BJP Vijay: புரிஞ்சுக்கோங்க..! ”மோடி சாதாரண மனிதரே இல்லை, படிச்சுட்டு வாங்க விஜய்” - பாஜக ஆவேசம்
BJP Vijay: பிரதமர் மோடி தொடர்பான தவெக தலைவர் விஜயின் பேச்சை, பாஜக பிரமுகர் சரத்குமார் (Sarathkumar) விமர்சித்துள்ளார்.
BJP Vijay: பிரதமர் மோடி சாதாரண நபர் கிடையாது என, பாஜக பிரமுகர் சரத்குமார் தெரிவித்துள்ளார்.
விஜய் மீது சரத்குமார் அட்டாக்:
பாஜக பிரமுகரும், நடிகருமான சரத்குமார் வெளியிட்டுள்ள அறிக்கையில், ”தமிழக வெற்றிக் கழகத்தின் முதல் பொதுக்குழுக் கூட்டத்தில் உண்மைக்கு புறம்பாக மத்திய அரசை விமர்சித்து, விஜய் பேசியது விநோதமாகவும், வேடிக்கையாகவும் இருந்தன. பாரத பிரதமருக்கு தமிழகம் என்றால் அலர்ஜி, தமிழக ஜி.எஸ்.டி வருவாயை வாங்கிக்கொண்டு பட்ஜெட்டில் தமிழகத்திற்கு நிதியே ஒதுக்குவதில்லை. இருமொழிக்கொள்கையில் உறுதி, வக்பு சட்டத்திருத்த மசோதாவை திரும்பப்பெற வேண்டும், தொகுதி மறுசீரமைப்பு' தேவையில்லை என்று மாநில அரசு சொல்லும் அதே கருத்துக்களை விஜய் பிரதிபலித்திருப்பது தான் மேலும் வேடிக்கை.
உலக அளவில் இந்திய பொருளாதாரம் முன்னேறிவரும் நிலையில், விரைவில் 3-வது இடத்தை எட்டிப்பிடிக்கும் என சர்வதேச நாணய நிதியம் (IMF) தெரிவிக்கும் சூழலில், நமது தேசத்தை தேசத்தின் பொருளாதாரத்தை வளர்ச்சிகரமான முன்னேற்ற பாதையில் அழைத்துச் செல்லும் பிரதமர் மோடியை, சர்வதேச தலைவர்களும் வியந்து பாராட்டி வருவதை நாம் அனைவரும் அறிவோம்.
”உண்மையை படியுங்கள்”
இத்தகைய பெருமைக்குரிய பாரத பிரதமர் குறித்து எதிர்மறையாக பேசுவதற்கு முன்பாக எதை பேசினாலும், உண்மையை படித்துப்பார்த்து, தமிழ்நாட்டில் எந்தெந்த திட்டங்கள் செய்படுத்தப்பட்டு இருக்கின்றன, எதற்காக மாநில அரசுக்கு கல்விக்கான நிதியை விடுவிக்காமல் மத்திய அரசு இருக்கிறது. வரிப்பங்கீடு ஏன் குறைகிறது, எவ்வளவு ஒதுக்கீடு செய்திருக்கிறார்கள் என்ற புள்ளிவிபரங்களை அறிந்து, புரிந்து கொண்டு, ஆராய்ந்து தெளிவாக பேசியிருந்தால், அதுவும் பொதுக்குழுவில் பேசியிருந்தால் சிறப்பாக இருந்திருக்கும்.
புள்ளி விவரங்கள்:
2004-14 காலகட்டத்தில், தமிழ்நாட்டிற்கு வரிப் பகிர்வு ரூ. 94,971 கோடியாக இருந்தது. ஆனால், 2014-24 வரையிலான காலகட்டத்தில் ரூ.2,92,013 கோடி வழங்கப்பட்டுள்ளது. இது 207% அதிகமாகும். 2004-14 ஆம் ஆண்டில் மத்திய அரசின் உதவி மற்றும் அரசின் மானியங்கள் மூலம் ரூ. 57,925 மட்டுமே வழங்கப்பட்டது. ஆனால், 2014-24 காலகட்டத்தில் ரூ. 2,55,875 கோடி வழங்கப்பட்டது. இது 342% அதிகமாகும் என மத்திய நிதியமைச்சர் ஆதாரப்பூர்வமாக பேசியுள்ளதை அவர் படிக்கவில்லை என நினைக்கிறேன்.
முன்னாள் பிரதமர் வாஜ்பாயி தலைமையிலான பாஜக ஆட்சியில் தங்க நாற்கரச்சாலை திட்டம் இந்தியாவிற்கு அர்ப்பணிக்கப்பட்டது. இந்திய பொருளாதார முன்னேற்றத்திற்கு முதன் முதல் காரணமாக அது அமைந்தது. என்பதை நாம் அனைவரும் இன்று வரை உணர்வோம் என்பதை புரிந்து கொள்ள வேண்டும். இது போன்று நாட்டின் முன்னேற்றத்திற்காக செயல்பட்டு கொண்டிருப்பது பாரதிய ஜனதா கட்சி என்பதை நீங்கள் உணர மறந்துவிட்டீர்கள்.
தமிழ்நாட்டின் உட்கட்டமைப்பு
அதுமட்டுமன்றி தமிழகத்தில் நெடுஞ்சாலை வசதிகள், சாலை போக்குவரத்து, ரயில்வே உள்ளிட்ட உள்கட்டமைப்புகள் மேம்பாடு, புதிய விமானநிலையங்கள் உருவாக்கம், பிரதமரின் வீடுகட்டும் திட்டம், அனைத்து வீடுகளுக்கும் குடிநீர் இணைப்பு, சிலிண்டர் மானியம், பிரதமரின் மருத்துவ காப்பீடு, மக்கள் மருந்தகம், சிறு, குறு, நடுத்தர தொழில் மேம்பாட்டிற்காக பல கோடி கடனுதவித் திட்டங்கள், இளைஞர்களுக்கு வேலைவாய்ப்பு, திறன்வளர் பயிற்சி, கல்வி மேம்பாடு என எத்தனையோ திட்டங்களை அறிவித்து வெற்றிகரமாக செயல்படுத்தி இருப்பது மத்திய அரசு என்பதையும் நீங்கள் உணர மறந்துவிட்டீர்கள்.
”சாதனை மனிதர் மோடி”
ஆளுங்கட்சிக்கு சாதகமாக பேசுவதாக எண்ணி, மத்தியிலே நடந்து கொண்டிருக்கின்ற சிறந்த ஆட்சியை, ஒரு இந்திய குடிமகனாக பாரதத்தை முன்னேற்ற பாதையில் எடுத்துச் செல்லும் பாரத தலைவர், உலகம் போற்றுகின்ற ஒரு சாதனை மனிதரை, சாதாரண மனிதராக எண்ணிக்கொண்டு கேலியாக பேசியிருப்பது கண்டிக்கத்தக்கது.
ஆகவே, ஏற்கெனவே நான் சொன்னது போல இனிவருங்காலங்களில் இவை அனைத்தும் தவிர்த்து அனைத்து தரவுகளையும் ஆராய்ந்து உண்மையான கருத்துகளை பேசி ஆக்கப்பூர்வமான, நாகரிகமான அரசியலில் ஈடுபடுவீர்கள் என நம்புகிறேன்” என சரத்குமார் தனது அறிக்கையில் தெரிவித்துள்ளார்
தலைப்பு செய்திகள்
ட்ரெண்டிங் செய்திகள்
