Yoga | முகமும் மிக முக்கியம்.. முக ஆரோக்கியத்திற்கான சின்ன சின்ன யோகா..!

முகத்திற்காக சில எளிமையான  யோகா பயிற்சிகள் உள்ளன.

யோகா

அழகை பராமரிக்க என்ன என்னமோ செய்து கொண்டு இருப்போம். ஆனால் தசைகளுக்கு தேவையான ஊட்டச்சத்துகள் கிடைத்தாலே உடல் புத்துணர்ச்சியாக இருக்கும்.  முகத்திலும் தசைகள் உள்ளன. அதற்கு தேவையான ஊட்டச்சத்துகள் கிடைத்தால் தசைகள் வலுப்படும். முகத்தில் வரும் சுருக்கங்கள், வயதான தோற்றம் போக்க யோகா செய்யலாம். இயற்கையான முறையில் பொலிவாக இருக்க இந்த யோகா பயிற்சிகள் உதவும்.  முகத்திற்காக சில எளிமையான  யோகா பயிற்சிகள் உள்ளன. அவற்றைப் பார்க்கலாம்.

• முக வடிவம் பெற

 சிலருக்கு முகத்தில் சதை போட்டு குண்டாக இருப்பது மாதிரி இருக்கும். அதை எப்படி சரி செய்வது. இது முகத்தில் இருக்கு அதீத கொழுப்பை குறைத்து முகத்திற்கு வடிவத்தை கொடுக்கும்.

 வலது கையை இடது கன்னத்தில் வைத்து, உள்ளங்கையில் அடிப்பகுதி தாடையில் வைத்து கொண்டு, விரல்கள் நெற்றில் இருக்குமாறு வைத்து கொள்ளவும். உதட்டை குவித்து o வடிவில் வைத்து கொண்டு, மெதுவாக மூச்சை உள்ளிழுத்து வெளியில் விட வேண்டும். இதே போல் வலது பக்கமும் செய்ய வேண்டும். இரண்டு பக்கமும் 5 முறை செய்யலாம்.  

• கண்களை சுற்றி இருக்கும் வளையத்தை மறைக்க

 மன அழுத்தம், தூக்கமின்மை  போன்ற நேரங்களில் கண்களை சுற்றி ஒரு வளையம் உருவாகும். கண்கள் வலியுடன் இருந்தால், இதை  செய்யலாம். இது கண்களை சுற்றி இருக்கும் தசைகளுக்கு இரத்த ஓட்டத்தை அதிகரிக்கும்.

நேராக அமர்ந்து கொண்டு இரண்டு கை விரல்களை கொண்டு கண்களை சுற்றி லேசாக அழுத்தி கொடுக்கலாம். விரல்களை கொண்டு கண்களை சுற்றி தட்டி கொடுக்கலாம். இரண்டு கண்களுக்கும் இதை செய்யலாம். ஒவ்வொரு கண்களை சுற்றியும் இரண்டு புறமும் 10 முறை செய்யலாம். இது மிகவும் எளிமையான  பயிற்சி ஆகும்.

• வயதான தோற்றம் தெரியாமல் இருக்க

நீண்ட நேரம் வேலை செய்வதாலும், மன அழுத்தம் காரணமாகவும், முகத்தில் வயதான தோற்றம் சீக்கிரம் வர ஆரம்பிக்கும் . இதை மாற்ற யோகா பயிற்சிகள் உதவும்.

நேராக அமர்ந்து கொண்டு உதடுகளை விரித்து பரந்த புன்னகை செய்யுங்கள். பின் உதட்டின் வழியாக மூச்சை உள்ளிழுத்து, மெதுவாக மூக்கின் வழியாக வெளியிட வேண்டும். இதே போன்று 10 முறை செய்யலாம். முதல் முறை செய்யும் போது கண்களை திறந்தும், பின்னர் கண்களை முடியும் செய்யலாம். கண்களை மூடி இருக்கும் போது கருவிழிகள் மேல் நோக்கி இருக்குமாறு பார்த்து கொள்ள வேண்டும். இது பயிற்சியை ஆழ்ந்து செய்ய  உதவும்.

இந்த பயிற்சிகள் முக தசைகளை வலுவாக்க உதவும். தசைகளுக்கு தேவையான ஊட்டச்சத்து  கிடைத்தால் முகம் பொலிவுடனும், புத்துணர்ச்சியுடனும் இருக்கும்.