ராகுலை சதாம் உசேன் என்று சொன்ன அசாம் முதல்வர்.. சகஜமப்பா என்ற அமித்ஷா! சூடுபிடிக்கும் குஜராத் தேர்தல்..

தேர்தல் பரப்புரையில் இருந்த ஹிமந்தா தனது பேச்சின் இடையே, காங்கிரஸ் தலைவர் ராகுல் காந்தியின் தோற்றம் குறித்து கிண்டலாக பேசியது பெரும் சர்ச்சையைக் கிளப்பியுள்ளது.

ராகுல் காந்தி - அமித் ஷா

குஜராத் தேர்தல் பரப்புரையில் இருந்த அசாம் முதல்வர் ஹிமந்தா தனது பேச்சின் இடையில், காங்கிரஸ் தலைவர் ராகுல் காந்தியின் தோற்றம் குறித்து கிண்டலாக பேசியது பெரும் சர்ச்சையைக் கிளப்பியுள்ளது. அதற்கு அமித்ஷா அளித்த பதிலும் விவாதத்திற்குள்ளாகி உள்ளது.

குஜராத் சட்டப்பேரவை தேர்தல்

குஜராத் சட்டப்பேரவைக்கான தேர்தல் அடுத்த மாதம் இரு கட்டங்களாக நடைபெற உள்ளது. இந்த தேர்தலில் வெற்றிபெற பல ஆண்டுகளாக குஜராத்தை ஆளும் பாஜக-வும் எதிர்க்கட்சியான காங்கிரஸும், ஆம் ஆத்மி கட்சியும் தீவிர பரப்புரையில் ஈடுபட்டு வருகின்றன. பாஜக சார்பில் அந்தக் கட்சியின் முன்னணி தலைவரும் அசாம் மாநில முதலமைச்சருமான ஹிமந்த பிஸ்வாஸ் சர்மா தீவிர தேர்தல் பரப்புரையில் ஈடுபட்டு வருகிறார். இந்த நிலையில் இந்த வாரம் செவ்வாய் கிழமை அன்று தேர்தல் பரப்புரையில் இருந்த ஹிமந்தா தனது பேச்சின் இடையே, காங்கிரஸ் தலைவர் ராகுல் காந்தியின் தோற்றம் குறித்து கிண்டலாக பேசியது பெரும் சர்ச்சையைக் கிளப்பியுள்ளது.

ராகுலின் தோற்றம் குறித்து பேசிய முதல்வர்

அந்த தேர்தல் பிரச்சாரக் கூட்டத்தில் பேசிய அசாம் முதல்வர் ஹிமந்தா, "பாரத் ஜோடோ யாத்திரை (இந்திய ஒற்றுமைக்காக யாத்திரை) மேற்கொண்டு வரும் ராகுல் காந்தியின் தோற்றத்தை நான் பார்த்தேன். யாத்திரையில் அவரின் லுக் மாறியுள்ளது. ஒருவர் புதிய லுக்கில் தோற்றமளிப்பதில் தவறு ஒன்றும் இல்லை. ஆனால் ராகுல் காந்தி தனது தோற்றத்தை சர்தார் வல்லபாய் பட்டேல் போலவோ, மஹாத்மா காந்தி போலவோ மாற்றினால் நல்லதுதான்", என்று ராகுலின் சமீபத்திய தாடி வைத்த தோற்றத்தை பற்றி பேசினார்.

சதாம் உசேன்போல உள்ளார்

மேலும் பேசிய அவர், "நேரு போல தனது தோற்றத்தை மாற்றினால் கூட சரிதான். ஆனால் எதற்கு சதாம் உசேன் போல முகத் தோற்றத்தை மாற்ற வேண்டும்" என்று கூறி கலாய்த்து விமர்சித்திருந்தார். பரப்புரையில் இவ்வாறு பேசிய ஹிமந்த பிஸ்வாஸ் சர்மாவுக்கு காங்கிரஸ் தலைவர்களும், பிரமுகர்களும் கடும் கண்டனம் தெரிவித்து வருகின்றனர். 

அமித்ஷா கருத்து

இந்த நிலையில் இந்த விவகாரம் தொடர்பாக மத்திய உள்துறை அமைச்சர் அமித் ஷா-வும் கருத்து தெரிவித்துள்ளார். டெல்லியில் தனியார் தொலைக்காட்சி சேனல் ஒன்று நடத்திய நிகழ்வில் பங்கேற்று பேசிய அமித் ஷாவிடம் இது தொடர்பாக கேட்கப்பட்ட கேள்விக்கு பதிலளித்தார். அப்போது பேசிய அமித்ஷா, "பரபரப்பான தேர்தல் களத்தில் இது போன்ற பேச்சுக்கள் வருவது மிகவும் இயல்பு. மக்கள் இதை கேட்பார்கள், மகிழ்வார்கள், சிரிப்பார்கள்… ஆனால், தேர்தலில், ஓட்டளிப்பது போன்றவற்றில் எந்த மாறுதல்களும் ஏற்படாது. எனவே, தேர்தல் காலத்தில் பேசப்படும் இதுபோன்ற பேச்சுக்களை ஜவ்வாக இழுக்கவேண்டிய தேவையில்ல", என்று கூறியுள்ளார்.