இடைத்தேர்தலில் ஆதிக்கம் செலுத்திய பாஜக...கோட்டையை பறி கொடுத்த அகிலேஷ்

மின்னணு வாக்குப்பதிவு இயந்திரம் திறக்கப்பட்டதையடுத்து வாக்கு எண்ணிக்கை காலை 8 மணிக்கு தொடங்கியது.

கோப்புப்படம்

டெல்லி மற்றும் ஐந்து மாநிலங்களில் உள்ள மூன்று மக்களவை மற்றும் ஏழு சட்டப்பேரவை தொகுதிகளுக்கான இடைத்தேர்தல் முடிவுகள் இன்று வெளியிடப்பட்டது.

உத்தரப் பிரதேசம் ராம்பூர் தொகுதியில் பாஜக வேட்பாளர் கன்ஷ்யாம் லோதி 40,000 வாக்குகள் வித்தியாசத்தில் வெற்றிபெற்றார். அசாம்கார் தொகுதியிலும் பாஜக வேட்பாளர் தினேஷ் லால் யாதவ், சமாஜ்வாதி கட்சியின் தர்மேந்தியர யாதவை தோற்கடித்து வெற்றி வாகை சூடினார்.

சமாஜ்வாதி கட்சி தலைவர் அகிலேஷ் யாதவ், அக்கட்சியின் மூத்த தலைவர் அசாம் கான் ஆகியோர் தங்களது எம்எல்ஏ பதவியை ராஜிநாமா செய்ததையடுத்து இடைத்தேர்தல் நடத்தப்பட்டது.

திரிபுரா மாநிலத்தை பொறுத்தவரை ஆளும் பாஜக மூன்று சட்டப்பேரவை தொகுதிகளிலும் காங்கிரஸ் ஒரு தொகுதியிலும் வெற்றிபெற்றது. பர்தோவாலி தொகுதியில் 6,000 வாக்குகள் வித்தியாசத்தில் திரிபுரா முதலமைச்சர் மாணிக் சஹா வெற்றிபெற்றுள்ளார்.

டெல்லி ராஜிந்தர் நகர் இடைத்தேர்தலில் ஆம் ஆத்மி வேட்பாளர் துர்கேஷ் பதக் 11,000 வாக்குகள் வித்தியாசத்தில் வெற்றிபெற்றார். ஆம் ஆத்மி கட்சியின் செய்தித் தொடர்பாளர் ராகவ் சட்டா மாநிலங்களவைக்கு தேர்ந்தெடுக்கப்பட்டதையடுத்து, ராஜிந்தர் நகர் தொகுதிக்கு இடைத்தேர்தல் நடத்தப்பட்டது.

அதிகாரப்பூர்வ தகவல்களின்படி, ஆம் ஆத்மி கட்சியின் துர்கேஷ் பதக் 40,319 வாக்குகளையும், பாஜக வேட்பாளர் ராஜேஷ் பாட்டியா 28,851 வாக்குகளையும் பெற்றனர். காங்கிரஸ் வேட்பாளர் பிரேம் லதாவால் 2014 வாக்குகள் மட்டுமே பெற முடிந்தது.

ஜார்கண்ட் மாநிலத்தில் சட்டப்பேரவை உறுப்பினர் பந்து திர்கி ஊழல் வழக்கில் சிக்கி தகுதி நீக்கம் செய்யப்பட்டதையடுத்து, அங்கு இடைத்தேர்தல் நடத்தப்பட்டது. 

அவரின் மகளான ஷில்பி நேஹா டிர்கியை ஆளும் ஜார்கண்ட் முக்தி மோர்ச்சா தலைமையிலான கூட்டணி பொது வேட்பாளராக நிறுத்தியது. பாஜக சார்பாக முன்னாள் எம்எல்ஏ கங்கோத்ரி குஜூர் அந்த தொகுதியில் வேட்பாளராக களம் இறக்கப்பட்டார். ஜார்க்கண்ட் இடைத்தேர்தலில் அசாதுதீன் ஓவைசியின் அகில இந்திய மஜ்லிஸ்-இ-இத்தேஹாதுல் முஸ்லிமீன் ஆதரவுடன் சுயேச்சை வேட்பாளர் தேவ் குமார் தானும் போட்டியிட்டார். கடும் போட்டிக்கு மத்தியில், மந்தர் தொகுதியில் காங்கிரஸ் வேட்பாளர் ஷில்பி வெற்றி பெற்றார்.

கடந்த பிப்ரவரி மாதம் தொழில்துறை அமைச்சர் மேகபதி கவுதம் ரெட்டி காலமானதையடுத்து, ஆந்திராவில் காலியாக இருந்த இடத்துக்கு இடைத்தேர்தல் நடத்தப்பட்டது. அவரது தம்பி விக்ரம் ரெட்டி ஆளும் ஒய்எஸ்ஆர் காங்கிரஸ் வேட்பாளராக நிறுத்தப்பட்டு வெற்றி பெற்றுள்ளார்.

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூட்யூபில் வீடியோக்களை காண