துரந்தர் பிரச்சார படம் என்றால் நீங்கள் எடுப்பது என்ன? வெற்றிமாறனை சரமாரியாக விமர்சிக்கும் நெட்டிசன்கள்

துரந்தர் திரைப்படத்தை இயக்குநர் வெற்றிமாறன் மறைமுகமாக விமர்சித்ததைத் தொடர்ந்து சமூக வலைதளங்களில் கடுமையான விமர்சனங்களை சந்தித்து வருகிறார்

வெற்றிமாறன் , துரந்தர்

Source : X

துரந்தர் 2  திரைப்படம் உலகளவில் ரூ1200 கோடி வசூலைக் கடந்த பிரம்மாண்ட வெற்றிபெற்றள்ளது. வசூலை குவித்து வந்தாலும் இப்படத்தின் மீது பல்வேறு தரப்பினர் விமர்சனம் வைத்துள்ளார்கள். அந்த வகையில் திரைப்பட நிகழ்ச்சி ஒன்றில் பேசிய இயக்குநர் வெற்றிமாறன் துரந்தர் 2 திரைப்படத்தை மறைமுகமாக விமர்சித்து பேசியுள்ளது சர்ச்சையை ஏற்படுத்தியுள்ளது. டிமானிட்டைசேஷனை நியாயப்படுத்தும்  இதுபோன்ற பிரச்சார படங்கள் மக்களிடம் பெரியளவில் தாக்கம் செலுத்துவதாக வெற்றிமாறன் துரந்தர் 2 படம் குறித்து பேசினார். 

ஆதித்யா தார் இயக்கத்தில் ரன்வீர் சிங் நடித்து கடந்த ஆண்டு இறுதியில் துரந்தர் திரைப்படம் வெளியானது. பல்வேறு உண்மை சம்பவங்களை மையமாக வைத்து கற்பனை ஸ்பை த்ரில்லர் படமாக உருவாகியுள்ளது இப்படம். திரைக்கதை , நடிப்பு , உருவாக்கம் என மிகசிறப்பாக இப்படம் உருவாகியிருந்தாலும் படத்தில் பேசப்பட்டுள்ள கருத்துக்கள் இஸ்லாமிய வெறுப்பையும் பாஜக ஆதரவையும் நோக்கமாக கொண்டுள்ளது. முதல் பாகம் உலகளவில் ரூ1300 கோடி வசூல் செய்த நிலையில் கடந்த மார்ச் 19 ஆம் தேதி துரந்தர் 2 வெளியானது. இப்படம் இதுவரை உலகளவில் ரூ1200 கோடி வசூலித்துள்ளது. ரசிகர்கள் இப்படத்தை கொண்டாடி வந்தாலும் திரைத்துறையை சேர்ந்த பலர் இப்படத்தை விமர்சிக்கவும் செய்துள்ளார்கள்

வெற்றிமாறன் விமர்சனம் 

கார்த்திக் சுப்பராஜ் தயாரித்துள்ள நீளிரா படத்தின் பத்திரிகையாளர் சந்திப்பில் இயக்குநர் வெற்றிமாறன் கலந்துகொண்டு பேசினார். அப்போது " இன்றைய சூழலில் எல்லாமே பிரச்சாரமாக மாறுகிறது. இந்த பிரச்சார படங்கள் நம்முடைய நினைவுகளில் பெரியளவில் தாக்கம் செலுத்தக் கூடியவை. நினைவுகள் நிலையற்றவை. டிமானிடைசேஷனில் யார் அதிகமாக பாதிக்கப்பட்டார்கள். பணத்தை மாற்ற வரிசையில் நின்று யார் செத்துப்போனார்கள் என்று நம் எல்லாருக்குமே தெரியும். ஆனால் ரொம்ப எளிமையாக அதனுடைய பாதிப்பை நம்மால் மற்றிவிட முடியும். அதனால் இந்த மாதிரியான வெறுப்பு பிரச்சாரங்களுக்கு எதிராக நாம் இந்த மாதிரியான படங்களை எடுக்க முடியும் " என்று வெற்றிமாறன் பேசினார். 

நீங்கள் எடுப்பது மட்டும் பிரச்சாரமில்லையா ?

வெற்றிமாறனின் கருத்து துரந்தர் பட ஆதரவாளர்கள் மற்றும் வலதுசாரிகளிடையே பெரும் கோபத்தை கிளப்பியுள்ளது. துரந்தர் 2 பிரச்சார படம் என்றால் வெற்றிமாறன் எடுக்கும் படங்களும் தீவிர இடதுசாரி பிரச்சார படங்கள் தான் . அரியலூர் குண்டு வெடிப்பு சம்பவத்தை விடுதலை திரைப்படத்தில் வெற்றிமாறன் நியாபடுத்தியது பிரச்சாரமில்லையா? என சமூக வலைதளத்தில் நெட்டிசன்கள் பொங்கி எழுந்து வருகிறார்கள்.