பொதுமக்களை அச்சுறுத்துவோர் மீது அதிரடி ஆக்சன்: மயிலாடுதுறையில் தொடரும் குண்டர் சட்ட நடவடிக்கை!
மயிலாடுதுறை மாவட்டத்தில் நடப்பாண்டில் பல்வேறு குற்ற செயல்களில் ஈடுபட 73 பேர் குண்டர் தடுப்புச் சட்டத்தின் கீழ் கைது செய்து மாவட்ட காவல் கண்காணிப்பாளர் அதிரடி நடவடிக்கை மேற்கொண்டுள்ளார்.
மயிலாடுதுறை: மயிலாடுதுறை மாவட்டம் பொறையார் காவல் சரகத்திற்கு உட்பட்ட ஆணைக்கோவில் பகுதியில் கடந்த செப்டம்பர் மாதம் இருபத்தி ஆறாம் தேதியன்று பெரும் பரபரப்பை ஏற்படுத்திய ஒரு கொடூர கொலை முயற்சி சம்பவம் அரங்கேறியுள்ளது. இப்பகுதியை சேர்ந்த சுப்ரமணியன் என்பவரின் மகன் ரமேஷ் (45) என்பவரை, அதே பகுதியில் வசித்து வரும் ராசையன் என்பவரின் மகன் ராஜமூர்த்தி (22) என்பவர் திடீரென முன்விரோதம் காரணமாக கத்தியால் சரமாரியாக தாக்கி கொலை செய்ய முயன்றுள்ளார்.
இந்த திடீர் தாக்குதலில் படுகாயமடைந்த ரமேஷ் அதிர்ஷ்டவசமாக உயிர் தப்பினார். இந்த சம்பவம் அப்பகுதியில் பெரும் அதிர்ச்சியையும் அச்சத்தையும் ஏற்படுத்திய நிலையில், பாதிக்கப்பட்ட ரமேஷ் அளித்த புகாரின் அடிப்படையில் பொறையார் காவல் நிலையத்தில் குற்றவாளி ராஜமூர்த்தி மீது கொலை முயற்சி குற்ற வழக்கு உடனடியாக பதிவு செய்யப்பட்டது.
துரித புலன் விசாரணை மற்றும் நீதிமன்ற காவல்
இந்த கொலை முயற்சி வழக்கு தொடர்பாக பொறையார் காவல் நிலைய ஆய்வாளர் டில்லி பாபு உடனடியாக தீவிர புலன் விசாரணையை மேற்கொண்டு, தலைமறைவாக இருந்த ராஜமூர்த்தியை மடக்கிப் பிடித்து கைது செய்தார். கைது செய்யப்பட்ட ராஜமூர்த்தி மீது சட்டப்பூர்வமான நடவடிக்கைகள் மேற்கொள்ளப்பட்டு, உடனடியாக நீதிமன்ற காவலுக்கு உட்படுத்தப்பட்டு சிறையில் அடைக்கப்பட்டார்.
காவல்துறையினரின் இந்த துரித நடவடிக்கை அப்பகுதி மக்களிடையே சிறிது நிம்மதியை ஏற்படுத்திய போதிலும், குற்றச்செயல்களில் ஈடுபடுபவர்கள் மீது கடுமையான சட்டம் பாயும் என்பதற்கான சான்றாக இது அமைந்தது.
சீர்காழியில் வெளிச்சத்திற்கு வந்த சட்டவிரோத மது விற்பனை
இதற்கிடையில், மயிலாடுதுறை மாவட்டம் சீர்காழி காவல் சரகத்திற்கு உட்பட்ட பல்வேறு பகுதிகளில் சட்டவிரோதமாக மதுபானங்கள் விற்கப்படுவதாக சீர்காழி காவல்துறையினருக்கு ரகசிய தகவல்கள் வந்து சேர்ந்தன. இந்த ரகசிய தகவலின் அடிப்படையில் கடந்த அக்டோபர் மாதம் இரண்டாம் தேதியன்று சீர்காழி காவல்துறையினர் தீவிர மதுவிலக்கு வேட்டையில் ஈடுபட்டனர்.
அப்போது சீர்காழி பிடாரி வடக்கு வீதியை சேர்ந்த காளிதாஸ் என்பவரின் மனைவியான அமுதா (40) என்பவர் அரசு அனுமதியின்றி சட்டவிரோதமாக மதுபானங்களை பதுக்கி வைத்து விற்பனை செய்து வந்தது காவல்துறையினரின் சோதனையில் வெளிச்சத்திற்கு வந்தது. இதனையடுத்து அவர் விற்பனைக்காக பதுக்கி வைத்திருந்த அனைத்து மதுபான பாட்டில்களையும் காவல்துறையினர் அதிரடியாக கைப்பற்றினர். மேலும் எதிரி அமுதா மீது மதுவிலக்கு குற்ற வழக்கு பதிவு செய்யப்பட்டு, உடனடியாக கைது செய்யப்பட்டு நீதிமன்ற காவலுக்கு உட்படுத்தப்பட்டார்.
மாவட்ட ஆட்சியரின் உத்தரவு மற்றும் குண்டர் சட்டம் பாய்ச்சல்
மேற்படி எதிரிகளான ராஜமூர்த்தி மற்றும் அமுதா இருவரும் தொடர்ச்சியாக இதுபோன்ற சமூக விரோத மற்றும் சட்டவிரோத செயல்களில் ஈடுபட்டு பொதுமக்களுக்கு அச்சுறுத்தலாக விளங்கி வந்தனர். இதனைத் தொடர்ந்து, சட்டம் ஒழுங்கை பாதுகாக்கும் பொருட்டு இவ்விரு எதிரிகள் மீதும் குண்டர் தடுப்புச் சட்டத்தின் கீழ் கடுமையான நடவடிக்கை மேற்கொள்ள வேண்டும் என்று மயிலாடுதுறை மாவட்ட காவல் கண்காணிப்பாளர் டாக்டர் பி. சினேஹா ப்ரியா, மயிலாடுதுறை மாவட்ட ஆட்சியருக்கு முறையான பரிந்துரைகளை அனுப்பினார்.
காவல்துறை கண்காணிப்பாளரின் இந்த பரிந்துரையை பரிசீலித்த மாவட்ட ஆட்சியர், மேற்படி நபர்கள் இருவரையும் தடுப்பு காவல் சட்டத்தின்படி சிறையில் அடைக்க அதிரடி உத்தரவு பிறப்பித்தார். மாவட்ட ஆட்சியரின் இந்த உத்தரவின்படி, கொலை முயற்சி வழக்கில் தொடர்புடைய ராஜமூர்த்தி கடந்த அக்டோபர் 29-ம் தேதியன்றும், சட்டவிரோத மது விற்பனையில் ஈடுபட்ட அமுதா அக்டோபர் 30-ம் தேதியன்றும் குண்டர் தடுப்புச் சட்டத்தின் கீழ் முறைப்படி சிறையில் அடைக்கப்பட்டனர்.
நடப்பாண்டில் குண்டர் சட்டத்தின் கீழ் சிறை அடைக்கப்பட்டோரின் விவரங்கள்
மயிலாடுதுறை மாவட்டத்தில் குற்றச் செயல்களை முற்றிலும் ஒழிக்கும் நடவடிக்கைகளின் ஒரு பகுதியாக நடப்பாண்டில் இதுவரை பல்வேறு தீவிர குற்றங்களில் ஈடுபட்ட ஏராளமானோர் குண்டர் சட்டத்தின் கீழ் கைது செய்யப்பட்டுள்ளனர். குறிப்பாக,
* கொலை குற்ற சம்பவங்களில் ஈடுபட்ட 5 நபர்கள்
* பொது அமைதிக்கு பங்கம் விளைவித்த 29 நபர்கள்
* மதுவிலக்கு குற்றங்களில் தொடர்புடைய 18 நபர்கள்
* கஞ்சா விற்பனை போன்ற போதைப்பொருள் குற்றங்களில் ஈடுபட்ட 22 நபர்கள்
* குட்கா விற்பனை குற்றத்தில் ஈடுபட்ட 1 நபர்
* பாலியல் குற்றங்களில் ஈடுபட்ட 5 நபர்கள்
என மொத்தம் 73 நபர்கள் மீது தடுப்பு காவல் சட்டம் பாய்ச்சப்பட்டு சிறையில் அடைக்கப்பட்டுள்ளனர். இந்த தொடர் நடவடிக்கைகளின் மூலம் மாவட்டத்தில் குற்றவாளிகள் எவரும் தப்பிக்க முடியாது என்ற நிலை உருவாக்கப்பட்டுள்ளது.
மாவட்ட காவல் கண்காணிப்பாளரின் கடுமையான எச்சரிக்கை
சமூக விரோத செயல்களில் ஈடுபடும் நபர்களின் செயல்பாடுகள் மற்றும் நடமாட்டங்கள் காவல்துறையினரால் தீவிரமாக கண்காணிக்கப்பட்டு வருவதாக மாவட்ட காவல் கண்காணிப்பாளர் திட்டவட்டமாக எச்சரித்துள்ளார். மேலும், பொதுமக்களை அச்சுறுத்தும் வகையில் ரௌடிசத்தில் ஈடுபடும் நபர்கள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடும் கொடூரர்கள், கஞ்சா மற்றும் தடை செய்யப்பட்ட புகையிலை பொருட்கள் போன்ற போதைப்பொருட்களை விற்பனை செய்பவர்கள் மற்றும் மதுவிலக்கு குற்றங்களில் தொடர்ந்து ஈடுபடுவோர் மீது எந்தவிதமான தட்சணையும் இன்றி கடுமையான குண்டர் தடுப்புச் சட்டம் பாயும் என மாவட்ட காவல் கண்காணிப்பாளர் டாக்டர் பி. சினேஹா ப்ரியா, தனது செய்திக்குறிப்பில் திட்டவட்டமாக எச்சரித்துள்ளார். காவல்துறையின் இந்த தொடர் அதிரடி நடவடிக்கைகளால் மயிலாடுதுறை மாவட்டத்தில் ரௌடிகளும் சமூக விரோதிகளும் கடும் பீதியடைந்துள்ளனர்.
தலைப்பு செய்திகள்
ட்ரெண்டிங் செய்திகள்
