"என் போனை பறிச்சிட்டாங்களே..." கோபத்தில் சிறுவன் எடுத்த விபரீத மூடிவு...

செல்போன் பயன்பாட்டை தந்தை கண்டித்ததால் 8-ஆம் வகுப்பு மாணவன்வீட்டை விட்டு வெளியேறி மாயமான சம்பவம் அதிர்ச்சியை ஏற்படுத்தியுள்ளது.

கோப்பு படம்

Source : Abp

மயிலாடுதுறை: புதுக்கோட்டை மாவட்டத்தைச் சேர்ந்த எட்டாம் வகுப்பு மாணவன் செல்போன் பயன்படுத்தியதை தந்தை கண்டித்ததால் மனவேதனையடைந்து வீட்டை விட்டு வெளியேறி மாயமான நிலையில், விழுப்புரம் பேருந்து நிலையத்தில் பத்திரமாக மீட்கப்பட்டு காப்பகத்தில் ஒப்படைக்கப்பட்ட சம்பவம் அப்பகுதியில் பெரும் பரபரப்பையும், பெற்றோரிடையே விழிப்புணர்வை ஏற்படுத்தும் வகையிலும் அமைந்துள்ளது.

செல்போன் மோகமும் தந்தையின் கண்டிப்பும்

சமீபகாலமாக சிறுவர்கள் மற்றும் மாணவர்களிடையே ஆன்லைன் கேமிங் மற்றும் சமூக வலைதளங்களின் பயன்பாடு அதிகரித்து வரும் சூழலில், கல்விக்குத் தடையாக இருக்கும் என்ற நோக்கில் பெற்றோர் கண்டிக்கும்போது ஏற்படும் விபரீதங்கள் குறித்து இச்சம்பவம் மீண்டும் ஒருமுறை வெளிச்சம் போட்டுக் காட்டியுள்ளது. 

புதுக்கோட்டை மாவட்டம் கந்தர்வகோட்டை அருகே உள்ள நடுதெருவைச் சேர்ந்தவர் உதயகுமார். இவருடைய மகனான கிரிவாசன் (14), தனது பள்ளிப் படிப்பை தொடரும் பொருட்டு மயிலாடுதுறை மாவட்டம் பெரம்பூர் காவல் நிலைய எல்லைக்கு உட்பட்ட பெருஞ்சேரி கிராமத்தில் வசிக்கும் தனது தாய்மாமன் வடிவேலுவின் வீட்டில் தங்கி கல்வி பயின்று வந்துள்ளார். அருகில் உள்ள மங்கநல்லூரில் அமைந்துள்ள கே.எஸ்.ஓ (KSO) அரசு உதவி பெறும் பள்ளியில் எட்டாம் வகுப்பு படித்து வந்த கிரிவாசன், கல்வியில் கவனம் செலுத்துவதை விட்டுவிட்டு அடிக்கடி தனது கைகளில் செல்போனை வைத்துக் கொண்டு நேரத்தை வீணடித்து வந்ததாகக் கூறப்படுகிறது.

கோபித்து வீட்டை விட்டு வெளியேறிய மாணவன்

இந்த சூழலில் மகனின் நடவடிக்கைகளில் மாற்றத்தைக் கண்காணிக்கவும், நலம் விசாரிக்கவும் வடிவேலுவின் வீட்டிற்கு தந்தை உதயகுமார் நேரில் வருகை தந்துள்ளார். அப்போது சிறுவன் கிரிவாசன் தனது படிப்பை விடுத்து தொடர்ச்சியாக செல்போனை மட்டுமே பயன்படுத்திக் கொண்டிருப்பதைக் கண்டு கடும் அதிர்ச்சியும் வேதனையும் அடைந்தார். உடனடியாக மகனிடம் இருந்த செல்போனைப் பறித்துக் கொண்ட தந்தை உதயகுமார், இளம் வயதில் கல்விதான் மிகவும் முக்கியம் என்றும், தேவையில்லாமல் செல்போனைப் பயன்படுத்தி எதிர்காலத்தை பாழாக்கக் கூடாது என்றும் மிகுந்த பாசத்தோடும் கண்டிப்போடும் அறிவுரைகளை வழங்கியுள்ளார்.

தந்தையின் இந்த கண்டிப்பான வார்த்தைகளும், தனது கைகளில் இருந்த செல்போன் பறிக்கப்பட்டதும் அந்த இளம் பிஞ்சு மனதை மிகவும் பாதித்துள்ளது. தந்தையின் கண்டிப்பை ஏற்றுக்கொள்ள முடியாத அந்த சிறுவன், மிகுந்த மனவேதனையிலும் கோபத்திலும் நேற்று மதியம் சுமார் 3 மணி அளவில் யாருக்கும் தெரியாமல் வீட்டை விட்டு வெளியேறி மாயமானார்.

தேடுதல் வேட்டையும் காவல்துறையின் புகாரும்

மதிய வேளையில் வீட்டை விட்டு வெளியே சென்ற சிறுவன் நீண்ட நேரமாகியும் வீடு திரும்பாததால் பதறிப்போன தாய்மாமன் வடிவேலு மற்றும் உறவினர்கள் அனைவரும் அக்கம் பக்கத்திலும், சுற்றியுள்ள ஊர்களிலும் தீவிரமாகத் தேடிப் பார்த்தனர். எங்கு தேடியும் மாணவன் குறித்த எந்தவிதமான தகவலும் கிடைக்காததால் பெரும் சோகமும் அதிர்ச்சியும் அடைந்த குடும்பத்தினர், நேற்று இரவே சம்பந்தப்பட்ட காவல் நிலையத்தில் புகார் அளித்தனர். காவல்துறையினர் மாணவனைத் தேடும் பணியில் தீவிரமாக ஈடுபடத் தொடங்கினர். 

இதற்கிடையே, மயிலாடுதுறையில் இருந்து பேருந்து மூலம் விழுப்புரம் வந்தடைந்த சிறுவன் கிரிவாசன், எங்கு செல்வது என்று தெரியாமல் சோகத்துடன் விழுப்புரம் பேருந்து நிலையத்தில் தனியாக நின்று கொண்டு அழுது கொண்டிருந்ததாகக் கூறப்படுகிறது.

விழுப்புரம் காப்பகத்தில் மீட்பும் பெற்றோரின் மகிழ்ச்சியும்

அச்சிறுவனின் அசாதாரணமான சூழ்நிலையையும், பதற்றமான முகத்தையும் கவனித்த அப்பகுதியில் இருந்த பொதுமக்களும் சமூக ஆர்வலர்களும் அவரிடம் சென்று விசாரித்தனர். பொதுமக்களின் அன்பான விசாரிப்பில் தான் வீட்டை விட்டு கோபித்துக் கொண்டு வந்ததை மாணவன் கண்ணீருடன் ஒப்புக்கொண்டான். இதனையடுத்து, பாதுகாப்பைக் கருத்தில் கொண்டு அந்த மாணவனை பொதுமக்களே உடனடியாக அருகில் உள்ள விழுப்புரம் காப்பகத்திற்கு அழைத்துச் சென்று பாதுகாப்பாக ஒப்படைத்தனர். 

காப்பகத்தின் பொறுப்பாளர்களும் நிர்வாகத்தினரும் மாணவனை அன்புடன் அரவணைத்து அவனிடம் ஆறுதலாக விபரங்களைக் கேட்டறிந்தனர். விசாரணையின் முடிவில் மாணவன் எங்குள்ளவன், அவனது பெற்றோர் யார் என்பது குறித்த விபரங்கள் தெரியவந்ததை அடுத்து, விழுப்புரம் காப்பக நிர்வாகத்தினர் உடனடியாக புதுக்கோட்டையில் உள்ள அவனது தந்தை உதயகுமாருக்குத் தொலைபேசி வாயிலாகத் தொடர்பு கொண்டு தகவல் தெரிவித்தனர். தங்கள் மகன் பாதுகாப்பாக இருப்பதாகக் கிடைத்த மகிழ்ச்சியான தகவலைக் கேட்டதும் பெற்றோரும் உறவினர்களும் மகிழ்ச்சியடைந்தனர்.

உடனடியாக அவர்கள் விழுப்புரம் சென்று மகனை மீட்டனர். செல்போன் பயன்பாடு காரணமாக சிறுவர்கள் வீட்டைவிட்டு ஓடும் இதுபோன்ற சம்பவங்கள் பெற்றோரிடையே பெரும் விழிப்புணர்வை ஏற்படுத்த வேண்டியது காலத்தின் கட்டாயம் என சமூக ஆர்வலர்கள் கருத்து தெரிவித்துள்ளனர்.