Chennai Corporation | கொரோனாவுடன் இணை நோய் உள்ளவர்களுக்கு, பல்ஸ் ஆக்ஸிமீட்டர் வழங்க சென்னை மாநகராட்சி திட்டம்

சென்னையில் கொரோனா தொற்று பாதிக்கப்பட்டு இணை நோயுடன் இருக்கும் வசதி இல்லாதவர்களுக்கு பல்ஸ் ஆக்ஸி மீட்டர் வழங்க சென்னை மாநகராட்சி திட்டமிட்டுள்ளது

பல்ஸ் ஆக்ஸி மீட்டர்

பெருநகர சென்னை மாநகராட்சிக்கு உட்பட்ட பகுதிகளில் கோவிட் நோய் தொற்றை கட்டுப்பட்டுத்த மாநகராட்சி பல்வேறு நடவடிக்கைகளை எடுத்துவருகிறது. கடந்த மே மாதம் வரையில், பெருநகர சென்னை மாநகராட்சிக்கு உட்பட்ட பகுதிகளில் 20 லட்சத்திற்கு மேற்பட்டவர்களுக்கு கொரோனா தடுப்பூசிகளை மாநகராட்சி செலுத்தியுள்ளது. இந்த நிலையில் சென்னை மாநகராட்சியில் வசிக்கும் கொரோனா தொற்றால் பாதிக்கப்பட்டு இணைநோய்கள் இருக்கும் வசதி இல்லாத நபர்களின் உடல் நிலையை கண்காணிக்க பல்ஸ் ஆக்ஸி மீட்டர் கருவியை வழங்க மாநகராட்சி திட்டமிட்டுள்ளது.

கொரோனா தொற்று இரண்டாம் அலை பரவலில் சுவாசக் கோளாறால் ஏராளமானோர் பாதிக்கப்படும் நிலையில் பல்ஸ் ஆக்ஸி மீட்டரை கொண்டு ஆக்சிஜன் அளவு, இதயதுடிப்பு ஆகியவற்றை அறிந்து கொள்ள முடியும். பல்ஸ் ஆக்ஸி மீட்டர் கருவியின் விலை தொடர்ந்து அதிகரித்து வரும் நிலையில் கொரோனா தொற்று பாதித்து வீடுகளில் தனிமைப்படுத்தப்பட்டுள்ள நபர்களுக்கு தேவையான அடிப்படை உதவிகளை மேற்கொள்வதற்கு மாநகராட்சியின் சார்பில் தன்னார்வலர்கள் பணியமர்த்தப்பட்டு நோய் தொற்று பாதித்த நபர்களுக்கு தேவையான உதவிகளை அளித்து வருகின்றனர். இந்த தன்னார்வலர்கள் தனிமைப்படுத்தப்பட்ட நபர்களின் வீட்டிற்கு நாள்தோறும் இருமுறை சென்று அவர்களிடம் அடிப்படை தேவைகள் குறித்தும், உடல்நலம் குறித்தும் கேட்டறிந்து அதுகுறித்த தகவல்களை சம்பந்தப்பட்ட வார்டு அல்லது மண்டல மருத்துவ குழுவினரிடம் தெரிவித்து நடவடிக்கை மேற்கொண்டு வருகின்றனர்.

ஒவ்வொரு மண்டலத்திலும் தொலைபேசி வாயிலாக மருத்துவ ஆலோசனைகள் வழங்க கட்டுப்பாட்டு அறைகள் ஏற்படுத்தப்பட்டு அதன் மூலமும் நோயாளிகள் கண்காணிக்கப்பட்டு வருகின்றனர். இத்தகைய கண்காணிப்பினை மேலும் தீவிரப்படுத்தும் வகையில் பெருநகர சென்னை மாநகராட்சிக்கு உட்பட்ட பகுதிகளில் கோவிட் தொற்றால் பாதிக்கப்பட்டு வீடுகளிலேயே  தனிமைப்படுத்தப்பட்டுள்ள நபர்களுக்கு பல்ஸ் ஆக்ஸி மீட்டர் வழங்கும் திட்டத்தினை மாநகராட்சி அறிமுகப்படுத்தியுள்ளது. இத்திட்டத்தின் மூலம் 45 வயதிற்கு மேற்பட்ட இணை நோயுடைய கொரோனா தொற்று பாதித்த நபர்கள் மற்றும் தொற்றால் பாதிக்கப்பட்டு சொந்தமாக பல்ஸ் ஆக்ஸி மீட்டர் வாங்க வசதி இல்லாத வறுமை கோட்டுக்கு கீழ் உள்ள குடும்பங்களை சேர்ந்த நபர்களுக்கு அந்த பகுதியை சேர்ந்த தன்னார்வலர்கள் மூலமாக பல்ஸ் ஆக்ஸி மீட்டர் வழங்கப்பட உள்ளது.

இந்த பல்ஸ் ஆக்ஸி மீட்டரை கொண்டு நோயாளிகள் நாள்தோறும் தங்கள் ரத்தத்தில் உள்ள ஆக்சிஜன் அளவினை இரு முறை கண்காணித்து தன்னார்வலர்களிடம் தெரிவிக்க வேண்டும். தொற்று பாதித்த நபர் முழுவதுமாக குணமடைந்த உடன் பல்ஸ் ஆக்ஸி மீட்டர் கருவியை சம்பந்தப்பட்ட தன்னார்வலர்கள் மூலமாக மாநகராட்சிக்கு திரும்ப ஒப்படைக்க வேண்டும். சென்னை மாநகராட்சிக்கு உட்பட்ட பகுதிகளில் பல்வேறு தன்னார்வலர்களிடம் இருந்து இதுவரை 10,400 பல்ஸ் ஆக்ஸி மீட்டர் கருவிகள் நன்கொடையாக பெறப்பட்டுள்ளது. கோவிட் கண்காணிப்பு பணிகளை மேலும் தீவிரப்படுத்தும் வகையில் ஆர்வமுள்ள நிறுவனங்கள் மற்றும் தன்னார்வலர்கள் பல்ஸ் ஆக்ஸி மீட்டர் கருவிகள் உள்ளிட்ட மருத்துவ உபகரணங்களை 94983 46492 என்ற எண்ணில் தொடர்புகொண்டு நன்கொடையாக வழங்கலாம் என சென்னை மாநகராட்சி தெரிவித்துள்ளது