அச்சுறுத்தும் கோவிட்! ஈபிஎஸ் மனைவிக்கு கொரோனா பாசிட்டிவ்!
அதிமுக முன்னாள் சபாநாயகர் தனபால் மற்றும் முன்னாள் அமைச்சர் கடம்பூர் ராஜூவுக்கு நேற்று கொரோனா உறுதி செய்யப்பட்டது.
அதிமுக இணை ஒருங்கிணைப்பாளர் எடப்பாடி பழனிசாமியின் மனைவிக்கு கொரோனா உறுதி செய்யப்பட்டுள்ளது.
கடந்த ஒருவார காலமாக அதிமுக கட்சியின் நிலவரங்கள் கலவர பூமியாக மாறியுள்ளது. கடந்த 23 ஆம் தேதி சென்னை வானகரத்தில் நடைபெற்ற அதிமுக பொதுக்குழு கூட்டம் அரசியல் வட்டாரத்தில் மிகப்பெரிய அதிர்வலைகளை ஏற்படுத்தியது. கூட்டத்தில் 23 தீர்மானங்களை தவிர வேறு எந்த தீர்மானத்தையும் நிறைவேற்ற கூடாது என்று உயர்நீதிமன்ற நீதிபதிகள் தெரிவித்தும் பொதுக்குழுவில் முன்னாள் அமைச்சர் சி.வி.சண்முகம், கே.பி.முனுசாமி உள்ளிட்ட பலரும் ஒற்றைத் தலைமை வலியுறுத்தி 23 தீர்மானங்களை நிராகரிப்பதாக ஆவேசமாக தெரிவித்தனர்.
இக்கூட்டத்தில் இருந்து கட்சியின் ஒருங்கிணைப்பாளர் ஓ.பன்னீர்செல்வம் பாதியில் வெளியேறினார். இதனிடையே நேற்று சென்னை ராயப்பேட்டையிலுள்ள அதிமுகவின் தலைமை அலுவலகத்தில் தலைமைக் கழக நிர்வாகிகள் ஆலோசனைக் கூட்டம் எடப்பாடி பழனிசாமி தலைமையில் நடந்தது. இதில் தலைமை கழக நிர்வாகிகள் 65 பேர் கலந்து கொண்ட நிலையில் ஜூலை 11 ஆம் தேதி நடக்கவுள்ள பொதுக்குழுவில் விவாதிக்கப்பட வேண்டிய நிகழ்வுகள் குறித்து ஆலோசனை நடத்தப்பட்டதாக தெரிவிக்கப்பட்டது. ஆனால் அதிமுகவின் ஒருங்கிணைப்பாளர் என்ற முறையில் நான் எந்த வித ஒப்புதலையும் கூட்டத்திற்கு அளிக்கவில்லை என ஓ.பன்னீர்செல்வம் அறிக்கை ஒன்றை வெளியிட்டு பரபரப்பை ஏற்படுத்தியிருந்தார்.
இந்த கூட்டத்திற்கு முன்னதாக நேற்று காலை எடப்பாடி பழனிசாமியுடன் அவரது இல்லத்தில் வைத்து முன்னாள் அமைச்சர்கள், முக்கிய நிர்வாகிகள் ஆலோசனை நடத்தினர். இதனைத் தொடர்ந்து இரண்டு இடங்களிலும் நடந்த ஆலோசனையில் அதிமுக முன்னாள் சபாநாயகர் தனபால் மற்றும் முன்னாள் அமைச்சர் கடம்பூர் ராஜூவுக்கு கொரோனா உறுதி செய்யப்பட்டது. தமிழகத்தில் கடந்த சில நாட்களாக கொரோனா தொற்று அதிகரித்து வரும் நிலையில் அதிமுகவில் ஏற்பட்ட பிரச்சனை காரணமாக அக்கட்சியின் தலைவர்கள் ஒன்று கூடி ஆலோசனை நடத்தி வந்தனர்.
அவர்களுக்கு ஆதரவாக தொண்டர்களும் கூட்டம் கூட்டமாக குவிந்த நிலையில் அதிமுக கூட்டத்தில் பங்கேற்றவர்களுக்கு கொரோனா பரவியுள்ளது அக்கட்சியினரிடையே அதிர்ச்சியை ஏற்படுத்தியிருந்தது. இந்நிலையில் அதிமுக இணை ஒருங்கிணைப்பாளர் எடப்பாடி பழனிசாமி மனைவி ராதாவுக்கு கொரோனா உறுதி செய்யப்பட்டுள்ளது. தொற்று உறுதியான நிலையில் அவர் வீட்டில் தனிமைப் படுத்தி கொண்டதாக தெரிவிக்கப்பட்டுள்ளது. ஏற்கனவே அதிமுகவில் இருக்கும் பிரச்சனை ஒருபுறம் என்றால், மறுபுறம் கொரோனா பிரச்சனையும் எடப்பாடி பழனிசாமிக்கு மிகப்பெரிய சவாலாக அமைந்துள்ளது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
