வெளியிட்டுள்ள செய்திக்குறிப்பில் கூறியிருப்பதாவது:

கள்ளக்குறிச்சி மாவட்டத்தில் உயர்கல்வி பயில விரும்பும் மாணவர்கள் கல்விக் கடன் பெற்று பயன்பெறும் வகையில், மாவட்டத்தில் செயல்பட்டு வரும் அனைத்து வங்கிகளும் ஒன்றிணைந்து இந்த சிறப்பு கல்விக் கடன் முகாமை நடத்துகின்றன. வரும் 25-ம் தேதி காலை 9.30 மணி முதல் மாலை 5 மணி வரை, கள்ளக்குறிச்சியில் உள்ள ஏ.கே.டி. பொறியியல் கல்லூரி வளாக கூட்டரங்கில் இந்த முகாம் நடைபெற உள்ளது. இந்த முகாமில் உயர்கல்வி பயில விரும்பும் மாணவர்கள் நேரடியாக கலந்து கொண்டு கல்விக் கடன் தொடர்பான விவரங்களை அறிந்து, தங்களது விண்ணப்பங்களை சமர்ப்பித்து பயன்பெறலாம்.

உள்நாடு, வெளிநாட்டுப் படிப்புக்கும் கடன்

மாணவர்கள் உள்நாட்டில் மட்டுமின்றி வெளிநாடுகளுக்குச் சென்று உயர்கல்வி பயிலவும் கல்விக் கடன் பெறுவதற்கான வாய்ப்பு உள்ளது. அரசால் அங்கீகரிக்கப்பட்ட அனைத்து விதமான உயர்கல்வி மற்றும் மேற்படிப்புகளுக்கும் கல்விக் கடன் பெற முடியும். இதனால், பொருளாதார வசதி காரணமாக உயர்கல்வி வாய்ப்பை இழக்கும் மாணவர்கள், வங்கிக் கடன் உதவியைப் பயன்படுத்தி தங்களது கல்வியைத் தொடர முடியும்.

பல்வேறு வங்கிகள் மூலம் கல்விக் கடன்

தேசியமயமாக்கப்பட்ட வங்கிகள், தனியார் வங்கிகள், கிராம வங்கிகள், மாவட்ட மத்திய கூட்டுறவு வங்கிகள் மற்றும் தொடக்க வேளாண்மைக் கூட்டுறவு சங்கங்கள் உள்ளிட்ட பல்வேறு நிதி நிறுவனங்கள் மூலம் மாணவர்கள் கல்விக் கடன் பெறலாம். மாணவர்கள் தங்களது இருப்பிடத்திற்கு அருகில் உள்ள வங்கி கிளையை அணுகியும் கல்விக் கடனுக்கு விண்ணப்பிக்கலாம். மேலும், கல்விக் கடன் பெறுவதற்காக PM Vidyalaxmi இணையதளம் வாயிலாகவும் விண்ணப்பிக்கலாம்.

என்னென்ன ஆவணங்கள் தேவை?

கல்விக் கடனுக்கு விண்ணப்பிக்கும் மாணவர்கள், தேவையான ஆவணங்களுடன் முகாமில் கலந்து கொள்ள வேண்டும் என அறிவுறுத்தப்பட்டுள்ளது. அதன்படி, பெற்றோரின் ஆதார் அட்டை, வருமான வரி அட்டை (PAN) நகல், மாணவரின் 10, 11 மற்றும் 12-ம் வகுப்பு மதிப்பெண் சான்றிதழ்கள், 12-ம் வகுப்பு மாற்றுச் சான்றிதழ் ஆகியவற்றை கொண்டு வர வேண்டும்.

மேலும், ஜாதி சான்றிதழ், வருமானச் சான்றிதழ், முதல் பட்டதாரி என்றால் அதற்கான சான்று, தகுதி அடிப்படையிலான சேர்க்கைக்கான சான்று உள்ளிட்ட ஆவணங்களையும் சமர்ப்பிக்க வேண்டும். மாணவர் சம்பந்தப்பட்ட கல்லூரியில் பயில்வதற்கான போனஃபைட் சான்றிதழ் மற்றும் கல்விக் கட்டண விவரங்களையும் விண்ணப்பத்துடன் அளிக்க வேண்டும் என தெரிவிக்கப்பட்டுள்ளது.

மாணவர்கள் பயன்படுத்திக் கொள்ள அழைப்பு

உயர்கல்வி பயில விரும்பும் மாணவர்களுக்கு கல்விக் கடன் பெறுவதற்கான இந்த முகாம் ஒரு முக்கிய வாய்ப்பாக அமையும் என்பதால், தகுதியுள்ள மாணவர்கள் முகாமில் கலந்து கொண்டு விண்ணப்பித்து பயன்பெற வேண்டும் என மாவட்ட நிர்வாகம் அறிவுறுத்தியுள்ளது.

பொருளாதார சூழ்நிலை காரணமாக உயர்கல்வியை தொடர முடியாமல் இருக்கும் மாணவர்கள், இந்த வாய்ப்பை பயன்படுத்தி கல்விக் கடனைப் பெற்று தங்களது உயர்கல்வியை தொடர வேண்டும் என்றும் மாவட்ட கலெக்டர் பத்மஜா கேட்டுக்கொண்டுள்ளார்.

முகாம் நடைபெறும் இடம்: ஏ.கே.டி. பொறியியல் கல்லூரி வளாக கூட்டரங்கம், கள்ளக்குறிச்சி
தேதி: 25-ம் தேதி, நேரம்: காலை 9.30 மணி முதல் மாலை 5.00 மணி வரை