Annamalai On DIG Suicide: ”காவல்துறையில் இதெல்லாம் இருக்கிறது“ - கோவை டிஐஜி மரணம் தொடர்பாக அண்ணாமலை சாடல்

கோவை சரக டிஐஜி  விஜயகுமார் தற்கொலை தொடர்பாக விசாரிக்க  சிறப்பு புலனாய்வுக் குழு அமைக்க வேண்டும் என, பாஜக தமிழக தலைவர் அண்ணாமலை கோரிக்கை விடுத்துள்ளார்.

அண்ணாமலை செய்தியாளர் சந்திப்பு

கோவை சரக டிஐஜி  விஜயகுமார் தற்கொலை தொடர்பாக விசாரிக்க  சிறப்பு புலனாய்வுக் குழு அமைக்க வேண்டும் என, பாஜக தமிழக தலைவர் அண்ணாமலை கோரிக்கை விடுத்துள்ளார்.

சிறப்பு புலனாய்வுக் குழு விசாரணை வேண்டும்:

கோவை விமான நிலையத்தில் செய்தியாளர்களிடம் பேசிய அவர் “ விஜயகுமாரின் தற்கொலை தூண்டப்பட்டதா என்பதை விசாரிக்க நீதிமன்ற மேற்பார்வையில் சிறப்பு புலனாய்வுக்குழு அமைக்கப்பட வேண்டும். காவல்துறை உயரதிகாரிகள் யார் யாருடன்  விஜயகுமார் பேசினார் என்பதை விசாரிக்க வேண்டும். இந்த விவகாரம் முழுமையாக ஆராயப்பட வேண்டும். முறையாக விசாரணை நடத்த வேண்டும். மக்களுக்காக உழைத்த அதிகாரிக்கு மன அழுத்தம் இருந்ததாக கூறி, கொச்சைப்படுத்தக்கூடாது. விஜயகுமார் குடும்பத்தில் ஒருவருக்கு குரூப்-ஏ பணி வழங்க வேண்டும். 

காலிப்பணியிடங்களை நிரப்புக:

காவல்துறையில் காலியாக உள்ள 10,000 பணியிடங்களை நிரப்ப வேண்டும். காவல்துறையில் உள்ள அனைவருக்கும் பணி அழுத்தம் உள்ளது. காலி பணியிடங்களை நிரப்பினால் காவல்துறையினரின் பணி அழுத்தம் குறைந்துவிடும். காவல்துறையினருக்கு வாரம் ஒருநாள் ஓய்வு வழங்க வேண்டும்” என அண்ணாமலை கோரிக்கை விடுத்துள்ளார்.

டிஐஜி தற்கொலை?

சென்னை அண்ணாநகர் போலீஸ் துணை ஆணையராக பணியாற்றி வந்த விஜயகுமார், கடந்த ஜனவரி மாதம் தான் கோவை சரக டிஐஜி ஆக மாற்றப்பட்டார். இதனைத் தொடர்ந்து ஜனவரி 7 ஆம் தேதி அவர் பதவியேற்றார். இந்நிலையில் கோவை பந்தய சாலை பகுதியில் உள்ள முகாம் அலுவலகத்தில் விஜயகுமார் உயிரிழந்து கிடந்தார். அவர் துப்பாக்கியால் சுட்டு தற்கொலை செய்துக் கொண்டதாக கூறப்படுவது பெரும் பரபரப்பை ஏற்படுத்தியுள்ளது. அவரது உடல் கோவை அரசு மருத்துவமனையில் பிரேத பரிசோதனைக்காக வைக்கப்பட்டுள்ளது. மேலும் விஜயகுமார் தற்கொலை தொடர்பாக போலீசார் விசாரணை நடத்தி வருகின்றனர். அதேசமயம் கடந்த 2 தினங்களாகவே விஜயகுமார் மன உளைச்சலில் இருந்தாக கூறப்படுகிறது. 

நடந்தது என்ன?

நேற்று இரவு துணை காவல் ஆணையர் சந்தீஷ் குழந்தையின் பிறந்தநாள் விழாவிற்கு சென்று வந்த விஜயகுமார், இன்று காலை 6.50 மணியளவில் வழக்கம்போல நடைப்பயிற்சி மேற்கொண்டுள்ளார். பின்னர் அவருடைய பாதுகாவலர் ரவி என்பவரிடம் கைத்துப்பாக்கியை வாங்கிக் கொண்டு தனது அறைக்குள் சென்று துப்பாக்கியால் சுட்டு தற்கொலை செய்து கொண்டுள்ளார் என போலீசார் நடத்திய விசாரணையில் தெரிய வந்ததாக தகவல் வெளியாகியுள்ளது. இந்த சம்பவம் தொடர்பாக  விஜயகுமாரின் குடும்பத்தினரிடமும் விசாரணை நடைபெற உள்ளது. 

பணி வரலாறு:

விஜயகுமார் கடந்த 2009 ஆம் ஆண்டு காவல்துறையில் பணியில் இணைந்தார். இதனைத் தொடர்ந்து காஞ்சிபுரம், கடலூர், நாகப்பட்டினம் மற்றும் திருவாரூர் மாவட்ட கண்காணிப்பாளராக பணியாற்றியுள்ளார்.சென்னையில் அண்ணா நகர் துணை ஆணையராக பணியாற்றி வந்த இவருக்கு பதவி உயர்வு வழங்கப்பட்டது. இதனைத் தொடர்ந்து கோவை சரக டி.ஐ.ஜி-யாக மாற்றப்பட்டார் என்பது குறிப்பிடத்தக்கது.