Gold Origin: தங்கம் உருவானது எப்படி? விலை மதிப்பு மிக்கதாய் மாறியது ஏன்? முழு சுவாரஸ்ய தகவல்களும் இதோ..!
Gold Origin: கிடுகிடுவென ஏறும் விலைக்கு மத்தியில் தங்கம் உருவானது எப்படி? என்பது குறித்த விவரங்களை இந்த தொகுப்பில் அறியலாம்.
Gold Origin: குறுகிய காலத்தில் தங்கம் விலைமதிப்பு மிக்க உலோகமாக மாறியது எப்படி? என கீழே விவரிக்கப்பட்டுள்ளது.
மிரட்டும் தங்கம் விலை:
தங்கம் ஒரு அழகுக்கான ஆபரணம் மற்றும் சமூதாயத்தில் நமது நிலையை உயர்த்தி காட்டும் ஆடம்பமரமான உலோகமாக கருதப்படுகிறது. அதேநேரம், ஏழை மற்றும் நடுத்தர மக்களின் எளிய மற்றும் நம்பகமான முதலீடாகவும் விளங்குகிறது. ஆனால் 3 ஆண்டுகளுக்கு முன்பு சுமார் 50 ஆயிரம் ரூபாய்க்கு விற்பனை செய்யப்பட்ட ஒரு சவரன் தங்கம், தற்போது ஒரு லட்சத்து 18 ஆயிரம் ரூபாயை கடந்து இதுவரை இல்லாத உச்சத்தில் விற்பனை செய்யப்பட்டு வருகிறது. இதனால் ஏழை மற்றும் நடுத்தர மக்களுக்கு தங்கமானது எட்டாக்கனியாக உருவெடுத்து வருகிறது. இந்நிலையில் தங்கம் உருவானது எப்படி? மிகவும் விலை உயர்ந்த உலோகங்களில் ஒன்றாக மாறியது ஏன்? என்பது குறித்து இந்த தொகுப்பில் அறியலாம்.
தங்கத்தின் தோற்றம்:
தங்கம் பெரும்பாலும் செல்வம் மற்றும் அதிகாரத்தின் அடையாளமாகக் கருதப்படுகிறது. ஆனால் அதன் பயணம் மனித நாகரிகத்திற்கு முன்பே, பூமி இருப்பதற்கு முன்பே தொடங்கியது. தங்கத்தின் நீடித்த மதிப்புக்கான காரணம் மனித வரலாற்றில் மட்டுமல்ல, அண்ட நிகழ்வுகள் மற்றும் அரிய இயற்கை பண்புகளிலும் உள்ளது.
தங்கம் எங்கே பிறந்தது?
நவீன வானியற்பியலின் படி, தங்கம் பூமியில் தோன்றவில்லை. நியூட்ரான் நட்சத்திர மோதல்கள் மற்றும் சூப்பர்நோவா வெடிப்புகள் போன்ற தீவிர அண்ட நிகழ்வுகளின் போது பில்லியன் கணக்கான ஆண்டுகளுக்கு முன்பு தங்கம் உருவாக்கப்பட்டது என்பதை கேட்கும்போது விசித்தரமாக தோன்றலாம். இந்த அரிய நிகழ்வுகள் தங்கம், பிளாட்டினம் மற்றும் யுரேனியம் போன்ற கனமான தனிமங்களை உருவாக்கும் அளவுக்கு அதிக வெப்பநிலை மற்றும் அழுத்தங்களை உருவாக்குகின்றன. சாதாரண நட்சத்திரங்களால் தங்கத்தை உருவாக்க முடியாது. இந்த பேரழிவு தரும் அண்ட மோதல்கள் மட்டுமே தங்கத்தை உருவாக்க முடியும்.
தங்கம் பூமியை எப்படி அடைந்தது?
சுமார் நான்கு பில்லியன் ஆண்டுகளுக்கு முன்பு, பூமி ஒரு உடையக்கூடிய, வளரும் கிரகமாக இருந்தபோது, விண்வெளியில் இருந்து விண்கற்கள் அதன் மீது மோதின. இந்த விண்கற்கள் தங்கம் மற்றும் பிற கனமான தனிமங்களைக் கொண்டு வந்தன. ஆரம்பத்தில், இந்த தங்கத்தின் பெரும்பகுதி அதன் எடை காரணமாக பூமியின் மையப்பகுதியை நோக்கி மூழ்கியது. இருப்பினும், மில்லியன் கணக்கான ஆண்டுகளாக, மீண்டும் மீண்டும் விண்கல் தாக்கங்கள் மற்றும் எரிமலை வெடிப்புகள் இந்த தங்கத்தில் கனிசமான அளவை பூமியின் மேலோட்டத்திற்குத் திருப்பி அனுப்பின.
வெட்டி எடுக்கப்பட்ட தங்கம் எவ்வளவு?
கிமு 3000 ஆம் ஆண்டில், பண்டைய எகிப்தியர்கள் தங்கத்தை கடவுள்களின் சதை என்று கருதினர். அதன் பளபளப்பு மற்றும் அரிதான தன்மை அதை தெய்வீகம், அழியாமை மற்றும் அரச அதிகாரத்தின் அடையாளமாக மாற்றியது. கோயில்கள், கிரீடங்கள் மற்றும் அடக்கம் செய்யப்பட்ட முகமூடிகள் தங்கத்தால் அலங்கரிக்கப்பட்டன.
காலப்போக்கில் தங்கம் மிகவும் மதிப்புமிக்கதாக மாறுவதற்கு மிகப்பெரிய காரணங்களில் ஒன்று அதன் மிகவும் அரிதான தன்மை. பிரபஞ்சத்திலும் பூமியிலும் தங்கம் மிகவும் அரிதானது. மனித வரலாற்றில் இதுவரை வெட்டியெடுக்கப்பட்ட அனைத்து தங்கமும் ஒலிம்பிக் போட்டிகளில் பயன்படுத்தபப்டும் நீச்சல் குளங்களை போன்ற, 3.5 குளங்களில் அடங்கும் அளவிற்கு மட்டுமே இருக்கும் என்று விஞ்ஞானிகள் மதிப்பிடுகின்றனர். ஒலிம்பிக் குளத்தின் அளவு என்பது 50 மீட்டர் நீளம், 25 மீட்டர் அகலம் மற்றும் 2 அடி ஆழம் கொண்டதாகும். மற்றொரு உதாரணத்திற்கு இதுவரை வெட்டி எடுக்கப்பட்ட மொத்த தங்கத்தையும், உலகின் 800 கோடி பெருக்கு தலா 22 முதல் 25 கிராம் அளவிற்கு பகிர்ந்து வழங்க முடியுமாம்.
தங்கத்தின் பண்புகள்
ஆயிரக்கணக்கான ஆண்டுகளுக்குப் பிறகும் தங்கம் துருப்பிடிக்காது, கறைபடாது, அல்லது மங்காது. இது மிகவும் இணக்கமானது, அதாவது உடையாமல் எளிதாக வடிவமைக்க முடியும். இது மங்காத இயற்கையான பளபளப்பையும் கொண்டுள்ளது. கிமு 700 ஆம் ஆண்டில் லிடியா ராஜ்ஜியம் முதல் தங்க நாணயங்களை அறிமுகப்படுத்தியது. தங்கத்தின் நிலையான விலை, நீடித்து உழைக்கும் தன்மை மற்றும் அடையாளம் காணும் எளிமை ஆகியவை அதை வர்த்தகத்திற்கு ஏற்றதாக மாற்றியது. பல நூற்றாண்டுகளாக, தங்கம் உலகளாவிய மதிப்பின் ஆதாரமாக மாறியுள்ளது. இன்றும், மத்திய வங்கிகளும் முதலீட்டாளர்களும் பணவீக்கம், நாணய சரிவு மற்றும் பொருளாதார நிச்சயமற்ற தன்மைக்கு எதிராக ஒரு பாதுகாப்பாக தங்கத்தை நம்பியுள்ளனர்.
தலைப்பு செய்திகள்
ட்ரெண்டிங் செய்திகள்
