Saran Raj Passes Away: குடிபோதையில் கார் ஓட்டி பைக் மீது மோதிய துணை நடிகர்.. பரிதாபமாக உயிரிழந்த அசுரன் பட நடிகர்...

துணை நடிகரின் கார் மோதி இயக்குநர்  வெற்றிமாறனின் உதவி இயக்குநர் உயிரிழந்த சம்பவம் திரையுலகில் சோகத்தை ஏற்படுத்தியுள்ளது. 

சரண்ராஜ்

துணை நடிகரின் கார் மோதி இயக்குநர் வெற்றிமாறனின் உதவி இயக்குநர் உயிரிழந்த சம்பவம் திரையுலகில் சோகத்தை ஏற்படுத்தியுள்ளது. 

சென்னை மதுரவாயல் தனலட்சுமி தெருவைச் சேர்ந்த சரண்ராஜ் என்ற 26 வயதான இளைஞர் வெற்றிமாறனிடம் துணை இயக்குனராக பணியாற்றி வந்துள்ளார். அதுமட்டுமல்லாமல் வடசென்னை, அசுரன் உள்ளிட்ட படங்களில் துணை நடிகராக ஒரு சில காட்சியில் நடித்துள்ளதாகவும் சொல்லப்படுகிறது. இதனிடையே நேற்று நள்ளிரவு 11.30 மணியளவில் இவர் கே.கே.நகர் பகுதியில் உள்ள ஆற்காடு சாலையில் தனது பைக்கில் சென்று கொண்டிருந்தார். 

அப்போது பின்னால் வந்த கார் ஒன்று மின்னல் வேகத்தில் சரண்ராஜ் பைக் மீது மோதி விபத்துக்குள்ளானது. இதில் தூக்கி வீசப்பட்ட நடிகர் சரண்ராஜ் படுகாயங்களுடன் சம்பவ இடத்திலேயே பரிதாபமாக உயிரிழந்தார். உடனடியாக அப்பகுதி மக்கள் விபத்து குறித்து போலீசுக்கு தகவல் கொடுத்தனர். 

உடனடியாக சம்பவ இடத்திற்கு வந்த காவல்துறையினர் சரண்ராஜ் உடலை மீட்டு பிரேத பரிசோதனைக்காக சென்னை ராயப்பேட்டை அரசு மருத்துவமனைக்கு அனுப்பி வைத்தனர். மேலும் விபத்து குறுத்து விசாரணை நடத்தினர். இதில் காரை ஓட்டி வந்தது சாலிகிராமத்தில் உள்ள எம்.சி.அவென்யூவைச் சேர்ந்த பழனியப்பன் என்பது தெரிய வந்தது. 

அவரும் சினிமாவில் துணை நடிகராக இருந்துள்ளார். இவரும் சரண்ராஜூம் நண்பர்கள் என தெரிய வந்தது. மேலும் குடிப்பழக்கம் உள்ள பழனியப்பன் போதையில் அதிவேகமாக கார் ஓட்டி வந்ததும் கண்டறியப்பட்டது. இதுகுறித்த அருகில் இருந்த சிசிடிவி காட்சிகளை கைப்பற்றி விசாரணை நடத்தினர். சரண்ராஜ் உயிரிழந்த சம்பவம் திரையுலகில் பெரும் சோகத்தை ஏற்படுத்தியுள்ளது.