15 வயது சிறுமிக்கு பாலியல் தொந்தரவு: 3 பேருக்கு 11 ஆண்டுகள் சிறை! மயிலாடுதுறை நீதிமன்றத்தின் அதிரடி தீர்ப்பு!

மயிலாடுதுறை அருகே 15 வயது சிறுமிக்கு பாலியல் தொந்தரவு அளித்த 3 குற்றவாளிகளுக்கு 11 ஆண்டுகள் சிறைத் தண்டனை விதித்து மயிலாடுதுறை நீதிமன்றம் தீர்ப்பு வழங்கியுள்ளது.

தண்டனை பெற்ற குற்றவாளிகள்

Source : ABP

மயிலாடுதுறை: மயிலாடுதுறை மாவட்டத்தில் 15 வயது சிறுமிக்கு பாலியல் தொந்தரவு கொடுத்த வழக்கில் சம்பந்தப்பட்ட மூன்று குற்றவாளிகளுக்கு 11 ஆண்டுகள் சிறைத் தண்டனையும், அபராதமும் விதித்து மயிலாடுதுறை மாவட்ட அமர்வு நீதிமன்றம் அதிரடி தீர்ப்பளித்துள்ளது. இந்தத் தீர்ப்பானது பாலியல் குற்றங்களில் ஈடுபடுவோருக்கு ஒரு கடுமையான எச்சரிக்கையாக அமைந்துள்ளது.

வழக்கின் பின்னணி

மயிலாடுதுறை மாவட்டம் மயிலாடுதுறை அனைத்து மகளிர் காவல் நிலைய எல்லைக்கு உட்பட்ட 15 வயது சிறுமி ஒருவருக்கு, அதே மாவட்டத்தின் குளிச்சார் தெற்கு தெருவை சேர்ந்த ராஜ்குமார் என்பவரது மகன் 25 வயதான விமல் என்கிற விமல்ராஜ், சேரன்தோப்பு தெருவை சேர்ந்த ஜான்சேகர் என்பவரது மகன் 35 வயதான சல்மான் மற்றும் காமராஜ் என்பவரது மகன் 27 வயதான கலைவாணன் ஆகிய மூவரும் கடந்த 2021-ஆம் ஆண்டு பாலியல் தொந்தரவு அளித்துள்ளனர்.

சிறுமிக்கு நேர்ந்த இந்தத் துயரச் சம்பவம் குறித்து, பாதிக்கப்பட்ட அச்சிறுமி மயிலாடுதுறை அனைத்து மகளிர் காவல் நிலையத்தில் புகார் அளித்தார். அந்தப் புகாரின் அடிப்படையில், எதிரிகள் மீது பாலியல் குற்றங்களிலிருந்து குழந்தைகளைப் பாதுகாக்கும் சட்டம்-2012 (POCSO) பிரிவுகளின் கீழ் மயிலாடுதுறை அனைத்து மகளிர் காவல் நிலையத்தில் வழக்கு பதிவு செய்யப்பட்டது.

தீவிர விசாரணை மற்றும் கைது

வழக்கு பதிவு செய்யப்பட்டதைத் தொடர்ந்து, அப்போதைய மயிலாடுதுறை அனைத்து மகளிர் காவல் நிலைய ஆய்வாளர் கோப்பெருந்தேவி இந்த வழக்கின் விசாரணையை மேற்கொண்டார். அவரது தீவிர விசாரணையில் குற்றவாளிகள் விமல்ராஜ், சாலமன், மற்றும் கலைவாணன் ஆகியோர் கைது செய்யப்பட்டு நீதிமன்றக் காவலுக்கு அனுப்பப்பட்டனர். விசாரணை முடிவடைந்த நிலையில், குற்றவாளிகள் மீது குற்றப்பத்திரிகை நீதிமன்றத்தில் தாக்கல் செய்யப்பட்டது. இதைத் தொடர்ந்து, வழக்கின் விசாரணையானது மயிலாடுதுறை மாவட்ட அமர்வு நீதிமன்றத்தில் நடந்து வந்தது.

நீதிமன்றத் தீர்ப்பு - 11 ஆண்டுகள் தண்டனை

நீண்ட நாட்களாக நடந்து வந்த இவ்வழக்கினை மயிலாடுதுறை மாவட்ட அமர்வு நீதிமன்ற நீதிபதி சத்தியமூர்த்தி விசாரித்தார். வழக்கில் தாக்கல் செய்யப்பட்ட ஆதாரங்கள் மற்றும் சாட்சியங்களை கவனமாக ஆராய்ந்த நீதிபதி, குற்றவாளி விமல்ராஜ், சாலமன் மற்றும் கலைவாணன் ஆகிய மூவரையும் குற்றவாளிகள் எனத் தீர்மானித்தார். குற்றவாளிகள் மீதான குற்றச்சாட்டுகள் நிரூபிக்கப்பட்டதை அடுத்து, குற்றவாளிகள் மூவருக்கும் 11 ஆண்டுகள் சிறைத் தண்டனை மற்றும் அபராதம் விதித்து நீதிபதி சத்தியமூர்த்தி (15.10.2025) தீர்ப்பளித்தார். இந்தக் கடுமையான தண்டனை, குழந்தைகளுக்கு எதிரான குற்றங்களுக்குத் தமிழக அரசு மற்றும் நீதிமன்றங்கள் எவ்வளவு முக்கியத்துவம் அளிக்கின்றன என்பதை மீண்டும் நிரூபித்துள்ளது.

அரசு வழக்கறிஞர் மற்றும் போலீசாருக்கு பாராட்டு

இந்த வழக்கில் அரசு தரப்பில் வழக்கறிஞர் இராம. சேயோன் ஆஜராகி வாதாடினார். அவரது வலுவான வாதங்களே குற்றவாளிகளுக்கு உரிய தண்டனை பெற்றுத் தர உதவியது. பாலியல் தொந்தரவு வழக்கில் குற்றவாளிகளுக்குத் தண்டனை பெற்றுத் தரும் வகையில் சிறப்பாகப் பணியாற்றிய அரசு வழக்கறிஞர் இராம. சேயோன், மயிலாடுதுறை அனைத்து மகளிர் காவல் நிலைய ஆய்வாளர் சுகந்தி மற்றும் நீதிமன்ற அலுவல் புரிந்த தலைமை காவலர் வேலன்டினா ஆகியோரை மாவட்ட காவல் கண்காணிப்பாளர் ஸ்டாலின், வெகுவாகப் பாராட்டினார்.

இளம் வயதுச் சிறுமிக்கு இழைக்கப்பட்ட கொடுமைக்கு நீதிமன்றம் உடனடியாக நியாயம் வழங்கியிருப்பது பாதிக்கப்பட்ட சிறுமிக்கும் அவரது குடும்பத்தினருக்கும் ஆறுதல் அளிப்பதாக அமைந்துள்ளது. குழந்தைகளைப் பாதுகாக்கும் சட்டத்தின் கீழ் வழங்கப்படும் இந்தத் தண்டனை, எதிர்காலத்தில் இத்தகைய குற்றங்களைச் செய்யத் துணிபவர்களுக்கு ஒரு பயனுள்ள தடுப்புச் சக்தியாக அமையும் என்று சமூக ஆர்வலர்கள் நம்பிக்கை தெரிவித்தனர். பெண்களுக்கு, குறிப்பாகக் குழந்தைகளுக்கு எதிரான குற்றங்களைத் தடுப்பதில் காவல்துறை தொடர்ந்து உறுதியுடன் செயல்பட வேண்டும் என்றும் அவர்கள் கோரிக்கை விடுத்தனர். இத்தீர்ப்பு மூலம், பாலியல் தொந்தரவு வழக்குகளில் விரைவான விசாரணை மற்றும் உரிய தண்டனை உறுதிப்படுத்தப்படும் என்ற நம்பிக்கை மக்கள் மத்தியில் ஏற்பட்டுள்ளது.

இதையும் படிக்க

Magalir Urimai Thogai: டிச.15 முதல் புதிதாக விண்ணப்பித்தோருக்கும் ரூ.1000; இந்த விதிகள் எல்லாம் தளர்வு- சூப்பர் அப்டேட் கொடுத்த உதயநிதி!

தமிழ்நாட்டில் வடகிழக்கு பருவமழை தொடங்கியது; வட மாவட்டங்களில் மழை வெளுக்கும் - வானிலை மையம்