சீர்காழி பள்ளி சர்ச்சை: மாணவி தற்கொலை முயற்சி... ஆசிரியர் இடமாற்றம்... மாணவர் மறியல்!
சீர்காழி அருகே தலைமை ஆசிரியர் இடமாற்றத்தை கண்டித்து மாணவர்கள் திடீர் சாலை மறியல் போராட்டத்தில் ஈடுப்பட்டதால் பெரும் பரபரப்பு ஏற்பட்டது.
மயிலாடுதுறை: மயிலாடுதுறை மாவட்டம் தரங்கம்பாடி தாலுகாவிற்குட்பட்ட கீழப்பெரும்பள்ளம் கிராமத்தில் அரசு மேல்நிலைப்பள்ளி செயல்பட்டு வருகிறது. இந்தப் பள்ளியில் தலைமை ஆசிரியர் மற்றும் 22 ஆசிரியர்கள் பணியாற்றி வருகின்றனர். கடந்த சில காலமாக இப்பள்ளியின் பொறுப்பு தலைமை ஆசிரியராகப் பணியாற்றி வந்த இந்திரகுமார் (43) என்பவரது செயல்பாடுகள் குறித்து ஆசிரியர்களிடையே மாறுபட்ட கருத்துகள் நிலவி வந்தன. தலைமை ஆசிரியருக்கு ஆதரவாக ஒரு தரப்பும், எதிராக மற்றொரு தரப்பும் செயல்பட்டு வந்ததால் பள்ளியில் அவ்வப்போது விரும்பத்தகாத சம்பவங்கள் மற்றும் கருத்து வேறுபாடுகள் தொடர்ந்து ஏற்பட்டு வந்ததாகக் கூறப்படுகிறது.
மாணவி தற்கொலை முயற்சி மற்றும் ஆசிரியர்கள் இடமாற்றம்
சமீபத்தில் பள்ளியில் பணியாற்றும் ஆசிரியர் ஒருவர் மீது சுமத்தப்பட்ட பாலியல் புகார் தொடர்பாக பள்ளிக் கல்வித்துறை அதிகாரிகள் நேரடி விசாரணை மேற்கொண்டனர். அந்த விசாரணையின் முடிவில் ஆசிரியர் மீதான புகார் பொய்யானது எனத் தெரியவந்தது. இதனிடையே, விசாரணையின் போது அதிகாரிகளிடம் கருத்து தெரிவித்த மாணவிகளை பொறுப்பு தலைமை ஆசிரியர் திட்டி மிரட்டியதாகக் குற்றச்சாட்டு எழுந்தது. இதனால் கடுமையான மன உளைச்சலுக்கு ஆளான 12-ஆம் வகுப்பு பயிலும் 16 வயது மாணவி ஒருவர், நேற்று முன்தினம் விஷம் அருந்தி தற்கொலைக்கு முயன்றார்.
ஆபத்தான நிலையில் மீட்கப்பட்ட அந்த மாணவி உடனடி சிகிச்சைக்காக மயிலாடுதுறை அரசு மருத்துவமனையில் அனுமதிக்கப்பட்டார். இந்த விவகாரம் பெரும் அதிர்ச்சியை ஏற்படுத்தியதைத் தொடர்ந்து, பொறுப்பு தலைமை ஆசிரியர் இந்திரகுமார் மற்றும் ஆசிரியர்கள் சத்தியவதி, மதனகோபால் ஆகிய மூவரையும் உடனடியாக பணியிட மாற்றம் செய்து கல்வித்துறை அதிகாரிகள் உத்தரவிட்டனர்.
சாலை மறியல் போராட்டமும் உயர் அதிகாரிகளின் பேச்சுவார்த்தையும்
பொறுப்பு தலைமை ஆசிரியர் இந்திரகுமார் பணியிட மாற்றம் செய்யப்பட்ட தகவல் வெளியானதும், அவருக்கு ஆதரவாகப் பள்ளியின் தற்போதைய மாணவர்கள் மற்றும் முன்னாள் மாணவர்கள் திரண்டனர். இந்த இடமாற்றத்தைக் கண்டித்தும், அவரை மீண்டும் அதே பள்ளியில் பொறுப்பு தலைமை ஆசிரியராகப் பணியமர்த்த வலியுறுத்தியும் பூம்புகார் - சீர்காழி சாலையில் திடீரென மறியல் போராட்டத்தில் ஈடுபட்டனர். இதனால் அப்பகுதியில் போக்குவரத்து கடுமையாகப் பாதிக்கப்பட்டது.
தகவலறிந்த சீர்காழி வருவாய் கோட்டாட்சியர் பாலமுருகன், சீர்காழி காவல் துணை கண்காணிப்பாளர் சரவணன், மாவட்ட முதன்மை கல்வி அலுவலர் பாலசுப்பிரமணியன் மற்றும் தரங்கம்பாடி வட்டாட்சியர் ஆகியோர் சம்பவ இடத்திற்கு விரைந்து வந்து போராட்டத்தில் ஈடுபட்டவர்களிடம் தீவிர பேச்சுவார்த்தை நடத்தினர்.
அதிகாரிகளின் உறுதிமொழியைத் தொடர்ந்து போராட்டம் வாபஸ்
ஆரம்பத்தில் அதிகாரிகள் நடத்திய பேச்சுவார்த்தையில் உடன்பாடு எட்டப்படாததால் அசம்பாவிதங்களைத் தவிர்க்கும் பொருட்டு அப்பகுதியில் பெருமளவில் போலீசார் குவிக்கப்பட்டனர். இதனிடையே பள்ளிக்கு வந்த இந்திரகுமாரை அவரது ஆதரவு மாணவர்கள் உற்சாகமாக அழைத்துச் சென்றனர். நிலைமையின் தீவிரத்தை உணர்ந்த மாவட்ட முதன்மை கல்வி அலுவலர் பாலசுப்ரமணியன் மீண்டும் பேச்சுவார்த்தை நடத்தினார். அப்போது, பள்ளியில் தற்சமயம் பணியாற்றி வரும் அனைத்து ஆசிரியர்களும் படிப்படியாக பணியிட மாற்றம் செய்யப்பட்டு புதிய ஆசிரியர்கள் நியமிக்கப்படுவார்கள் என்றும், புதிய தலைமை ஆசிரியர் பொறுப்பேற்கும் வரை இந்திரகுமாரே பொறுப்பு தலைமை ஆசிரியராகத் தொடர்வார் என்றும் உறுதி அளித்தார்.
புதிய தலைமை ஆசிரியர் வந்தவுடன் அவரிடம் பொறுப்புகளை ஒப்படைத்துவிட்டு இந்திரகுமார் புதிய இடத்திற்கு மாறுவார் எனத் தெரிவிக்கப்பட்டது. இந்த சமரச தீர்வை ஏற்றுக்கொண்ட மாணவர்கள் மற்றும் முன்னாள் மாணவர்கள் தங்களது போராட்டத்தைக் கைவிட்டு அமைதியாகக் கலைந்து சென்றனர்.
தலைப்பு செய்திகள்
ட்ரெண்டிங் செய்திகள்
