ஜப்பான், தைவான் பக்தர்களை ஈர்த்த தமிழ்நாட்டு ஆன்மீகம்: சீர்காழி ஒளிலாய குருபூஜை சிறப்பம்சங்கள்!

மயிலாடுதுறை மாவட்டம் சீர்காழி அருகே உள்ள ஒளிலாயத்தில் நாடி ராஜேந்திரா சுவாமிகளின் குருபூஜை விழாவில் ஜப்பான், தைவான் நாடுகளை சேர்ந்த பக்தர்களின் பங்கேற்று வழிபாடு செய்தனர்.

ஒளிலாயம் சித்தர் பீடம்

Source : Abp

சீர்காழி: மயிலாடுதுறை மாவட்டம் சீர்காழி அருகே அமைந்துள்ள காரைமேடு சித்தர் புரத்தில் ஆன்மீகச் சிறப்புமிக்க ஒளிலாயம் அமைந்திருக்கிறது. நாடி ராஜேந்திரா சுவாமிகளால் தோற்றுவிக்கப்பட்ட இந்த புண்ணிய பூமியில், பதினெட்டு சித்தர்களும் ஒரே இடத்தில் அமர்ந்து பக்தர்களுக்கு அருள் பாலிக்கும் தனித்துவமான சன்னதிகள் அமைக்கப்பட்டுள்ளன.

நாடி ராஜேந்திரா சுவாமிகளின் ஒன்பதாம் ஆண்டு குருபூஜை விழாவானது மிக விமரிசையாகவும், ஆன்மீகச் சொற்பொழிவுகள் மற்றும் சிறப்பு வழிபாடுகளுடனும் வெகுசிறப்பாகத் தொடங்கியது. இந்த விழாவைக் காண்பதற்கும், இதில் பங்கேற்று அருள் பெறுவதற்கும் உள்ளூர் மற்றும் சுற்றியுள்ள மாவட்டங்கள் மட்டும் இன்றி வெளிநாடுகளிலிருந்து ஆயிரக்கணக்கான பக்தர்கள் ஒளிலாயம் நோக்கித் திரண்டு வந்தனர்.

108 யாக குண்டங்களுடன் உலக அமைதிக்காக சிறப்பு ஹோமம்

இந்த குருபூஜை விழாவின் முக்கிய நிகழ்வாக உலக நன்மைக்காகவும், உலக நாடுகள் அனைத்திலும் சமாதானமும் அமைதியும் நிலவ வேண்டும் என்ற உயரிய நோக்கத்துடனும் சிறப்பு ஹோமங்கள் ஏற்பாடு செய்யப்பட்டிருந்தன. இதற்காக விழா வளாகத்தில் 108 யாக குண்டங்கள் மிக நேர்த்தியாக அமைக்கப்பட்டு, சுவாமி, அம்பாள் மற்றும் ஒன்பது கோள்களான நவகிரகங்களை ஆவாகணம் செய்து வேதாகம மந்திரங்கள் முழங்க சிறப்பு ஹோமம் தொடங்கப்பட்டது. 

உலக அமைதியை வலியுறுத்தியும், இயற்கை வளங்கள் பெருகி மக்கள் நோயற்ற வாழ்வு வாழ வேண்டும் என்றும் வேதியர்கள் மந்திரங்களை ஓதி ஹோமத் தீயில் புனிதப் பொருட்களை அர்ப்பணித்தனர்.

பூர்ணாஹுதியும் பதினெட்டு சித்தர்களுக்கு மகா அபிஷேகமும்

சிறப்பு ஹோமத்தின் தொடர்ச்சியாகப் புனிதப் பொருட்கள் யாக குண்டத்தில் சமர்ப்பிக்கப்பட்டு, மங்கள வாத்தியங்கள் முழங்க மகா பூர்ணாஹுதி மிக விமரிசையாக நடைபெற்றது. அதனைத் தொடர்ந்து, ஹோமத்தில் வைத்துப் பூஜிக்கப்பட்ட புனித நீரைக் கொண்டு வந்த அர்ச்சகர்கள், அங்குள்ள பதினெட்டு சித்தர்களின் திருமேனிகளுக்கும், சுவாமி மற்றும் அம்பாளுக்கும் நறுமணப் திரவியங்கள், பால், தயிர், சந்தனம் மற்றும் புனித நீரால் சிறப்பு அபிஷேகங்களைச் செய்தனர். மகா தீபாராதனை காட்டப்பட்டபோது அங்கு கூடி இருந்த ஆன்மீக அன்பர்கள் அனைவரும் சிவ நாமாவையும், சித்தர் மந்திரங்களையும் முழங்கி பரவசத்துடன் சுவாமி தரிசனம் செய்தனர்.

ஜப்பான் மற்றும் தைவான் நாட்டுப் பக்தர்கள் பங்கேற்பு

இந்த ஆன்மீக விழாவின் மற்றொரு முக்கியச் சிறப்பம்சமாக, இந்தியப் எல்லைகளைத் தாண்டி ஆன்மீகத் தேடலில் இருக்கும் வெளிநாட்டு பக்தர்களின் வருகை அமைந்தது. கிழக்காசிய நாடுகளான ஜப்பான் மற்றும் தைவானைச் சேர்ந்த ஏராளமான பக்தர்கள் இந்த குருபூஜை மற்றும் சிறப்பு ஹோம விழாவில் மிகுந்த ஆர்வத்துடனும் பக்தியுடனும் கலந்து கொண்டனர். தமிழ் பாரம்பரிய முறைப்படியும், வேதாகம சடங்குகளின்படியும் நடைபெற்ற இந்த வழிபாட்டு நிகழ்வுகளை அவர்கள் வியப்புடனும் மன அமைதியுடனும் பின்பற்றி, பதினெண் சித்தர்களையும் நவகிரகங்களையும் தொழுது அருள் பெற்றனர். தமிழ்நாட்டின் சித்த மருத்துவமும், யோகக் கலைகளும் உலக அளவில் ஈர்க்கப்பட்டு வருவதை இந்நிகழ்வு மீண்டும் நிரூபித்துள்ளது.

ஏழை எளிய மக்களுக்கு நலத்திட்ட உதவிகள் வழங்கல்

ஆன்மீக வழிபாடுகளோடு மட்டுமல்லாமல், சமூகப் பணிக்கும் முக்கியத்துவம் அளிக்கும் வகையில் இந்த குருபூஜை விழாவில் பிரம்மாண்ட நலத்திட்ட உதவிகள் வழங்கும் நிகழ்வும் நடைபெற்றது. விழாவிற்கு வருகை தந்திருந்த பொதுமக்களில் வறுமைக்கோட்டிற்கு கீழ் உள்ள சுமார் 2000 ஏழை எளிய பெண்களுக்குச் சேலைகள் உள்ளிட்ட அத்தியாவசியப் பொருட்கள் மற்றும் நலத்திட்ட உதவிகள் விழா நிர்வாகத்தின் சார்பில் வழங்கிச் சிறப்பிக்கப்பட்டன. 

மேலும், விழாவில் கலந்து கொண்ட பல்லாயிரக்கணக்கான பக்தர்களுக்கும், பொதுமக்களுக்கும் நாள் முழுவதும் அன்னதானம் வழங்கப்பட்டது. ஆன்மீக உணர்வும், ஜீவகாருண்ய தொண்டும் இணைந்த இந்த குருபூஜை விழா, சீர்காழி மற்றும் அதனைச் சுற்றியுள்ள பகுதியில் பெரும் ஆன்மீக நெகிழ்ச்சியையும் அமைதியையும் ஏற்படுத்தியுள்ளது. இந்நிகழ்வினை நாடி. செல்வமுத்துகுமரன், செந்தமிழன், மாமல்லன், பரதன் உள்ளிட்டோர் சிறப்பாக செய்திருந்தனர்.