"ஏன் என்னை ஏதோ செய்தாய்" - பத்திரிகையாளர் சந்திப்பு

Anthony's Atelier நிறுவனம் தயாரிக்கும், டி. ஆண்டனி எழுதி, இயக்கி, நடித்துள்ள திரைப்படம் "ஏன் என்னை ஏதோ செய்தாய்" படத்தின் பத்திரிகையாளர் சந்திப்பு சென்னையில் நடைபெற்றது

ஏன் என்னை ஏதோ செய்தாய் பத்திரிகையாளர் சந்திப்பு

Source : X

Anthony's Atelier நிறுவனம் தயாரிக்கும், டி. ஆண்டனி எழுதி, இயக்கி, நடித்துள்ள திரைப்படம் "ஏன் என்னை ஏதோ செய்தாய்". மனதை வருடும் இன்டென்ஸ் ரொமான்டிக் டிராமாவாக உருவாகியுள்ள இப்படம் வரும் செப்டம்பர் 4ஆம் தேதி திரைக்கு வர உள்ள நிலையில், படக்குழுவினர் பத்திரிகையாளர் நண்பர்களை சந்தித்து கதைக்களம் மற்றும் தொழில்நுட்ப அம்சங்கள் குறித்து பல தகவல்களைப் பகிர்ந்துகொண்டனர்.

இப்படத்தின் மூலம் அறிமுகமாகும் கதாநாயகி மதுமிதா தாஸ் பேசுகையில், தன்னை நம்பி வாய்ப்பளித்த இயக்குநர் ஆண்டனிக்கும், பாடலாசிரியர் கார்த்திக் நேத்தா, இசையமைப்பாளர்கள் அசோக் ஸ்ரீதரன், ஜெய்கார் ஹரிநாத் ஆகியோருக்கும் நன்றி தெரிவித்தார். பொதுவாக அதிகம் பேசப்படாத ஒரு கதாபாத்திரத்தை மையமாக வைத்து நடித்திருப்பது சவாலாகவும் சிறப்பான அனுபவமாகவும் இருந்ததாகக் குறிப்பிட்டார். ஜீவா ரவி, நவ்யா சுஜி, ஆலம் ஷா உள்ளிட்ட படக்குழுவினரின் ஆதரவும் தனக்கு பெரும் பலமாக இருந்ததாகவும், தொடர்ந்து ஆதரவாக இருந்த ஜேனட்டுக்கும், தனஞ்செயனுக்கும் நன்றி தெரிவித்தார்.

இயக்குநர் டி. ஆண்டனி பேசுகையில், தயாரிப்பு பணிகளில் உதவிய ஹரிஷ், சந்தோஷ், விஜய் ஆகியோரையும் நினைவுகூர்ந்தார். 18 நாட்கள் பட்டறை பயிற்சி எடுத்த மதுமிதாவின் அர்ப்பணிப்பையும், ஜீவா ரவியின் தந்தை போன்ற ஆதரவையும், கலை இயக்குநர் சுரேந்தரனின் பங்களிப்பையும், ஜெய்கார் ஹரிநாத்தின் லைவ் சவுண்ட் பணியையும் அவர் பாராட்டினார். படத்தின் தலைப்பை கார்த்திக் நேத்தா அளித்ததாகவும், இணை இயக்குநர் ஜேனட் தொடக்கம் முதல் ஆதரவாக இருந்ததாகவும் தெரிவித்தார். விநியோக பிரச்சனையை தனஞ்செயன் உடனடியாக தீர்த்து வைத்ததால் இந்தப் படம் இன்று வெளிச்சத்திற்கு வந்திருப்பதாகவும் நெகிழ்வுடன் பகிர்ந்துகொண்டார்.

தயாரிப்பாளர் தனஞ்செயன் பேசுகையில், படத்தின் போஸ்டரைப் பார்த்தே தானாக முன்வந்து இப்படத்துடன் இணைந்ததாகவும், குறுகிய காலத்தில் உருவாகியிருந்தாலும் இது ஒரு அழகான கவித்துவமான காதல் கதையாக உருவாகியுள்ளதாகவும் தெரிவித்தார். சிங்க் சவுண்டில் டப்பிங் இல்லாமல் உருவாக்கப்பட்டிருப்பது பாராட்டுக்குரியது எனவும், சிறு பட்ஜெட் படங்களுக்கு ஊடகங்களின் ஆதரவு மிகவும் அவசியம் எனவும் வலியுறுத்தினார். செப்டம்பர் 1ஆம் தேதி முதல் தயாரிப்பாளர்கள் சங்கம் அறிவித்துள்ள வேலைநிறுத்தம், மற்றும் 8 வாரங்கள் ஆன படங்களை ஓடிடி தளங்கள் வாங்காத பிரச்சனை குறித்தும் அவர் குறிப்பிட்டு, தமிழ்நாடு அரசின் தலையீட்டுடன் தொழில்துறையை பாதிக்காத வகையில் விரைவில் நல்ல தீர்வு கிடைக்கும் என நம்பிக்கை தெரிவித்தார். படம் செப்டம்பர் 4ஆம் தேதி வெளியாகி மிகப்பெரிய வெற்றி பெற வேண்டும் என வாழ்த்தினார்.

காதல், தனிமை மற்றும் வாழ்க்கையின் வலி ஆகியவற்றை மையமாகக் கொண்டு உருவாக்கப்பட்டுள்ள இப்படம், தாயை இழந்து சிறு வயதிலிருந்தே தனிமையில் வளரும் இளைஞன் ஒருவன் மதுவுக்கு அடிமையாகி இருளான வாழ்க்கைக்குள் சிக்கித் தவிப்பதையும், அவன் வாழ்க்கையில் நுழையும் காதல் அவனை இருளிலிருந்து வெளிச்சத்தை நோக்கி அழைத்துச் செல்வதையும் மையக்கருவாகக் கொண்டுள்ளது. ஆலம் ஷா, நவ்யா சுஜி, ராஜேந்திரன் சிங், மாதங்கி ஆகியோர் மற்ற முக்கிய கதாபாத்திரங்களில் நடித்துள்ளனர்.