5-ம் வகுப்பு படித்திருந்தாலே போதும்! மயிலாடுதுறை ஆட்சியர் அலுவலகத்தில் நவ.27 நேரடி வேலைவாய்ப்பு முகாம்!
மயிலாடுதுறை மாவட்ட ஆட்சியர் அலுவலக DRDA அரங்கில் 27.11.2026 அன்று நடைபெறும் இலவச தனியார்துறை வேலைவாய்ப்பு முகாமில் 500 மேற்பட்ட பணியிடங்களுக்கு ஆட்கள் தேர்வு செய்யப்படுகிறது.

மயிலாடுதுறை: மயிலாடுதுறை மாவட்டத்தைச் சேர்ந்த படித்த, வேலையற்ற இளைஞர்கள் மற்றும் இளம்பெண்களின் வாழ்வாதாரத்தை மேம்படுத்தும் வகையிலும், அவர்களுக்குத் தகுதிக்கேற்ற வேலைவாய்ப்பை உள்ளூரிலேயே உருவாக்கித் தரும் நோக்கிலும், மாவட்ட நிர்வாகம் மற்றும் மயிலாடுதுறை மாவட்ட வேலைவாய்ப்பு மற்றும் தொழில்நெறி வழிகாட்டும் மையம் இணைந்து சிறிய அளவிலான தனியார்துறை வேலைவாய்ப்பு முகாமை நடத்தத் திட்டமிட்டுள்ளன.
இந்த வேலைவாய்ப்பு முகாம் எதிர்வரும் 27.11.2026 வெள்ளிக்கிழமையன்று மயிலாடுதுறை மாவட்ட ஆட்சியர் அலுவலக வளாகத்தில் அமைந்துள்ள டி.ஆர்.டி.ஏ (DRDA) அரங்கில் நடைபெற உள்ளது. காலை 10.00 மணிக்குத் தொடங்கும் இம்முகாம் மதியம் 2.00 மணி வரை தொடர்ந்து நடைபெறும். இதில் பங்கேற்கும் வேலைநாடுநர்கள் மற்றும் வேலையளிக்கும் நிறுவனங்கள் என எவரிடமும் எவ்விதக் கட்டணமும் வசூலிக்கப்படாது என்பதும், இம்முகாம் முற்றிலும் இலவசமாக நடத்தப்படுகிறது என்பதும் குறிப்பிடத்தக்கது.
முன்னணி நிறுவனங்களும் பணிவாய்ப்புகளும்
மயிலாடுதுறை மாவட்ட இளைஞர்களின் வேலைவாய்ப்புத் தேவையைப் பூர்த்தி செய்யும் வகையில் நடத்தப்படும் இந்த முகாமில், மயிலாடுதுறை மாவட்டம் மட்டுமின்றி தமிழகத்தின் பிற முக்கிய மாவட்டங்களைச் சேர்ந்த 25-க்கும் மேற்பட்ட முன்னணித் தனியார் நிறுவனங்கள் நேரடியாகப் பங்கேற்க உள்ளன.
உற்பத்தித் துறை, தகவல் தொழில்நுட்பம், வங்கி மற்றும் நிதி சேவைகள், சில்லறை வணிகம், மருத்துவம், ஜவுளி மற்றும் பொறியியல் உள்ளிட்ட பல்வேறு துறைகளைச் சேர்ந்த நிறுவனங்களின் மனிதவள மேம்பாட்டு அதிகாரிகள் இம்முகாமில் கலந்து கொண்டு நேர்முகத் தேர்வுகளை நடத்த உள்ளனர். இதன் மூலம் தங்கள் நிறுவனங்களில் உள்ள பல்வேறு காலிப் பணியிடங்களுக்காக 500-க்கும் மேற்பட்ட தகுதியான வேலைநாடுநர்களைத் தேர்வு செய்து உடனடியாகப் பணி நியமன ஆணைகளை வழங்கத் திட்டமிட்டுள்ளனர்.
கல்வித் தகுதி மற்றும் வயது வரம்பு
இந்த வேலைவாய்ப்பு முகாமில் அனைத்துத் தரப்பு இளைஞர்களும் பயன்பெறும் வகையில் மிக எளிமையான தகுதிகள் நிர்ணயிக்கப்பட்டுள்ளன. குறைந்தபட்சம் 5-ஆம் வகுப்பு தேர்ச்சி பெற்றவர்கள் முதல் 8-ஆம் வகுப்பு, 10-ஆம் வகுப்பு மற்றும் 12-ஆம் வகுப்பு வரை படித்தவர்கள் வரை அனைவரும் இதில் கலந்து கொள்ளலாம். மேலும், தொழிற்பயிற்சி நிலையங்களில் ஐடிஐ (ITI) முடித்தவர்கள், பாலிடெக்னிக் கல்லூரிகளில் டிப்ளமோ (Diploma) பட்டம் பெற்றவர்கள், பி.இ (B.E) மற்றும் பி.டெக் (B.Tech) உள்ளிட்ட பொறியியல் பட்டதாரிகள் மற்றும் கலை, அறிவியல், வணிகவியல் உள்ளிட்ட இதர பட்டப்படிப்புகளை முடித்த பட்டதாரிகளும் தங்களுக்குப் பொருத்தமான பணியிடங்களுக்கு விண்ணப்பிக்கலாம்.
விண்ணப்பதாரர்கள் 18 வயது பூர்த்தியடைந்தவராகவும், அதிகபட்சம் 35 வயதுக்குட்பட்டவராகவும் இருத்தல் அவசியம். முன் அனுபவம் உள்ளவர்களுக்கு முன்னுரிமை அளிக்கப்படும் அதே வேளையில், புதிதாகப் படிப்பை முடித்தவர்களுக்கும் ஏராளமான வாய்ப்புகள் காத்திருக்கின்றன.
கூடுதல் வழிகாட்டுதல்கள் மற்றும் நலத்திட்ட உதவிகள்
வெறும் தனியார் வேலைவாய்ப்புகளை வழங்குவதோடு நின்றுவிடாமல், இளைஞர்களின் எதிர்காலத்தை வடிவமைக்கும் பல்வேறு கூடுதல் சேவைகளும் இம்முகாமில் ஒருங்கிணைக்கப்பட்டுள்ளன. தமிழ்நாடு அரசின் 'வெற்றி நிச்சயம்' திட்டத்தின் வாயிலாக, வேலைவாய்ப்பிற்குத் தேவையான நவீனத் திறன் மேம்பாட்டுப் பயிற்சிகள் குறித்த விவரங்கள் வழங்கப்பட்டு, விருப்பமுள்ளவர்கள் அதில் இணைந்து பயிற்சி பெறவும் ஏற்பாடு செய்யப்பட்டுள்ளது. மேலும், சொந்தமாகத் தொழில் தொடங்க ஆர்வம் கொண்ட இளைஞர்களுக்கு அரசு மானியத்துடன் கூடிய வங்கிக்கடன் வசதிகள் குறித்த ஆலோசனைகளும் வழங்கப்படும். இதுதவிர, வெளிநாடுகளுக்குச் சென்று பணியாற்ற விரும்புவோருக்கு அயல்நாட்டு வேலைவாய்ப்பு நிறுவனத்தின் மூலம் பாதுகாப்பான முறையில் வேலைக்குச் செல்வதற்கான வழிகாட்டுதல்களும், அரசுப் பணிகளில் சேர விரும்பும் மாணவர்களுக்கு டி.என்.பி.எஸ்.சி (TNPSC) உள்ளிட்ட போட்டித் தேர்வுகளுக்குத் தயாராவது குறித்த இலவச ஆலோசனைகளும் அனுபவமிக்க வல்லுநர்களால் வழங்கப்பட உள்ளன.
தேவையான ஆவணங்கள் மற்றும் இணையதளப் பதிவு
இம்முகாமில் கலந்து கொள்ள விரும்பும் வேலைநாடுநர்கள் தங்களின் முழுமையான சுய விவர அறிக்கை (Bio-data / Resume), அனைத்துக் கல்வித் தகுதிச் சான்றிதழ்களின் நகல்கள், அடையாளச் சான்றான ஆதார் அட்டை நகல் மற்றும் சமீபத்தில் எடுக்கப்பட்ட பாஸ்போர்ட் அளவு புகைப்படங்கள் ஆகியவற்றைத் தவறாமல் எடுத்து வர வேண்டும். ஏற்கனவே வேறு நிறுவனங்களில் பணியாற்றிய முன் அனுபவம் ஏதேனும் இருப்பின், அதற்கான பணி அனுபவச் சான்றிதழ்களின் நகல்களையும் உடன் கொண்டு வருவது தேர்வுக்கு மிகவும் உதவியாக இருக்கும். முகாமில் பங்கேற்க விரும்பும் வேலைநாடுநர்கள் மற்றும் தங்களுக்குத் தேவையான உள்ளூர் பணியாளர்களைத் தேர்வு செய்ய விரும்பும் மயிலாடுதுறை மாவட்டத்தைச் சேர்ந்த தனியார் நிறுவனங்கள், தமிழக அரசின் அதிகாரப்பூர்வ இணையதளமான www.tnprivatejobs.tn.gov.in என்ற முகவரியில் தங்களது விவரங்களை முன்கூட்டியே பதிவு செய்து கொள்ளுமாறு வலியுறுத்தினர்.
மாவட்ட ஆட்சியரின் வேண்டுகோள்
மயிலாடுதுறை மாவட்டத்தைச் சேர்ந்த தனியார் நிறுவனங்கள் தங்களுக்குத் தேவைப்படும் திறமையான உள்ளூர் பணியாளர்களைத் தேர்வு செய்து கொள்ள இந்த அரிய வாய்ப்பைப் பயன்படுத்திக் கொள்ள வேண்டும். அதேபோல், மாவட்டத்தில் உள்ள வேலைவாய்ப்பற்ற இளைஞர்கள் அனைவரும் இந்த வாய்ப்பைத் தவறவிடாமல், உரிய சான்றிதழ்களுடன் 27.11.2026 அன்று காலை 10 மணிக்கு மாவட்ட ஆட்சியர் அலுவலகத்தில் உள்ள டி.ஆர்.டி.ஏ (DRDA) அரங்கிற்கு நேரில் வருகை தந்து தங்களுக்குப் பிடித்தமான பணியினைப் பெற்றுப் பயனடையுமாறு மயிலாடுதுறை மாவட்ட ஆட்சியர் ஹெச்.எஸ். ஸ்ரீகாந்த், தனது செய்திக்குறிப்பில் தெரிவித்துள்ளார். இம்முகாம் தொடர்பான கூடுதல் விவரங்கள் மற்றும் சந்தேகங்களுக்கு 04364-299790 என்ற தொலைபேசி எண்ணைத் தொடர்பு கொண்டு பயன்பெறலாம் என்றும் அறிவுறுத்தப்பட்டுள்ளது.
தலைப்பு செய்திகள்
ட்ரெண்டிங் செய்திகள்























