ஆர்யன் கானுக்கு ஜாமீன் கிடைத்த மாதிரி 2 லட்சம் பேருக்கும் கிடைக்குமா? - கேள்வி எழுப்பிய முன்னாள் நீதிபதி

’பார்க்கின்ஸன் நோய் உடைய ஒருவர் (ஸ்டான் ஸ்வாமி) எத்தனையோ முறை ஜாமீன் கோரியும் அவர் சாகக் கிடந்த தருவாயில்தான் மருத்துவமனைக்கு எடுத்துச் சென்றார்கள்.'

ஆர்யன் கான்

மும்பை சொகுசுக் கப்பல் போதைப்பொருள் வழக்கில் கைதான ஆர்யன் கானுக்கு மிக நீண்ட போராட்டத்துக்குப் பின் அந்த வழக்கிலிருந்து அண்மையில் ஜாமீன் கிடைத்தது. இதைப் பற்றிக் கருத்துக் கூறியுள்ள முன்னாள் இந்திய உச்சநீதிமன்ற நீதிபதியும் ஃபிஜி நாட்டின் நீதிபதியுமான மதன் பி.லோகூர் ‘இன்று காலை நிலவரப்படி இந்தியாவில் இதுவரை 2 லட்சம் பேரின் ஜாமீன் மனுவுக்கு விடைகிடைக்காமல் உள்ளது. ஆர்யன் கானுக்கு கிடைத்த நீதி இந்த இரண்டு லட்சம் பேருக்கும் கிடைக்குமா?’ எனக் கேள்வி எழுப்பியுள்ளார். மேலும், ’பார்க்கின்ஸன் நோய் உடைய ஒருவர் (ஸ்டான் ஸ்வாமி) எத்தனையோ முறை ஜாமீன் கோரியும் அவர் சாகக் கிடந்த தருவாயில்தான் மருத்துவமனைக்கு எடுத்துச் சென்றார்கள். ஸ்டரா வைத்த டம்ளர் கேட்டதைக் கூடத் தரமறுத்துவிட்டார்கள்’ என புத்தக வெளியீட்டு நிகழ்வு ஒன்றில் பேசிய அவர் குறிப்பிட்டுள்ளார். 

முன்னதாக, ஷாரூக் கானின் மகன் ஆர்யன் கான் சுமார் 25 நாள்களுக்கு முன், போதை மருந்து வைத்திருந்ததாகக் குற்றம் சாட்டப்பட்டு போதை மருந்து தடுப்புப் பிரிவு அதிகாரிகள் கைது செய்தனர். ஆர்யன் கானுக்கு இந்த வழக்கில் ஷாரூக் கான் தரப்பில் இருந்து ஜாமீன் பெறுவதற்காகக் கடும் முயற்சிகள் எடுக்கப்பட்டு வந்த நிலையில், தொடர்ந்து ஜாமீன் அளிக்க மறுத்து வந்த நீதிமன்றம் கடந்த வியாழக்கிழமை ஜாமீன் வழங்கி உத்தரவிட்டது. 

 

இதனையடுத்து, மூன்று தினங்களுக்கு முன்பே சிறையில் இருந்து வெளிவருவார் என்று எதிர்பார்க்கப்பட்ட நிலையில், ஜாமீன் தொடர்பான ஆவணங்கள் சிறை அதிகாரிகளுக்கு அனுப்பி வைக்கப்படவில்லை. இதன், காரணமாக ஆர்யன் கானின் விடுதலை தாமதமானது.வழக்கில் வெளியிட்டுள்ள ஜாமீன் உத்தரவில் ஆர்யன் கான் ஒவ்வொரு வெள்ளிக் கிழமை அன்றும் போதை மருந்து தடுப்புப் பிரிவு அலுவலகத்திற்குச் செல்ல வேண்டும் என்றும், தனது பாஸ்போர்டைச் சமர்பிக்க வேண்டும் என்றும் கூறப்பட்டுள்ளதுஇந்த வழக்கில் ஆர்யன் கானுடன் சிறையில் அடைக்கப்பட்ட அர்பாஸ் மெர்சண்ட், முன்முன் தாமேச்சா ஆகியோருக்கும் ஜாமீன் வழங்கப்பட்டுள்ளது. ஆர்யன் கானின் கைது குறித்து பல்வேறு பாலிவுட் கலைஞர்கள் கருத்து தெரிவித்துள்ள நிலையில், இதுவரை நடிகர் ஷாரூக் கானோ, அவரது மனைவி கௌரி கானோ எந்தக் கருத்தும் வெளியிடவில்லை என்பது குறிப்பிடத்தக்கது. 

’ஷாரூக்கான் இந்தியாவின் தலைசிறந்த வழக்கறிஞர்கள் குழு என தான் கருதிய வழக்கறிஞரை இந்த வழக்கில் வாதிடுவதற்காக கேட்டுக்கொண்டார். ஆனால் ஷாரூக்கான் போன்ற வசதி வாய்ப்பு இந்தியாவில் எத்தனை பேருக்குக் கிடைக்கும். இப்படி கீழ்மை நீதிமன்றங்கள் செய்வதால் எத்தனை பேர் ஜாமீன் பெறமுடியாமல் சிறையில் தவிக்கின்றனர் என்பதை நாம் சிந்திக்க வேண்டும்.’ என ஆர்யன் கானுக்காக வாதிட்ட வழக்கறிஞர் சதீஷ் மனேஷிண்டே கூறியதும் குறிப்பிடத்தக்கது.