"ஆதாரங்களை வழங்கிவிட்டோம்" நிஜ்ஜார் கொலையில் இந்தியாவுக்கு தொடர்பு.. கனடா மீண்டும் குற்றச்சாட்டு

ஹர்தீப் சிங் நிஜ்ஜார் சுட்டுக் கொலை செய்யப்பட்ட சம்பவத்தின் பின்னணியில் இந்திய அரசு இருக்கலாம் என்று கனடா பிரதமர் ஜஸ்டின் ட்ரூடோ தெரிவித்திருந்தார்.

கனட இந்திய பிரதமர்கள்

கடந்த ஜூன் மாதம் கனட நாட்டைச் சேர்ந்த சீக்கிய பிரிவினைவாத தலைவர் ஹர்தீப் சிங் நிஜ்ஜார் என்பவர் அடையாளம் தெரியாத இரண்டு நபர்களால் சுட்டுக் கொலை செய்யப்பட்டார். இந்த சம்பவம் இப்போது  விஸ்வரூபம் எடுத்துள்ளது. ஹர்தீப் சிங் நிஜ்ஜார் சுட்டுக் கொலை செய்யப்பட்ட சம்பவத்தின் பின்னணியில் இந்திய அரசு இருக்கலாம் என்று கனடா பிரதமர் ஜஸ்டின் ட்ரூடோ, அந்நாட்டு நாடாளுமன்றத்தில் தெரிவித்தார்.

இந்திய கனட உறவில் விரிசல்:

கனட பிரதமரின் குற்றச்சாட்டு உலக நாடுகளை அதிர்ச்சிக்கு உள்ளாக்கியுள்ளது. ஜஸ்டின் ட்ரூடோவின் கருத்தை முற்றிலுமாக நிராகரித்த இந்தியா, அதற்கு கண்டனம் தெரிவித்தது. இந்த கொலையில் இந்திய உளவுத்துறை அதிகாரிகளின் தொடர்பு இருப்பதற்கான ஆதாரங்கள் இருப்பதாக கனட அரசு தெரிவித்தது. ஆனால், இது தொடர்பான ஆதாரங்களை தங்களிடம் வழங்கவில்லை என இந்தியா கூறி வருகிறது. 

இந்த நிலையில், ஹர்தீப் சிங் நிஜ்ஜார் கொலையில் இந்திய உளவுத்துறை அதிகாரிகளின் தொடர் இருப்பதற்கான ஆதாரத்தை பல வாரங்களுக்கு முன்பே இந்தியாவிடம் கனட பகிர்ந்துவிட்டதாக கனட பிரதமர் ட்ரூடோ தெரிவித்துள்ளார். கனட தலைநகர் ஒட்டாவாவில் நேற்று செய்தியாளர் சந்திப்பு நடைபெற்றது.

கனட பிரதமர் மீண்டும் குற்றச்சாட்டு:

இதில் கலந்து கொண்ட ஜஸ்டின் ட்ரூடோ, "திங்களன்று நான் பேசிய நம்பகமான குற்றச்சாட்டுகளுக்கான ஆதாரத்தை கனடா இந்தியாவுடன் பகிர்ந்து கொண்டது. நாங்கள் அதை பல வாரங்களுக்கு பகிர்ந்துவிட்டோம். இந்தியாவுடன் ஆக்கப்பூர்வமாக செயல்பட நாங்கள் விரும்புகிறோம். இந்த சீரியசான பிரச்னையின் அடிப்படை கூறை ஆராய அவர்கள் (இந்தியா) எங்களுடன் பேச்சுவார்த்தையில் ஈடுபடுவார்கள் என நம்புகிறோம்" என தெரிவித்துள்ளார்.

ஹர்தீப் சிங் கொலை தொடர்பாக கடந்த ஒரு மாதமாக விசாரணை நடத்தி வரும் கனடா, சென்போன் சிக்னல் மூலமாகவும் பல நபர்களின் மூலமாகவும் உளவுத்தகவல்களை சேகரித்துள்ளதாகக் கூறப்படுகிறது. கனடாவில் உள்ள இந்திய அதிகாரிகள் பரிமாறி கொண்ட தகவல்கள், அமெரிக்கா, பிரிட்டன், ஆஸ்திரேலியா, நியூசிலாந்து உள்ளிட்ட நாடுகளிடமிருந்து கிடைத்த உளவுத்தகவல்களை அடிப்படையாக கொண்டு இந்தியா மீது கனட குற்றச்சாட்டு சுமத்தியுள்ளதாக செய்தி வெளியாகியுள்ளது.

இந்த  விவகாரம் தொடர்பாக கனடாவுக்கான இந்திய தூதர் ஒருவரை  தங்கள் நாட்டில் இருந்து கனடா வெளியேற்றியுள்ளது. அதற்கு பதிலடி கொடுக்கும் விதமாக இந்தியாவும் கனடாவின் தூதர் ஒருவரை வெளியேற்றியது. கனட நாட்டவருக்கு விசா வழங்குவதை இந்திய தூதரகம் தற்காலிகமாக நிறுத்தியுள்ளது.

இந்திய கனட விவகாரம் குறித்து கருத்து தெரிவித்துள்ள அமெரிக்க வெளியுறவுத்துறை அமைச்சர் ஆண்டனி பிளிங்கன், "பிரதமர் ட்ரூடோ எழுப்பியுள்ள குற்றச்சாட்டுகள் குறித்து நாங்கள் ஆழ்ந்த கவலை கொண்டுள்ளோம்" என்றார்.